ޖުމްހޫރީ ޕާޓީގެ ލީޑަރ އަދި ރިޔާސީ ކެންޑިޑޭޓް ޤާސިމް އިބްރާހީމްގެ ރިޔާސީ ކެމްޕޭން ނިންމާލުމުގެ ބޮޑު ހިނގާލުން މިއަދު ހަވީރު ބާއްވަން ނިންމައިފިއެވެ.

ޖުމްހޫރީ ޕާޓީން ބުނީ، މި ހިނގާލުން ފެށޭނީ އާޓިފިޝަލް ބީޗް ސްޓޭޖާއި ހެންވޭރު ދަނޑާއި ދެމެދު މަޖީދީ މަގުން ކަމަށެވެ. އަދު ހިނގާލުން ފަށާނީ ހަވީރު 04:00 ގައި ކަމަށްވެސް ބުނެފައިވެއެވެ. މި ހިނގާލުމުގައި ބައިވެރިވުމަށް ޤާސިމް އާއި އެމަނިކުފާނުގެ ޓީމުން ވަނީ ހުރިހާ ރައްޔިތުންނަށް ދައުވަތު އަރުވާފައެވެ.

ފާއިތުވި ދުވަސްތަކުގައި ޤާސިމް އާއި އެމަނިކުފާނުގެ ޓީމުންވަނީ ކެންޕެއިނަށް ރާއްޖޭގެ ވަރަށް ގިނަ ރަށްތަކަށް ޒިޔާރަތް ކުރައްވާފައެވެ. އެގޮތުން ގާސިމް ބައިވެރިވެ ވަޑައިގެން ހިންގެވި ކެންޕެއިން ދަތުރުފުޅުތަކުގައި އެމަނިކުފާނު ވަނީ 21 ދުވަހުގެ ތެރޭގައި 72 ރަށަކަށް ވަޑައިގެންފައެވެ.

އަދި އެމަނިކުފާނަށް ވަޑައި ނުގަނެވޭނެ ގިނަ ރަށްތަކަށް ޓީމުގެ މެންބަރުން ވަނީ ވަޑައިގެންފައެވެ. 

ކެންޕެއިންގެ ތެރެއިން ގާސިމް ވަނީ އެމަނިކުފާނު މި އަހަރުގެ ރިޔާސީ އިންތިހާބުގައި ވާދަކުރައްވަން ނިންމެވި ސަބަބު ވަރަށް ތަފްސީލް ކޮށް ވިދާޅުވެ ދެއްވާފައެވެ. އެގޮތުން، ގައުމު މިހާރު އަޅުވެތި ކަމަށްގޮސް، ބޭރު ގައުމު ތަކަށް ދަރައި، ރައީސުލްޖުމްހޫރިއްޔާ ގަނޫނާ ޚިލާފް ވުމުން އެކަން ކަން ބަލަން ނުހުރެވުނީ ކަމަށް ގާސިމް ވަނީ ވިދާޅުވެފަ އެވެ.