ޖުމްހޫރީ ޕާޓީގެ ސްލޮޓެއްގައި އިކޮނަމިކް މިނިސްޓްރީގެ ޑެޕިއުޓީ މިނިސްޓަރުކަމުގެ މަގާމު ފުރުއްވަމުން ގެންދެވި ހުސައިން ޒާމިރު މިއަދު އެ މަގާމުން އިސްތިއުފާ ދެއްވައިފިއެވެ.
މަގާމުން އިސްތިއުފާ ދިންކަން އަންގައި ޒާމިރު ވަނީ އޭނާ ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހަށް ފޮނުއްވެވި ސިޓީ އާންމުކޮށްފައެވެ.
އެ ސިޓީގައި ޒާމިރު ވިދާޅުވެފައި ވަނީ އެންމެންގެ ބުރަ މަސައްކަތުން 2018 ވަނަ އުފެދުނު ކޯލިޝަން ސަރުކާރުގައި ދިވެހި ރައްޔިތުންގެ ހާދިމެއްގެ ގޮތުގައި ދިވެހި ދައުލަތަށް ހިދުމަތް ކުރުމަށް ދެއްވި ފުރުސަތަށް ވަރަށް ބޮޑަށް ޝުކުރު އަދާ ކުރާ ކަމަށެވެ.
އެހެންނަމަވެސް މަގާމުން ވަކިވި ސީދާ ސަބަބެއް ޒާމިރުގެ ސިޓީގައި ބަޔާންކޮށްފައެއް ނުވެއެވެ.
މިއަދުން ފެށިގެން އަޅުގަނޑު އައްޔަން ކޮށްފައިވާ ސިޔާސީ މަގާމުން އިސްތިއުފާ ދީފިން
ޒާމިރު
ސަރުކާރުގައި ޒާމިރު ހުންނެވީ ޖުމްހޫރީ ޕާޓީގެ ސްލޮޓެއް ގައެވެ. ނަމަވެސް މިހާރު އެ ޕާޓީން ވަނީ ކޯލިޝަނުން ވަކިވެފައެވެ.
ޖުމްހޫރީ ޕާޓީ އިން ރިޔާސީ އިންތިހާބުގެ ދެވަނަ ބުރުގައި ކޯލިޝަން ހަދާނެ ބަޔަކު އަދީ ނިންމާފައެއް ނުވެއެވެ. އެކަމަކު ދިވެހި ގައުމާއި ރައްޔިތުންނަށްޓަކައި އިސްލާހީ މަސައްކަތުގައި އެޕާޓީން އާބާދުވެސް ކުރިއަށްދާނެ ކަމަށް އެ ޕާޓީން ވަނީ ބުނެފައެވެ.
Advertisement
This content is created and paid for by advertisers and does not involve Voice Journalists
