ރިޔާސީ އިންތިހާބުގެ ކެމްޕެއިންގައި އިންތިހާބުގައި ވާދަކުރައްވާ ކެންޑިޑޭޓުންނަށް އެންޓި ކެމްޕެއިން ކުރުމުގެ ގޮތުން އެކި ކަންކަން ކުރަމުންދާކަން ފާހަގަކުރެވި އެކަމާމެދު ކަންބޮޑުވުން ފާޅުކޮށް ހިއުމަން ރައިޓްސް ކޮމިޝަން އޮފް މޯލްޑިވްސް (އެޗްއާރުސީއެމް) އިން ބަޔާނެއް ނެރެފިއެވެ.

އެޗްއާރުސީއެމްގެ އިން މިއަދު ނެރުނު ބަޔާނުގައި ވަނީ ރިޔާސީ އިންތިޚާބު 2023 ގެ ދެވަނަބުރު ބޭއްވުމަށް ތައްޔާރުވަމުންދާ މި ދަނޑިވަޅުގައި އެއްވެސް ފަރާތްތަކުން ކެންޑިޑޭޓުންނަށް ލިބިފައިވާ ކެންޕެއިން ކުރުމުގެ ޙައްޤަށް ހުރަސް ނޭޅުމަށް ގޮވާލައި ވޯޓުލުމުގެ ޙައްޤު ލިބިގެންވާ ކޮންމެ މީހަކަށްމެ ކެންޑިޑޭޓެއް އިޚްތިޔާރުކުރުމަށްޓަކައި ސިޔާސީ ހަރަކާތްތަކާއި ކެމްޕެއިން ހަރަކާތްތަކުގައި ބައިވެރިވުމާއި ކެންޑިޑޭޓުންނާއި އަދި ކެންޑިޑޭޓުން ތަމްޞީލުކުރާ ފަރާތްތަކާ ބައްދަލުކޮށް މުޢާމަލާތްކުރުމުގެ ފުރުޞަތު ލިބުމަކީ މުހިއްމުކަމެއް ކަމުގައި ފާހަގަ ކޮށްފައެވެ.

އެގޮތުން ޕާޓީތަކަށް ނިސްބަތްވާ ބައެއް ފަރާތްތަކާއި އަދި އެ ފަރާތްތަކަށް ތާއީދުކުރައްވާ ބައެއް ފަރާތްތަކުންވެސް އެންޓި-ކެމްޕެއިން ކުރުމަށްޓަކައި އެކަކު އަނެކަކުގެ އަބުރަށް އަރައިގަތުމާއި، ފުރައްސާރަކުރުން ފަދަ ނޭދެވޭ ޢަމަލުތައް ކުރަމުންދާކަން އެ ކޮމިޝަނުގެ މޮނިޓަރ ކުރުމުގެ މަސައްކަތުގެ ތެރެއިން ފާހަގަކުރެވިފައިވާކަމަށް އެޗްއާރުސީއެމް އިން މިއަދު ނެރުނު ބަޔާނުގައި ބުނެފައިވެއެވެ.

 މީގެ އިތުރުން އެ ބަޔާނުގައި ވަނީ ކެންޑިޑޭޓަކަށް ތާއީދު ހޯދުމަށް ނުވަތަ އެހެން ކެންޑިޑޭޓަކާ ބެހޭގޮތުން ޝުޢޫރު ފާޅުކުރުމަށްޓަކައި، ބިނާކުރަނިވި ގޮތެއްގައި ފާޑުކިއުމަށާއި އަދި ނަޒާހަތްތެރިކަމާއެކު ކެމްޕެއިންކުރުމަށް އިސްކަން ދެއްވާ، އަނެކާގެ އަބުރާ އިއްޒަތަށް އަރައި ނުގަތުމަށާއި އަދި ނަފްރަތު އުފެދޭ ވާހަކަތައް ނުދެއްކުމަށް މި ކޮމިޝަނުން ހުރިހާ ސިޔާސީ ޕާޓީތަކާއި އާންމު ރައްޔިތުންނަށް އިލްތިމާސްކޮށްފައެވެ. 

ރިޔާސީ އިންތިހާބުގެ ކެމްޕެއިންގެ ހަރަކާތްތައް ފޯރީގައި ކުރަމުން އަންނަ އިރު އިންތިހާބުގެ ކެމްޕެއިނަށް ހިންގޭ އެކި އެކި ހަރަކާތްތަކުގައި އެންޓިކެމްޕެއިން ކުރުމުގެ ގޮތުން އެކިކަހަލަ ކަންކަން ކުރަމުން އަންނަކަން ފާހަގަކޮށްވެއެވެ.