ޖުމްހޫރީ ޕާޓީގެ ލީޑަރު ގާސިމް އިބްރާހިމްގެ ސްޕެޝަލް އެޑްވައިޒަރު ރިޔާޒް ރަޝީދު އެމްޑީޕީގެ ރިޔާސީ ކެންޑިޑޭޓް ރައީސް އިބްރާހިމް މުހައްމަދު ޞާލިހަށް ތާއީދު ކުރައްވަން ނިންމަވައިފިއެވެ.

ރައީސް ޞާލިހް އަށް ތާއީދު ކުރައްވާކަން ހާމަކުރައްވައި ރިޔާޒު ކުރެއްވި ޓްވީޓެއްގައި ވިދާޅުވީ ޚާއްސަ މަޖިލިހުގަ އާއި ރައްޔިތުންގެ މަޖިލިހުގައިވެސް ރައީސް ޞާލިހާއެކު އިސްލާހީ ގިނަ މަސައްކަތްތަކެއް ކުރައްވާފައިވާ ކަމަށެވެ. 

އަދި ރިޔާސީ އިންތިހާބުގެ ދެވަނަ ބުރުގައި ރައީސް ޞާލިހަށް ތާއީދު ކުރައްވަން ނިންމަވާފައިވާ ކަމަށެވެ.

ރިޔާސީ އިންތިހާބުގެ ފުރަތަމަ ބުރުގައި، ފަސްވަނައަށް އެންމެ ގިނަ ވޯޓު ލިބުނު ޖުމްހޫޓީ ޕާޓީން މިފަހަރު ނިންމާފައިވަނީ އިންތިހާބުގެ ދެވަނަ ބުރުގައި އެއްވެސް ކެންޑިޑޭޓަކަށް ތާއީދުނުކުރާށެވެ.

ޕާޓީން މިގޮތަށް ނިންމި ނަމަވެސް ޖޭޕީގެ އާންމު މެމްބަރުންނަށް ބޭނުން ކެންޑިޑޭޓަކަށް ތާއީދުކުރުމުގެ ހައްގު އޮންނާނެ ކަމަށް ޖޭޕީގެ ލީޑަރު ގާސިމް ވަނީ ވިދާޅުވެފައެވެ.

އެއާއެކު، ގާސިމްގެ ސީނިއަރ އެޑްވައިޒަރ އަހުމަދު ނިހާން ވަނީ އޭނާ ތާއީދު ކުރައްވާނީ ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ މުހައްމަދު މުޢިއްޒަށް ކަން ހާމަކުރައްވާފައެވެ. 

ނިހާން އާއި ރިޔާޒު ޖޭޕީގައި ހުންނަވައިގެން އެހެން ކެންޑިޑޭޓުންނަށް ތާއީދު ކުރަން ނިންމާފައިވާއިރު، ގާސިމް ގެ އިންތިހާބީ އޭޖެންޓް ޢަލީ ވަހީދު ވަނީ އިއްޔެ އެ ޕާޓީން ވަކިވެފައެވެ. އޭނާ ތާއީދު ކުރާ ކެންޑިޑޭޓް އަދި ހާމައެއް ނުކުރެއެވެ.