ރިޔާސީ އިންތިޚާބުގެ ދެވަނަ ބުރުގައި އެމްޑީޕީ ކޯލިޝަންގެ ކެންޑިޑޭޓް ރައީސް އިބްރާހިމް މުޙައްމަދު ޞާލިޙަށް ތާއީދު ކުރުމަށް، ޓްރާންސްޕޯޓް މިނިސްޓްރީގެ ސްޓޭޓް މިނިސްޓަރު ޢަލީ ޞާލިހު ނިންމަވައިފިއެވެ.
ޢަލީ ޞާލިޙަކީ ޖޭޕީގެ ލީޑަރ ޤާސިމް އިބްރާހިމްގެ ވަރަށް އަރިސް ބޭފުޅެކެވެ.
މިކަމާއި ގުޅިގެން "ވޮއިސް" އާއި ވާހަކަދައްކަވަމުން ޢަލީ ޞާލިޙް ވިދާޅުވީ އޭނާ އަކީ މިހާރުވެސް ސަރުކާރުގެ މަޤާމެއްގައި ހުރެ ސަރުކާރުގެ ސިޔާސަތުތައް ކުރިއަށް ނެރެގެން މަސައްކަތް ކުރަން ހުރި މީހެއް ކަމަށެވެ.
"އަޅުގަނޑަށް ހަމަގައިމުވެސް އެއްވެސް މީހަކަށް އެއްވެސް ވަރެއްގެ އަނިޔާއަކަށް ހިތްވަރެއް ދޭކަށް ނުކެރޭނެ އަޅުގަނޑަކަށް، ލިބިދާނެ ކަމަށް ފެންނަންޏާވެސް އަޅުގަނޑަށް އުނދަގޫވާނެ" ޢަލީ ޞާލިޙް ވިދާޅުވިއެވެ.
ޢަލީ ޞާލިޙް ވިދާޅުވީ މިފަސް އަހަރަކީ ސިޔާސީ މީހުންނަށް ހަމަނޭވާގައި ތިބެވުނު ފަސްއަހަރު ކަމަށެވެ. އަދި ރައީސް ޞާލިޙަށް ކުރައްވާ ތާއީދަކީ އަމިއްލަ ގޮތުން ކުރައްވާ ތާއީދެއް ކަމަށާއި މިކަމުގައި ޕާޓީގެ ނަމެއް ނެތް ކަމަށެވެ.
މި އިންތިޚާބުގައި ޖޭޕީގެ ލީޑަރ ޤާސިމް އިބްރާހިމްގެ ޤާސިމް ނެތް ކަމަށާއި، އެނަން އޮތްނަމަ އަބަދުވެސް ފުރަތަމަ ޗޮއިސް އަކަށްވާނީ އެނަމާއި ޖުމްހޫރީ ޕާޓީ ކަމަށް ޢަލީ ޞާލިޙް ވިދާޅުވިއެވެ.
ޢަލީ ޞާލިޙްގެ އިތުރުން ޖޭޕީގެ ލީޑަރ ޝިޕްގެ އިސް ސަފުން ފެންނަ ބޭފުޅެއް ކަމަށްވާ ރިޔާޒް ރަޝީދުވެސް ވަނީ ރައީސް ޞާލިޙަށް ތާއީދު ކުރެއްވުމަށް ނިންމަވައިފައެވެ.
Advertisement
This content is created and paid for by advertisers and does not involve Voice Journalists
