ކުރީގެ ނައިބު ރައީސް އަދި ޖުމްހޫރީ ޕާޓީގެ އެޑްވައިޒަރު އަބްދުالله ޖިހާދާއި އެކު ޖޭޕީ ކައުންސިލްގެ ގިނަ މެމްބަރުންތަކެއް ޕްރޮގްރެސިވް ކޮންގްރެސް ކޯލިޝަންގެ ރިޔާސީ ކެންޑިޑޭޓު ޑރ މުހައްމަދު މުއިއްޒު ފަހަތްޕުޅަށް އަރާވަޑައިގެންފި އެވެ. 

ޑރ މުއިއްޒު ގިރާވަރު ކޮމިއުނިޓީގެ ރައްޔިތުންނާއި ބައްދަލުކުރެއްވުމަށް ބެއްވި ހަފްލާގައި ޖޭޕީގެ މެމްބަރުންތައް ވަނީ ޑރ މުއިއްޒަށް ތާއީދުކުރަން ނިންމަވާފައިވާކަން ރަސްމީކޮށް އިއުލާނުކުރައްވާ އެމަނިކުފާނުގެ ކެމްޕޭނާއި ގުޅިވަޑައިގެންފަ އެވެ. 

އެގޮތުން ޑރ މުއިއްޒަށް ތާއީދުކުރައްވަން ނިންމެވި ބޭފުޅުންގެ ތެރޭގައި:

- ޖުމްހޫރީ ޕާޓީގެ ސްޕެޝަލް އެޑްވައިޒަ އަކަށް މިއަދާ ހަމަޔަށް ހުންނެވި ޑރ.އިރުތިޝާމް އަލީ

- ކްލިނިކަލް ސައިކޮލޮޖިސްޓް ޑރ.އައިޝަތު ނާޒް،

- ފިލްމީ ތަރި އާމިނަތު ރިޝްފާ،

- ޖުމްހޫރީ ޕާޓީގެ ކައުންސިލް މެންބަރ މުހައްމަދު ނާޒިލް،

- ޖުމްހޫރީޕާޓީގެ ޒުވާނުންގެ ލީގުގެ ރައީސްގެ މަޤާމުގައި ހުންނެވި ކުރީގެ މެންބަރ ޔާމިން ރަޝީދު،

- ޖުމްހޫރީ ޕާޓީގެ ލީޑަރުގެ އެޑްވައިޒަރުގެ މަޤާމުގައި ހުންނެވި އަލްފާޟިލް ހަސަން މުޤުނީ،

- ޖުމްހޫރީ ޕާޓީގެ ކައުންސިލް މެންބަރ އަލްއުސްތާޒު އަލީ އިބްރާހިމް ދީދީ،

- ޖުމްހޫރީ ޕާޓީގެ ކައުންސިލް މެންބަރ އަލްފާޟިލް އަދީލް އަލީ،

- ޖުމްހޫރީ ޕާޓީގެ ކައުންސިލް މެންބަރ އަލްފާޟިލް މުހައްމަދު ޝާހިދު،

- މަޝްހޫރު ބައިބަލާ ތަރި ބީޖީ ސަނީ،

- ގާފަރު ކޮމިއުނިޓީއަށް ނިސްބަތްވާ ވިޔަފާރިވެރިޔެއް ކަމަށްވާ އަބްދުﷲ މާޖިދު ހިމެނެއެވެ. 

ރިޔާސީ އިންތިޚާބުގެ  ފުރަތަމަ ބުރު ނާކާމިޔާބުވުމުން، އެ ޕާޓީން ވަނީ ދެވަނަ ބުރުގައި ވަކި ފަރާތަކަށް ނުޖެހުމަށް ނިންމާފަ އެވެ. އެގޮތުން ޕާޓީގެ ލީޑަރު ޤާސިމް އިބްރާހިމް ވިދާޅުވީ ޖުމްހޫރީ ޕާޓީން މަސައްކަތް ކުރަމުންދާނީ އެ ޕާޓީ ކުރިއެރުވުމަށް ކަމަށެވެ. އަދި އިންތިޚާބުގެ ދެވަނަ ބުރުގައި ވަކި ފަޅިއެއް ނުނަގާނެކަމަށް ވިދާޅުވި އެވެ. 

އެހެން ނަމަވެސް އެފަހުން ޕާޓީގައި އިސްކޮށް ހަރަކާތްތެރިވި ވަރަށް ގިނަ ބަޔަކު ވަނީ ޕާޓީ ދޫކޮށްލާފަ އެވެ. އޭގެ ތެރެއިން އިސް ބައެއް ފަރާތްތައް ޕީޕީއެމް-ޕީއެންސީ ކޯލިޝަނަށް ތާއީދުކޮށްފައިވާއިރު، ދެން ތިއްބެވި ފަރާތްތައް ވަނީ އެމްޑީޕީއާއި ގުޅި، ރައީސް ޞާލިހާއި ބައިޔަތު ހިފާފައެވެ.