ޖުމްހޫރީ ޕާޓީގެ އިސްސަފުގައި ތިއްބެވި ބޭފުޅުންގެ ތާއީދު ލިބުމަކީ ކުރަމުންގެންދާ މަސައްކަތައް ލިބިގެން ދިޔަ އިތުރު ހިތްވަރެއް ކަމަށް ރައީސް އިބްރާހިމް މުޙައްމަދު ޞާލިޙް ވިދާޅުވެއްޖެއެވެ.

ރޭ މާލޭގައި ހުންނަ ސޯސަން ޖަގަހައިގައި ބޭއްވި ކެމްޕޭނު ބައްދަލުވުމުގައި ވާހަކަދައްކަވަމުން ރައީސް ޞާލިޙް ވިދާޅުވީ ރޭ އެމްޑީޕީގެ ކެމްޕޭނާއި ގުޅިވަޑައިގަތް ބޭފުޅުންނަކީ އައު މޫނު ތަކެއް ނޫން ކަމަށާއި، އެބޭފުޅުންނަކީ ކުރިއްސުރެވެސް ހަމަ އެއްމަޤްސަދުތަކެއް ހާސިލް ކުރުމަށް މަސައްކަތް ކުރެއްވި ބޭފުޅުން ތަކެއް ކަމަށެވެ.

ރައީސް ޞާލިޙް ވިދާޅުވީ އެބޭފުޅުންނާއި އެކު މަސައްކަތް ކުރުމަށް ދަތި ނުވާނެ ކަމަށާއި، ރައީސް ޞާލިޙާއި އެހުރިހާ ބޭފުޅުންގެ ވެސް މަޤްސަދަކީ އެއް މަޤްސަދެއް ކަމަށާއި އަމާޒަކީވެސް އެއް އަމާޒެއް ކަމަށެވެ.

"އެއީ އަނިޔާވެރި ކަމަށް ނޫނެކޭބުނުން، ރައްޔިތުންނަށް އުފާވެރި ދުވަހެއް ހޯދައި ދިނުން، އަމާންކަމާއި އެކީގައި މިރާއްޖޭގައި އުޅެވޭނެ ގޮތްތަކެއް ހޯދައި ދިނުން" ރައީސް ޞާލިޙް ވިދާޅުވިއެވެ.

ރައީސް ވިދާޅުވީ މިހާރު އުފެދިފައި އޮތް ކޯލިޝަންގައި ޖޭޕީގެ ނަން ނެތަސް އެޕާޓީ އަކީ އެމްޑީޕީ ކޯލިޝަންގެ ބައިވެރިއެއް ކަމަށެވެ. އަދި އެޕާޓީގެ އިސް ބޭފުޅުންތަކެއް މިވަގުތު ރައީސް ޞާލިޙާއި ގުޅިވަޑައިގަތުމަކީ އޭރު ހެދުނު ކޯލިޝަން ދެމެހެއްޓުމާއި މިހާރު ކުރައްވަމުން ގެންދަވާ މަސައްކަތް ކާމިޔާބު ކުރުމަށް ޓަކައި ލިބިލެއްވި ހިތްވަރެއް ކަމަށް ރައީސް ޞާލިޙް ވިދާޅުވިއެވެ.