ހިޔުމަން ރައިޓްސް ކޮމިޝަން އޮފް މޯލްޑިވްސް، އެޗްއާރްސީއެމްގެ ނާއިބު ރައީސް އަހުމަދު އަދުހަމް އަބްދުالله ވަޒީފާއަށް ނުނިކުންނަވައި އޮސްޓްރޭލިޔާގައި ދިރިއުޅުއްވާތާ އެތަށް މަސް ދުވަސް ވުމަށްފަހުގައި، އެ މަގާމުން އިސްތިއުފާ ދެއްވައިފި އެވެ. 

"ވޮއިސް" އަށް މައުލޫމާތު ލިބިފައިވާ ގޮތުގައި، އޮފީހަށް މަސައްކަތަށް ނުނިކުންނަވައި އަދުހަމް އޮސްޓްރޭލިޔާގައި ދިރިއުޅުއްވަމުންދާތާ މިހާރު 4 ވަރަކަށް މަސް ދުވަސް ވެއްޖެއެވެ. އަދި އޭނާ މިހާރު އަންނަނީ އޮސްޓަރުލިޔާގައި އަމިއްލަ ވިޔަފާރިއެއް ހޯދައި އެއިންވެސް ނަފާ ހޯދަމުން ކަމަށް މައުލޫމާތު ލިބެއެވެ.

އޮސްޓަރޭލިޔާގައި އަމިއްލަ ވިޔާފަރި ހޯދައި އެއިން ފައިދާ ނަގަމުންދާއިރު، އެޗްއާރްސީއެމްގެ ނާއިބު ރައީސް ގެ މަގާމުގައި ހުރުމުގެ ސަބަބުން ދައުލަތުގެ ފައިސާއިންވެސް އޭނާއަށް މަގާމުގެ އުޖޫރަ އައީ ލިބެމުންނެވެ. 

އެގޮތުން ވަޒީފާއަށް ނުނިކުންނެވި ނަމަވެސް، މުސާރައިގެ ގޮތުގައި 44,000 ރުފިޔާ އަދި އެމްޕްލޯޔަރ ޕެންޝަންގެ ގޮތުގައި 2,100, އެކު ޖުމްލަ 46,100 އޭނާއަށް ކޮންމެ މަހަކުވެސް އައީ ލިބެމުންނެވެ. 

މި ކަންކަން މީސްމީޑިއާގައި ޢާއްމުވެ ގިނަ ބައެއްގެ ފާޑުކިޔުންތައް އަދުހަމްއަށް އަމާޒުވެފައިވާއިރު، ހިޔުމަން ރައިޓްސް ކޮމިޝަނުން ވޮއިސް އަށް މަޢުލޫމާތު ދީފައިވާ ގޮތުގައި އަދުހަމް ވަނީ އޭނާގެ އިސްތިއުފާ ސިޓީ ރައީސުލްޖުމްހޫރިއްޔާއަށް ހުށަހަޅުއްވާފައެވެ. އަދި އިސްތިއުފާ ސިޓީ ގަބޫލު ކުރަންދެން އަދުހަމް މަގާމުން ވަކި ނުވާނެ ކަމަށާ، އިސްތިއުފާ އަށް ހުށަހަޅާތާ 30 ދުވަސް ވަންދެން އޭނާގެ ވާޖިބުތައް އަދާ ކުރަންޖެހޭ ކަމަށްވެސް އެޗްއާރްސީއެމުން ވޮއިސް އަށް މައުލޫމާތު ދީފައިވެއެވެ. 

މަގާމުގައި ހުންނަވައި، ބޮޑު މުސާރަ ނަންގަވައިގެން މަގާމުގެ މަސްއޫލިއްޔަތުތައް އަދުހަމް އަދާ ނުކުރެއްވިއިރު، އެޗްއާރްސީއެމުން ރާއްޖޭގައި ހިނގަމުންދާ، އެ ކޮމިޝަންގެ ޒިންމާގެ ދަށަށް އަންނަ މައްސަލަތައް ނުބަލާ ކަން އާއްމުންގެ ގިނަބައެއް އަންނަނީ ފާހަގަކުރަމުންނެވެ. 

ޚާއްސަކޮށް މި ރިޔާސީ އިންތިހާބުގެ ތެރޭގައި، ކެންޑިޑޭޓުންގެ ކެންޕެއިން ކުރުމުގެ ހައްގަށް އެރުމާއި، އަދި އިދިކޮޅު ފަރާތްތަކަށް ޝުޢޫރު ފާޅުކުރުމުގެ ފުރުސަތު ނުދީ އެއްވެސް ހައްގަކާއި ނުލައި ހައްޔަރު ކުރަމުންދިޔަ މައްސަލާގައި ގިނަ ބައެއްގެ ނުރުހުން އެ ކޮމިޝަނަށް އަންނަނީ އަމާޒުވަމުންނެވެ.

އެގޮތުގައި އެ ހުރިހާ ކަމެއް ހިނގަމުންދިޔަ އިރު ނިދާފައި އޮތުމަށްފަހު، އެޗްއާރްސީއެމް ދާދިފަހުން ހޭލާފައި ވަނީ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ގެ އަނބިކަނބަލުން ފަޒުނާ އަހުމަދު ހުޔާ ސަރަހައްދަށް ކެންޕެއިނަށް ވަޑައިގެންނެވުމުން އެތަނުގައި ހިނގައި ދިޔަ ކަންކަމަށް ފަހުގައި ކަން ފާހަގަކޮށްލަން ޖެހެއެވެ.