ބްރިޖް އެޅުން ފަދަ ބޮޑެތި މެގަ ޕްރޮޖެކްޓްތައް ކުރިއަށް ގެންދެވޭނީ އެފަދަ ކަންކަން ކުރުމުގެ ގާބިލްކަމާއި ތަޖުރިބާއާއި ތައުލީމް ހުރި މީހަކަށް ކަމަށާ، އެ ބޭފުޅަކީ ޕީޕީއެމް/ޕީއެންސީގެ ރިޔާސީ ކެންޑިޑޭޓް މުހަންމަދު މުޢިއްޒު ކަމަށް ވިލިމާލޭ ދާއިރާގެ މެންބަރު އަހުމަދު އުޝާމް ވިދާޅުވެއްޖެއެވެ.
ތިލަމާލެ ބްރިޖުގެ މަސައްކަތް ކުރިއަށްދާ ގޮތުގެ ފޮޓޯއެއް ހިއްސާ ކުރައްވައި އުޝާމް މިއަދު ކުރެއްވި ޓްވީޓެއްގައި ވިދާޅުވީ، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ގެ ވެރިކަމުގެ ދައުރު ހަމަވާން މިހާރު ބާކީ އޮތީ ދޮޅުމަހެއްހާ ދުވަސް ކަމަށެވެ. އެހެންނަމަވެސް، މި ދައުރުގައި ނިންމާނެ ކަމަށް ބުނި ތިލަމާލެ ބްރިޖް އަދިވެސް ފެނުން މައްޗަށް ނާރާ ކަމަށް އޭނާ ވިދާޅުވި އެވެ.
"ބްރިޖް އެޅުން ފަދަ ބޮޑެތި މެގަ ޕްރޮޖެކްޓްތައް ކުރިއަށް ގެންދެވޭނީ އެފަދަ ކަންކަން ކުރުމުގެ ގާބިލްކަމާއި ތަޖުރިބާއާއި ތައުލީމް ހުރި މީހަކަށް. އެމީހަކީ ޑރ. މުޢިއްޒު" އުޝާމް ވިދާޅުވި އެވެ.
ޖުމްލަ 6.7 ކިލޯމީޓަރުގެ ތިލަމާލެ ބްރިޖްގެ މަސައްކަތާ ހަވާލުވެފައި ވަނީ އިންޑިއާގެ އެފްކޮންސް އިންސްފްރާސްޓްރަކްޗާ ލިމިޓެޑެވެ. ތިލަމާލެ ބްރިޖް އެޅުމުގެ މަސައްކަތް ދެ އަހަރު ދުވަހުގެ ތެރޭ ނިންމާ ގޮތަށް އެފްކޮންސްއާއެކު ސަރުކާރުން ސޮއިކޮށްފައިވަނީ 2021 ވަނަ އަހަރުގެ އޮގަސްޓް 26 ވަނަ ދުވަހު އެވެ. އެހެންނަމަވެސް، މި އަހަރު ނިމޭއިރު ވެސް ބްރިޖު ނުނިމޭނެ ކަމަށް ސަރުކާރުން މައުލޫމާތު ދެއެވެ.
Advertisement
This content is created and paid for by advertisers and does not involve Voice Journalists
