ކުރީގެ ޓޫރިޒަމް މިނިސްޓަރު, އަދި ޖުމްހޫރީ ޕާޓީގެ ލީޑަރު ގާސިމް އިބްރާހިމްގެ ސްޕެޝަލް އެޑްވައިޒަރ ޑރ. މަހުމޫދު ޝައުގީ ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ މުހައްމަދު މުޢިއްޒަށް ތާއިދު ކުރައްވައިފިއެވެ.
މަހުމޫދު ޝައުގީ ޑރ. މުޢިއްޒަށް ތާއީދުކުރައްވާކަން ހާމަކުރައްވައި އޭގެ ސަބަބުތައް ވޮއިސް އާ ހިއްސާ ކުރައްވަމުން ވިދާޅުވީ، އެމަނިކުފާނަށް ތާއީދު ކުރައްވަން ނިންމި ނިންމުމަކީ ވަރަށް ފަސޭހަ ނިންމެވުމެއް ކަމަށާ، މީގެ ގާތްގަނޑަކަށް ހަފްތާއެއްހާ ކުރިން އެ ނިންމުން ނިންމެވި ކަމަށެވެ.
މިއާއެކު ޝައުގީ ވިދާޅުވީ، ޑރ. މުޢިއްޒާއީ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހާއި ދެމެދުން ވަކި ބޭފުޅަކަށް ތާއީދު ކުރައްވަން ނިންމެވުމުގެ ކުރިން ދެ ކަމަކަށް ބެއްލެވި ކަމަށެވެ. އެގޮތުން އޭނާ ގަބޫލު ކުރައްވާ އުސޫލުތަކާއި ސިޔާސަތު ބޮޑަށް ގެންގުޅުއްވަނީ ކޮން ބޭފުޅެއްތޯ ބެއްލެވި ކަމަށެވެ. އަދި ރިޔާސީ އިންތިހާބުގެ ފުރަތަމަ ބުރުގައި ގާސިމާއިއެކު މަސައްކަތް ކުރެއްވި އިރު، އެމަނިކުފާނު ވެސް އެންމެ ބޮޑަށް ދައްވަކަވަމުން ދިޔައީ ރާއްޖޭގެ މިނިވަން ކަމަށް އޮތް ނުރައްކަލާއި ރާއްޖޭގެ ދަރަނީގެ ވާހަކަ ކަން ޝައުގީ ފާހަގަކުރެއްވި އެވެ.
ޝައުގީ ވިދާޅުވީ ދެ ކެންޑިޑޭޓުންގެ ތެރެއިން ގާސިމްގެ ސިޔާސަތާއި ވިސްނުމާއި، އަދި އޭނާގެވެސް ވިސްނުމާއި އެންމެ އެއްގޮތް ކެންޑިޑޭޓެއް ބެއްލެވި ކަމަށާ، އެގޮތުން ބެއްލެވުމަށްފަހު މުޢިއްޒު އިޚްތިޔާރު ކުރެއްވީ ކަމަށެވެ.
މީގެ އިތުރުން ދެން މުޢިއްޒަށް ތާއީދު ކުރައްވަން ނިންމެވި ސަބަބަކީ ވަރަށް ޕާސަނަލް ސަބަބެއް ކަމަށާ، އެގޮތުން ޑރ. މުޢިއްޒަކީ ރަނގަޅަށް ކިޔަވައިގެން ހުންނެވި ޢިލްމީ ގާބިލު ބޭފުޅެއް ކަމަށާ، މީގެ ކުރިންވެސް ސަރުކާރުގެ މަގާމުތައް ފުރުއްވާފައި ހުރި އިރު އެމަނިކުފާނު ވަނީ ނަތީޖާ ނެރެދެއްވާފައި ކަން ޝައުގީ ފަހަގަކުރެއްވިއެވެ.
ހަމަ އެހެން، މުޢިއްޒު އަކީ ދީނީ ގޮތުން ބެލި ނަމަވެސް ރަނގަޅު، އަދި ދިވެހި ވަންތަ ދިރިއުޅުމެއް އުޅުއްްވާ ވަރަށް އަޚްލާގު ރަނގަޅު ބޭފުޅެއްކަން ޝައުގީ ފާހަގަކުރެއްވި އެވެ.
ދިވެހިވަންތަ، ވަތަނީ ލޮތްބެއް ހިތުގައި އޮތް، ދިވެހިރާއްޖެ ވަރަށް ފުރިހަމައަށް ތަމްސީލް ކޮށްދެވޭނެ، އަދި ރާއްޖެއަށް އިތުރު ތަރައްގީ ގެނެސްދެވޭނެ ގާބިލް ބޭފުޅެއްގެ ގޮތުގައި އަޅުގަނޑަށް މުޢިއްޒު ފެންނަނީ. އެހެންވެ އަޅުގަނޑު މުޢިއްޒަށް ތާއީދު ކުރަން.
ޑރ. މަހުމޫދު ޝައުގީ
ރާއްޖޭގެ ޓޫރިޒަމް މިނިސްޓަރުކަން ކުރައްވާފައިވާ ޑރ. ޝައުގީ ޕީއެޗްޑީ ހައްދަވާފައިވާވަނީ ކެނެޑާގެ ޔުނިވާސިޓީ އޮފް ޓޮރޮންޓޯ އިންނެވެ.
ރާއްޖޭގެ ޓޫރިޒަމް މިނިސްޓަރުކަމުގެ އިތުރުން ޑރ. ޝައުގީވަނީ ކުރިން ބައެއް އެހެން މިނިސްޓްރީތަކުގެ މިނިސްޓަރުކަން ވެސް ކޮށްފައެވެ. އެގޮތުން މިނިސްޓަރ އޮފް އެޑިޔުކޭޝަން، އަދި މިނިސްޓަރ އޮފް ހަޔަރ އެޑިޔުކޭޝަންގެ މަގާމް ފުރުއްވާފައިވެއެވެ.
ޑރ. މަޙުމޫދު ޝައުގީއަކީ ރާއްޖޭގެ މަޝްހޫރު އޮގަރު ޢާއިލާއަށް ނިސްބަތްވާ ބޭފުޅެކެވެ. ޑރ މަޙުމޫދު ޝައުގީގެ މަންމާފުޅަކީ އޮގަރު ފާއިޒާއެވެ.
Advertisement
This content is created and paid for by advertisers and does not involve Voice Journalists
