ރައްޔިތުންގެ މަޖިލިހުގެ މައްޗަންގޯޅި ދެކުނު ދާއިރާގެ މެންބަރު އަހުމަދު ހައިތަމް އެމްޑީޕީން ވަކިވެވަޑައިގެންފިއެވެ.

ހައިތަމް އެމްޑީޕީން ވަކިވެވަޑައިގެންނެވި ކަން ހާމަކުރައްވައި އެމްޑީޕީގެ ޗެއާޕާސަން ފައްޔާޒް އިސްމާއިލަށް ފޮނުވި ސިޓީއެއްގައި ވިދާޅުވީ، އެ ޕާޓީއާ އޭނާ ގުޅުނީ ރާއްޖެއަށް ހިދުމަތްކޮށް، ރައްޔިތުންގެ ކިބައިން ނިގުޅައި ގަނެވިފައިވާ އެތަކެއް ހައްގުތަކެއް ހޯދައިދިނުމަށްޓަކައި ފެށި އިންސާފުގެ ދަތުރުގެ ބައިވެރިއެއްގެ ގޮތުން ކަމަށެވެ. އަދި ޕާޓީގައި ހޭދަކުރި މުއްދަތުގައި، ވަފާތެރިކަމާއި އަމާނަތްތެރިކަމާއެކު ރައްޔިތުންގެ ހައްގު ހޯދައި ދިނުމަށް އެތަކެއް މަސައްކަތްތަކެއް މަޖިލީހުގައި ކުރެވިފައިވާނެ ކަންވެސް ފާހަގަކުރައްވާފައިވެއެވެ.

އެގޮތުން އޭނާ މަޖިލީހަށް ހުށަހެޅުއްވި މުހިންމު ހަތަރު މައްސަލައެއްވެސް ފާހަގަކުރެއްވި އެވެ. އޭގެ ތެރޭގައި ހިމެނެނީ؛

1) ގަވާއިދާއި ހިލާފަށް ރާއްޖޭގައި ދިިރިއުޅެމުންދާ ބިދޭސީންގެ މައްސަލައާއައި

2) ކޮވިޑް-19 ގައި ފެންމަތިވި ވެންޓިލޭޓަރު ހިޔާނާތުގެ މައްސަލަ އާއި

3) އެންޑީއޭ އިސްލާހް ކުރުމުގެ މައްސަލަ އާއި،

4) ރާއްޖޭގައި ސިއްހީ ފަރުވާ ލަސްވުމުގެ ސަބަބުން ރައްޔިތުންގެ ފުރާނައަށް ނުރައްކާވެ އަދި ނިޔާވަމުންދާ މައްސަލައެވެ. 

ހައިތަމް ވިދާޅުވީ، މި މައްސަލަތަކަކީ ސީދާ ރައްޔިތުންގެ ހައްގުތަކާއި ގުޅިފައިވާ މުހިންމު ކަންތައްތަކަށް ވާއިރު، އަދި އެމްޑީޕީއަކީ ވެރިކަން ކުރާ ޕާޓީއަށްވެފައި މިކަންކަން އަހަންމިއްޔަތު ކަމެއް ދީގެން އެކަށީގެންވާ ހައްލެއް ހޯދުމަށް އޭނާއަށް ޕާޓީގެ ލީޑާޝިޕުން އެއްބާރުލުމެއް ލިބިފައި ނުވާ ކަމަށެވެ.

"ވުމާއެކު އަޅުގަނޑު ގަބޫލު ކުރެވެނީ މި ޕާޓީއަށްވެސް އަދި އަޅުަގަނޑަށްވެސް އެންމެ ރަނގަޅު ގޮތަކީ، އަޅުގަނޑު ގަބޫލު ކުރެވޭ އުސޫލު ތަކެއްނެތް ޕާޓީއަކުން ވަކިވުމެވެ. ވީމާ އަޅުގަނޑު 26 ސެޕްޓެމްބަރު 2023 ގައި އެމްޑީޕީން ވަކިވެއްޖައީމެވެ." ހައިތަމް ވިދާޅުވި އެވެ. 

ހައިތަމްގެ އިތުރުން މިދިޔަ އޮގަސްޓް މަހުގެ 21 ވަނަ ދުވަހު މަޖިލީހުގެ ފޮނަދޫ ދާއިރާގެ މެމްބަރު މޫސާ ސިރާޖްވެސް ވަނީ އެމްޑީޕީން ވަކިވެވަޑައިގެންފައެވެ. އޭނާ މިހާރު ވަނީ އިދިކޮޅު ޕީޕީއެމްއާ ގުޅިވަޑައިގެންފައެވެ.