މިއަހަރުގެ ރިޔާސީ އިންތިޚާބު ދިވެހި ރައްޔިތުންގެ ތާއީދާއެކު ކާމިޔާބު ކުރެއްވިއްޖެނަމަ އެކުލަވާލައްވާ ސަރުކާރު ވެގެންދާނީ ދިވެހިރައްޔިތުން ފަޙްރުވެރިވާފަދަ ސަރުކާރަކަށް ކަމުގައި ޕީޕީއެމް ޕީއެންސީގެ ރިޔާސީ ކެންޑިޑޭޓް ޑޮކްޓަރ މުހައްމަދު މުއިއްޒު ވިދާޅުވެއްޖެއެވެ. އިންތިޚާބުގެ ފުރަތަމަ ބުރުގައި ކުރި ހޯއްދަވައިގެން ދެވަނަ ބުރަށް ކުރެއްވި ކެމްޕޭންގެ އެންމެ ފަހު ދުވަހު  މިއަދު ކެމްޕޭނުގެ އެންމެ ފަހު ހަރަކާތުގައި ވާހަކަފުޅު ދައްކަވަމުން މުއިއްޒު ވިދާޅުވީ އެމަނިކުފާނު އެކުލަވައިލައްވާ ކެބެނިޓްވެގެންދާނީ ރައްޔިތުން ފަޚްރުވެރިވާފަދަ އިލްމާއި މަސައްކަތްކުރުމުގެ ތަޖުރިބާ ލިބިވަޑައިގެން ތިއްބެވި ބޭފުޅުންގެ ކެބިނެޓަކަށެވެ. އަދި ސަރުކާރުގެ ކުންފުނިތަކާއި އިދާރާތަކަށްވެސް ލައްވަވާނީ އިލްމުގެ ގޮތުން ފުރިހަމަ ގާބިލްކަން ލިބިފައި ތިބި ބަޔެއްކަމަށެވެ. އަދި އެބޭފުޅުންނަށް އެބޭފުޅުންގެ މަސައްކަތުގައި ނިންމުންތައް ނިންމުގެ ފުރިހަމަ އިޚްތިޔާރު ދެއްވަވާނެ ކަމަށްވެސް ވިދާޅުވިއެވެ.

މިއަދުވެސް ޑޮކްޓަރ މުއިއްޒު ޔަގީންކަން ދެއްވީ ސަރުކާރުގެ އެއްވެސް އޮފީހެއްގައި މިސަރުކާރުންވިޔަސް ވަޒީފާދީގެން ވަޒީފާ އަދާކުރާ އެއްވެސް މުވައްޒަފަކު އެއީ ސިޔާސީ މަގާމެއް އަދާކުރާ މީހަކަށް ނުވާނަމަ އެމަނިކުފާނުގެ ސަރުކާރެއްގައި ވަޒީފާއިން ވަކި ނުކުރައްވާނެކަމަށެވެ. އަދި އެއްވެސް ރައްޔިތަކަށް ދޭން ކަނޑައަޅާފައިވާ ގޯއްޗެއްވިޔަސް، ސަރުކާރުން ދެމުންދާ އިނާޔަތެއްވިޔަސް، އަދި ލޯނެއްވިޔަސް އެމަނިކުފާނުގެ ސަރުކާރުން ކަނޑާނުލައްވާނެކަމުގެ ޔަގީންކަން ދެއްވާކަމަށްވެސް ވިދާޅުވިއެވެ.

އިރާދަކުރެއްވިއްޔާ ދެން ދިވެހިރާއްޖެ އަލިވިލޭނީ ދިވެހިން އެދޭ ދިވެހިންގެ ރާއްޖެއަށްކަމަށް ވިދާޅުވިއެވެ.

މާލޭގެ އަމީނީމަގާއި މަޖީދީ މަގުންގޮސް އާޓިފިޝަލް ބީޗަށް ނިންމާލި ކެމްޕޭން ރެލީގައި އާދަޔާއި ޚިލާފަށް އެތައް ހާސްބަޔަކު ބައިވެރިވިއެވެ. ގައުމީ ލަވަޔާއި މިއުޒިކާއެކު މަގުތަކުގައި  ހިނގާފައިދިޔަ ސަޕޯޓަރުންތިބީ ވަރުގަދަ ޖޯޝެއްގައެވެ. އެއްއަޑަކުން އެމީހުން ގޮވަމުންދިޔައީ ވޯޓް ފޯރ މުއިއްޒުއެވެ.