މިހާރު ކުރިއަށް ދާ ރިޔާސީ އިންތިހާބުގެ ދެވަނަ ބުރުގައި އެމަނިކުފާނަށް ކާމިޔާބު ލިބޭނެ ކަމުގެ ޔަގީން ކަން އެބައޮތް ކަމަށް އެމްޑީޕީގެ ރިޔާސީ ކެންޑިޑޭޓް އަދި ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު މިއަދު ވިދާޅުވެއްޖެ އެވެ.
ރިޔާސީ އިންތިހާބުގެ ދެވަނަ ބުރުގައި ވޯޓު ލުމަށް ފަހު، ނޫސްވެރިންނަށް މައުލޫމާތު ދެއްވަމުން ރައީސް ޞާލިހު ވިދާޅުވީ، ފުރަތަަމަ ބުރުގައި ކުރި ހޯއްދަވަން ކުރިމަތިވި އެންމެ ބޮޑު ގޮންޖެހުމަކީ ވޯޓު ލާން ނުކުތް މީހުންގެ އަދަދު މަދުވުން ކަމަށެވެ.
"ކުރީ ފަހަރު ވެސް އަޅުގަނޑުމެންނަށް ކުރިމަތިވި އެންމެ ބޮޑު ގޮންޖެހުމަކީ ވޯޓުލާ މީހުންގެ އަދަދު ދަށަށް ދިއުން. އެކަމަކު އިރާދަކުރެއްވިއްޔާ މިފަހަރު އެ ބަދަލުވަމުން ދާ ތަން ފެނޭ،"
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު
ކުރީ ފަހަރާއި ޚިލާފަށް ރައީސް ލަފާ ކުރައްވާ ގޮތުގައި މިފަހަރު 86 އިންސައްތަ މީހުން ވޯޓު ލާން ނުކުންނާނެއެވެ. އެ އަދަދަށް މީހުން ނުކުމެއްޖެ ނަމަ އެމްޑީޕީއަށް މި އިންތިހާބު ކާމިޔާބު ކުރެވޭނެ ކަމަށް ރައީސް ވިދާޅުވިއެވެ. އަދި 88 އިންސައްތަ މީހުން ވޯޓު ލާން ނުކުމެއްޖެ ނަމަ، މާ ބޮޑު ނަތީޖާއަކުން މޮޅުވާނެ ކަމުގެ ޔަގީން އެބައޮތް ކަމަށް ވިދާޅުވިއެވެ.
މީގެ އިތުރުން އިންތިހާބު ކާމިޔާބު ނުވެއްޖެނަމަ ގައުމު ދޫކުރައްވައި ވަޑައިގެންފާނެތޯ ނޫސްވެރިއަކު މިއަދު ސުވާލު ކުރެއްވިއެވެ. އެ ސުވާލަށް ސީދާ ޖަވާބު ދެއްވުމުގެ ބަދަލުގައި ރައީސް ޔަގީންކަން ދެއްވީ އެމަނިކުފާނަށް އިންތިހާބު ކާމިޔާބު ވާނެ ކަމެވެ.
"އިންތިހާބު ކާމިޔާބުވާތަން އަޅުގަނޑަށް ފެންނަނީ. އެއަކާމެދު [އިންތިހާބު ކާމިޔާބުވުމާ މެދު] ނެތް މައްސަލައެއް،" ނާކާމިޔާބީގައި ރާއްޖެ ދޫކޮށް ވަޑައިގެންފާނެތޯ ކުރި ސުވާލުގެ ޖަވާބުގައި ރައީސް ވިދާޅުވި އެވެ.
ނަމަވެސް އިންތިހާބުން ދެވަނަ ބުރުގައި ކުރި ހޯއްދަވާނީ ކިހާ އަދަދަކުން ކަމެއް ރައީސް ސޯލިހު ވިދާޅެއް ނުވިއެވެ.
Advertisement
This content is created and paid for by advertisers and does not involve Voice Journalists
