ރައްޔިތުންގެ މަޖިލީހުގައި އަންހެނުންގެ ތަމްސީލުވުން އިތުރުކުރުމަށްޓަކައި، މިހާރު ހުރި ގޮންޖެހުންތައް ދެނެގަނެ، އެމީހުންނަށް ޚާއްސަ ފުރުސަތުތަކެއް ދޭން ޖެހޭކަމަށް މަޖިލީހުގެ ނައިބު ރައީސާ އީވާ އަބްދުالله ވިދާޅުވެއްޖެ އެވެ.
އީވާ މިފަދައިން ވިދާޅުވެފައިވަނީ މަޖިލީހުގެ ކޮމްޕޮސިޝަނަށް ބަދަލުގެނައުމަށް މަޖިލީހުގެ ހުޅުދޫ ދާއިރާގެ މެމްބަރު އިލިޔާސް ލަބީބު ހުށައަޅުއްވާފައިވާ، ދިވެހިރާއްޖޭގެ ޖުމްހޫރިއްޔާގެ ޤާނޫނު އަސާސީއަށް އިސްލާހުގެނައުމުގެ ބިލަށް މަޖިލީހުގައި ބަހުސްކުރައްވަމުން ނެވެ.
އީވާ ވިދާޅުވީ ރައްޔިތުންގެ މަޖިލީހަށް ކުރިމަތިލުމުގެ ފުރުސަތު އަންހެނުންނަށް އޮތް ނަމަވެސް ވޭތުވެދިޔަ 15 އަހަރުގައި މަޖިލީހުގައި އަންހެނުންގެ އަދަދަކީ އެންމެ 5 އިންސައްތަ ކަމަށެވެ. އަދި ތިބީ އަބަދުވެސް އެ ތިބޭ އެއްބަޔެއް ކަމަށެވެ.
އެހެންކަމުން މި ދާއިރާއަށް ނިކުތުމުގައި އަންހެނުންނަށް ގޮންޖެހުންތަކެއް އޮތްކަން އެނގޭ ކަމަށާއި، އެ ދަތިތައް ފިލުވާލާ އަންހެނުން މަޖިލީހުގައި ތަމްސީލުކުރުމަށް ގޮނޑިތަކެއް ޚާއްސަކުރުމަކީ މުހިންމު ކަމެއް ކަމަށެވެ.
"ކިތަންމެ ވަރަކަށްވެސް ތިބެވިދާނެ އަންހެނުން ވެސް ހަމަ ގޮނޑި ނަގާލަ ނަގާލަ ތިބީމަ ވީ ނޫންހޭ، އެހެން ކިޔާލަ ކިޔާލަ ތިބެވިދާނެ. އެކަމަކު ޤާނޫނު އަސާސީ އިސްލާހު ކުރީންސުރެ އެންމެ 5 ޕަސެންޓު އަންހެނުން މިތަނަށް މި އިންތިޚާބު ވަނީ. ބަލާލައިފިއްޔާ އަބަދު އެއް އަންހެނުންތަކެއް މި އިންތިޚާބު ވެ ތިބެނީ. އެހެންވީމަ އަންހެނުންނަށް އިންތިޚާބުތަކަށް ކުރިމަތިލުމުގަޔާއި، އަދި އިންތިޚާބީ މަޤާމުތައް ކާމިޔާބުކުރުމުގައި ތާށިތަކެއް އެބަހުރިކަން ވިސްނައިގެން ސްޓެޕްއަޕް އެއް އެބަ ހޯދައިދޭން ޖެހޭ"
މަޖިލީހުގެ ނައިބު ރައީސާ އީވާ އަބްދުالله
އީވާ ވިދާޅުވީ އިންތިޚާބީ މަގާމުތަކާއި ގައުމުތައް ހިންގަން ޖެހެނީ އަންހެނުންގެ އަޑާއި އެކީގައި، އެމީހުން އިސްކޮށް ބައިތިއްބައިގެންކަން މުޅި ދުނިޔެވެސް ގަބޫލުކުރާ ކަމަށެވެ.
އެހެންކަމުން އިލިޔާސް ލަބީބު ހުށައަޅާފައިވާ އެ ބިލަކީ އެ މަޤްސަދު ހާސިލްކުރުމަށް ވަރަށް މުހިންމު ބިލެއް ކަމަށާއި، އެ ބިލަށް ފުރިހަމަޔަށް ތާއީދު ކުރައްވާކަމަށް އީވާ ވިދާޅުވި އެވެ.
Advertisement
This content is created and paid for by advertisers and does not involve Voice Journalists
