ކުރިއަށް މިއޮތް 7 މަސް ދުވަހުގައި އެމްޑީޕީގެ ފުރިހަމަ ކޮންޓްރޯލާއި ބާރު ރައްޔިތުންގެ މަޖިލީހުގައި އޮތުމަށް ބޭނުންވާ ކަމަށް ރައްޔިތުންގެ މަޖިލީހުގެ މަރަދޫ ދާއިރާގެ މެމްބަރު އިބްރާހިމް ޝަރީފް(މަވޯޓާ) ގޮވާލައްވައިފިއެވެ.
ނިޒާމީ ވޯޓާ ގުޅޭ ގޮތުން ގޮތެއް ނިންމަން އެމްޑީޕީގެ ގައުމީ މަޖިލީހުން ރޭ ބޭއްވި ޖަލްސާގައި ވާހަކަ ދައްކަވަމުން މަވޯޓާ ވިދާޅުވީ، އެމްޑީޕީގެ ގައުމީ މަޖިލީހުގެ ހުރިހާ ބޭފުޅުންވެސް ބޭނުންވަނީ ބަރުލަމާނީ ނޫން ގޮތެއް ކަމަށާއި ދެން ބޭނުންވަނީ ރައްޔިތުންގެ މަޖިލީހުގެ ރައީސް މުހައްމަދު ނަޝީދު ނޫން ގޮތެއް ކަމަށެވެ.
އެހެންކަމުން ނިޒާމީ ވޯޓާ ގުޅޭ ގޮތުން ޑިމޮކްރެޓްސްއިން ހުށަހެޅި ގަރާރު ބޭރުކޮށްލުމަށް އިތުރު ގަރާރެއް ހުށަހެޅުމަށް ގޮވާލައްވަމުން ޝަރީފް ވަނީ ޑިމޮކްރެޓްސް ގެ މެންބަރުން ރުއްސުމަށް ދައުލަތުގެ ބަޖެޓުން 45 މިލިއަން ޚަރަދު ކުރަން ބޭނުން ނުވާ ކަމަށް ވިދާޅުވެފައެވެ.
"އަޅުގަނޑުމެން ބޭނުމެއް ނޫން ބޭކާރު ގޮތެއްގައި ހަތް ޕަސެންޓް[ޑިމޮކްރެޓްސް] ރުއްސުމަށްޓަކައި ދިވެހި ދައުލަތުގެ ބަޖެޓުން މިހާ ތަދު ދުވަސްވަރެއްގައި 45 މިލިއަން ރުފިޔާ ހަރަދު ކުރާކަށް. ބޭނުމެއް ނޫން."
މަރަދޫ ދާއިރާގެ މެންބަރު އިބްރާހީމް ޝަރީފް
މިއާއެކު ޝަރީފު ވަނީ ރައްޔިތުންގެ މަޖިލީހުގެ މިދައުރުގެ ބާކީ އޮތް 7 މަސް ދުވަހުގައި މަޖިލީހުގެ ކޮންޓްރޯލް އެމްޑީޕީގެ އަތުގައި ބާއްވަން ބޭނުންވާ ކަން ފާހަގަކުރައްވައި، އެކަމަށްޓަކައި މަޖިލީހުގެ ރައީސް މުހައްމަދު ނަޝީދާއި މަޖިލީހުގެ ނާއިބު ރައީސް އީވާ ރިޔާސަތުން ބޭރުކުރުމަށް އިތުބާރު ނެތް ކަމުގެ ވޯޓެއް އަނެއްކާވެސް ނަގަން ހުށަހަޅުއްވާފައެވެ.
"އަޅުގަނޑުމެން ކުރިއަށް މި އޮތް ހަތް މަސް ދުވަހުގެ ތެރޭގައި އެމްޑީޕީގެ ފުރިހަމަ ކޮންޓްރޯލާއި ބާރު ރައްޔިތުންގެ މަޖިލީހުގައި އޮތުމަށް ބޭނުން"
މަރަދޫ ދާއިރާގެ މެންބަރު އިބްރާހީމް ޝަރީފް
މަވޯޓާ މިފަދައިން ވިދާޅުވެފައި ވާއިރު, މީގެ ކުރިންވެސް އެމްޑީޕީން ވަނީ ނަޝީދާއި އީވާ ރިޔާސަތުން ބޭރު ކުރަން އިތުބާރު ނެތް ކަމުގެ މައްސަލައެއް މަޖިލީހަށް ހުށަހަޅުއްވާފައެވެ. ނަމަވެސް އެ މައްސަލަ އެމްޑީޕީން ވަނީ އަނބުރާ ގެންދަވާފައެވެ.
Advertisement
This content is created and paid for by advertisers and does not involve Voice Journalists
