ވ އާރަށުގެ މުއާމަލާތާއި ގުޅުވާ ރައީސް އަބްދުالله ޔާމީން އަބްދުލްގައްޔޫމުގެ މައްޗަށް އުފުލި ދައިވާތަކަކީ ރިޔާސީ އިންތިޚާބުން އެމަނިކުފާނު އެއްފަރާތްކުރުމަށް އުފެއްދި ދައުވާތަކެއް ކަމަށް، ރައީސް ޔާމީންގެ އިސް ޤާނޫނީ ވަކީލު ޑރ މުހައްމަދު ޖަމީލު އަހުމަދު ވިދާޅުވެއްޖެ އެވެ.
ޑރ ޖަމީލު މިފަދައިން ވިދާޅުވެފައި ވަނީ ރައީސް ޔާމިނުގެ ފަރާތްޕުޅުން ހައިކޯޓުގައި އިސްތިއުނާފުކޮށްފައިވާ އާރަށު މައްސަލައިގެ އިސްތިއުނާފު އަޑުއެހުމެއް އާދިއްތަ ދުވަހަށް ތާވަލުކުރުމަށްފަހު ކެންސަލްކުރުމާއި ގުޅިގެން ގާނޫނީ ވަކީލުންގެ ހުރި ކަންބޮޑުވުންތައް ހާމަކުރައްވާ ވޮއިސް އަށް ދެއްވި އިންޓަވިއުއެއްގަ އެވެ.
ޑރ ޖަމީލު ވިދާޅުވީ އާރަށު މުއާމަލާތާއި ގުޅުވާ ރައީސް ޔާމިނުގެ މައްޗަށް އުފުލާފައިވަނީ ޤާނޫނީ ގޮތުން އެއްވެސް ބުރަދަނެއް ނެތް ދައުވާތަކެއް ކަމަށެވެ. އަދި އެ ދައުވާތަށް ސާބިތުކޮށްދިނުމަށް ދައުލަތަށް އެކަށީގެންވާ ހެއްކެއް ވެސް ދެއްކިފައި ނުވާކަމަށެވެ.
އާރަށު މައްސަލައަކީ ސިޔާސީ ގޮތުން ރައީސް ޔާމީން އެކަހެރިކުރުމަށް އުފަންކުރި މައްސަލައެއް ކަމަށާއި، އެންމެ ބޮޑު މަޤްސަދަކީ ރިޔާސީ އިންތިޚާބުން އެމަނިކުފާނު އެއްފަރާތްކުރުން ކަމަށް ޑރ ޖަމީލު ވިދާޅުވި އެވެ.
"އާރަށު މައްސަލައިގައި ހައިކޯޓުގައި އިސްތިއުނާފުކޮށްފައިވާ މި މައްސަލައަށް ބެއްލެވިކަމަށް ވާނަމަ ތިބޭފުޅުންނަށް ވެސް ރަނގަޅަށް އެނގވަޑައިގަންނަވާނެ، މި މައްސަލަ ބޭނުންކުރެއްވީ މި ސަރުކާރުން، ނިމެމުން މިދާ ސަރުކާރުން ރައީސް ޔާމީން އިންތިޚާބުން އެއްފަރާތްކޮށް މި މައްސަލަ ބޭނުންކޮށްގެން އިންތިޚާބުން އެއްފަރާތްކޮށްގެން ތިމަންނަމެންނަށް އިންތިޚާބުން މޮޅުވެދާނެކަމަށް ބަލައިގެން އެގޮތުގެ މަތިން"
ރައީސް ޔާމީންގެ އިސް ގާނޫނީ ވަކީލު ޑރ ޖަމީލު
ޑރ ޖަމީލު އިތުރަށް ވިދާޅުވީ ރިޔާސީ އިންތިޚާބަށް ފަހުވެސް ރައީސް ޔާމީންގެ އިސްތިއުފާނު ލަސްކުރަމުންދާކަމީ ވަރަށް ހިތާމަކުރައްވާ ކަމެއް ކަމަށެވެ. އަދި އެކަން ކުރުމުގެ ފަހަތުގައި ހުންނެވީ ޕީޖީ ޝަމީމުކަމަށް އެމަނިކުފާނު ތުހުމަތުކުރެއްވި އެވެ.
ޑރ ޖަމީލު ވިދާޅުވީ ރައީސް ޔާމީން ނުހައްގުން ބަންދުގައި ހުންނަ ކޮންމެ ދުވަހަކީ އެމަނިކުފާނު އެތައް ހައްޤުތަކުން މަހުރޫމުވެގެން ހުންނަ ދުވަހެއް ކަމަށާއި، މިއީ ނިޒާމުގެ ތެރެއިން އިންތިޒާމުކުރެވިގެން ވަކި ފަރުދަކަށް ދޭ ވަރަށް ބޮޑު އަނިޔާއެއްކަމަށެވެ.
Advertisement
This content is created and paid for by advertisers and does not involve Voice Journalists
