އިސްލާމްދީނުގެ ހިދާޔަތުގައި ދިވެހިރާއްޖެ ތާއަބަދު ބޭއްވުމަށް އަޒުމް ކަނޑައަޅަން ޖެހޭކަމަށް ކުރީގެ އިސްލާމިކް މިނިސްޓަރު ޑރ މުހައްމަދު ޝަހީމް އަލީ ސައީދު ވިދާޅުވެއްޖެ އެވެ. 

ޑރ ޝަހީމް މިފަދައިން ވިދާޅުވެފައިވަނީ ރާއްޖެ އިސްލާމްވީ ދުވަހުގެ މުނާސަބާގައި ކުރެއްވި ޓްވީޓެއްގަ އެވެ. 

ޑރ ޝަހީމް ވިދާޅުވީ ރާއްޖެ އިސްލާމްވީ ދުވަސްކަމަށް ތާރީހީގޮތުން ކަނޑައެޅިފައިވާ ދުވަހުން އެ ހަނދާންކޮށްދެނީ ވަރަށް ގިނަ ވާހަކަތަކެއް ކަމަށެވެ.

ދައުލަތުގެ މިނިވަންކަމާއި ސިޔާދަތާއި އެއްބައިވަންތަކަމުގެ އަސާސަކީވެސް އިސްލާމްދީން ކަމަށާއި، އިސްލާމްދީނުގެ ހިދާޔަތުގައި ދިވެހިރާއްޖެ ބޭއްވުމަށް ދިވެހީން އަޒުމްކަނޑައެޅުމަށް ޑރ ޝަހީމް ވަނީ އެދިލައްވާފަ އެވެ. 

ތާރީޚުގެ ފަތްފުއްތަކުން އެނގެން އޮތް ގޮތުގައި ރާއްޖެ އިސްލާމްވީ ހިޖުރައިން 548 ވަނަ އަހަރުގެ ރަބީޢުލް އާޚިރު މަހުގެ 2ވަނަ ދުވަހުއެވެ.

އެއީ މީލާދީން 1153 ވަނަ އަހަރުގެ ޖޫން މަހުގެ ތެރޭގައެވެ. ރާއްޖޭގައި މީހުން ވަޒަންވެރިވެގެން އުޅެންފެށީއްސުރެ އަޅުކަން ކުރަމުންއައި އެހެން ދީންތައް ދޫކޮށްލާ ދިވެހި ދައުލަތުން ރަސްމީކޮށް އިސްލާމް ދީން ޤަބޫލުކުރީ ވެސް އެދުވަހު ކަމަށް ތާރީޚުން ހެކިދެއެވެ.

ތާރީޚުން އެނގޭ ގޮތުގައި ރާއްޖެ އިސްލާމްވީ މަޣުރިބުކަރައިގެ އިލްމުވެރިއެއް ކަމުގައިވާ އަބުލްބަރަކާތު ޔޫސުފުލް ބަރުބަރީގެ އަތްޕުޅުމައްޗަށެވެ.

އޭރު ރާއްޖޭގެ ރަސްކަމުގައި އިންނެވީ ސްރީތިރިބުވަނަ އާދީއްތިޔަ މަހާރަދުންނެެވެ. މި ރަސްގެފާނު އިސްލާމްވެ ވަޑައިގަތުމުން ނަންފުޅަކަށް ވީ އައްސުލްޠާން މުހައްމަދު ބުނި ޢަބްދިﷲ ސިރީބަވަނާދީއްތަ މަހާރަދުންނަށެވެ. މި ރަދުންނަށް ދިވެހިން ވަނީ ދަރުމަވަންތަ މަހާރަދުންގެ ނަންފުޅުން ނަންދީފައެވެ.