17 ނޮވެމްބަރު 2023 ގައި ޤާއިމުވާ ޕީޕީއެމް-ޕީއެންސީ އަދި ގުޅިފައިވާ ޕާޓީތައް ބައިވެރިވާ ސަރުކާރުވާނީ، އިސްލާމްދީނާ ދިވެހީންގެ ޤައުމިއްޔަތަށް އެންމެ އިސްކަންދޭ ވެރިކަމަކަށް ކަމަށް އިންތިޚާބީ ރައީސް ޑރ މުހައްމަދު މުއިއްޒު ވިދާޅުވެއްޖެއެވެ. 

ރާއްޖެ އިސްލާމްވީ ދުވަހުގެ މުނާސަބާގައި އިންތިޚާބީ ރައީސުލްޖުމްހޫރިއްޔާ ނެރުއްވި ނޫސް ބަޔާނެއްގައި ވަނީ ދިވެހިރާއްޖެ އިސްލާމްވީތާ 897 އަހަރު ފުރޭ މުނާސަބާގައި، ތަހުނިޔާއާއި މުބާރަކްބާދު ދިވެހި ރައްޔިތުންނަށް އަރިސްކުރައްވައި، އިސްލާމްދީނުގެ މަތިވެރި ޢަޤީދާއާ ތެދުމަގުގައި ދިވެހި އުންމަތް ތާއަބަދަށް ލެހެއްޓެވުން އެދި ދުޢާ ދަންނަވާފައެވެ. 

އިންތިޚާބީ ރައީސް ވިދާޅުވީ، އިސްލާމްދީން މަތީ ދިވެހީން ފައިތިލަ ސާބިތުކުރިތާ ހިޖުރީގޮތުން 9 ޤަރުނު ފުރިހަމަވާން ބާކީ އޮތީ 3 އަހަރުކަމަށް ވާއިރު، މި ޤައުމަށް އެންމެ ހެޔޮ ބަދަލެއް ގެނުވި ތާރީޚީ ހާދިސާއަކީ ރާއްޖެ އިސްލާމްވުން ކަމަށެވެ. އަދި ދިވެހީންގެ މިނިވަންކަމާ، ރިވެތި އާދަކާދަތަކާ، މުއްސަނދި ޘަޤާފަތާ، އެއްބައިވަންތަކަމުގެ ހަގީގީ ނާރެހަކީވެސް މާތްވެގެންވާ އިސްލާމްދީން ކަމަށެވެ. 

މިއާއެކު އިންތިހާބީ ރައީސްގެ ބަޔާނުގައި ވިދާޅުވީ، ވޭތުވެ މިދިޔަ ދިގު މާޒީގައި ސައްތައިން ސައްތަ މުސްލިމް ޤައުމެއްގެ ގޮތުގައި ދެމިތިބި ކަމީ މުޅި ދުނިޔެއަށް ނަމޫނާއެއް ކަމަށާ، މިއަދުގެ ދުނިޔޭގައި، ފިކުރީގޮތުންނާ، އިޤްތިޞާދީގޮތުންނާ، އަދި އިސްތިރާތީޖީގޮތުންވެސް ތަފާތު އެކި ގޮންޖެހުންތައް ހުރިކަމަށެވެ. ނަމަވެސް އެއިން ކޮންމެ ގޮންޖެހުމަކާވެސް ދިވެހި ޤައުމު އިސްކޮށްގެން، ދިވެހީންގެ މަޞްލަޙަތު ކުރިއަށް ނެރެގެން ކުރިމަތިލުމަކީ ދިވެހި ރައްޔިތުން އެދޭގޮތް ކަމަށް ވިދާޅުވެފައިވެއެވެ. 

އިންތިހާބީ ރައީސްގޭ ބަޔާން ނިންމަވާ ލައްވަމުން ވަނީ، އިސްލާމްދީނާ ދިވެހިވަންތަކަމުގެ ޙައްޤުގައި ދިވެހި ރައްޔިތުން ގުޅިގެން ކުރާ މަސައްކަތުގައި މާތް الله ބަރަކާތް ލައްވައި، ދިވެހީންގެ ހިތްތައް އިސްލާމީ ހިދާޔަތުގެ މަތީގައި އަބަދުމެ ލަހައްޓަވާ، މި ދިވެހި ފަސްގަނޑަށް ނިސްބަތްވާ ކޮންމެ ދިވެހި ދަރިއަކީ އިސްލާމްދީނަށް ލޯބިކުރާ، ޤައުމު އިސް ކުރާ، ތެދުވެރި، އަމާނާތްތެރި، ޚުލްޤުހެޔޮ މުޥާޠިނެއްކަމުގައި ލެއްވުމަށް ދުޢާކުރައްވާފައެވެ.