ރައްޔިތުންގެ މަޖިލީހުގެ މެންބަރުންގެ ކާރުކޮޅު ވެލާނާ އިންޓަނޭޝަނަލް އެއާޕޯޓުގެ ވީއައިޕީ ލައުންޖުގެ ދޮރުމައްޗާ ހަމައަށް ވެއްދުމުގައި ދަތިތަކާ ކުރިމަތިލާންޖެހޭތީ މެންބަރުން ޝަކުވާ ކުރައްވައިފި އެވެ.

މަޖިލީހުގެ އާންމު ކޮމެޓީން އިއްޔެ ބޭއްވި ބައްދަލުވުމުގައި މެންބަރުންގެ ކަންކަން ބަލަހައްޓާ "މެމްބަ ސާވިސް އެންޑް ޕްރޮޓޮކޯލް"ގެ އިސްވެރިންނާ އެކު އެ މައްސަލަ ހައްލު ކުރެވޭނެ ގޮތް ތަކާއި ގުޅޭގޮތުން ވަނީ މަޝްވަރާ ކޮށްފައެވެ. 

އެ ބައްދަލުވުމުގައި މަޖިލީހުގެ އެސިސްޓެންޓް ސެކެޓްރީ ޖެނެރަލް މުހައްމަދު ރަޝީދު ވަނީ މ މެމްބަރުންގެ ކާރުކޮޅު އެއާޕޯޓަށް ވެއްދެވުމުގައި ދަތިތައް ދިމާވާ ކަމުގެ ޝަކުވާ ލިބޭ ކަން ފާހަގަކުރައްވައި އެ މައްސަލަ ހައްލުކުރުމަށް އެމްއޭސީއެލް އާއި ފުލުހުންނާ އެކު ވެސް މަޝްވަރާކުރަން ޖެހޭ ކަމަށް ވިދާޅުވެފަ އެވެ.

Advertisement

އެގޮތުން، ޕާކިންނަށް ހާއްސަ ގޮތްތަކެއް މެންބަރުންނަށް ހަމަޖެހިފައި އޮތުން މުހިންމު ކަން އޭނާ ފާހަގަކުރެއްވިއެވެ. އަދި އެކަމަށްޓަކައި އެއާޕޯޓުގެ ޕާކިން ސަރަހައްދުގައި ޕާކް ކުރެވޭނެ ކަހަލަ ހާއްސަ ސްޓިކާއެއް ހަމަޖައްސައިދީ، މެމްބަރުންގެ "ޕިކް-އަޕް އާއި ޑްރޮޕް-އޮފް" ވަގުތުގައި ކާރަށް ފަސޭހައިން ލައުންޖަށް އެކްސެސްވޭނެ އިންތިޒާމެއް ހަމަޖެއްސުމަށް އޭނާ ވަނީ ހުށަހަޅުއްވާފައެވެ. 

"ހަމަ އެއާ އެކީގައި ޕާކިން ސެކިއުރިޓީއާ ނޫނީ ޕާކިންނަށް ހާއްސަ ގޮތްތަކެއް ވެސް އެ ބޭފުޅުންނަށް އެތަނުގައި ހަމަޖެހިފައި އޮތުން މުހިންމު ކަމަށް އަޅުގަނޑަށް ފެންނަނީ. އެއީ މިސާލަކަށް އެހެން ބޭބޭފުޅުންގެ (މެމްބަރުން ނޫން ސަރުކާރުގެ އިސްވެރިންގެ) ކާރުތަކަށް އެކްސެސްއަށް ވަދެވޭ ފަސޭހައިން. (ނަމަވެސް) މެންބަރުން ވަޑައިގަންނަވާ ކަމުގައި ވަންޏާ އެ މެންބަރަށް އެއަށް ވުރެ ދަތިވާ ގޮތަށް ކަންތައްތައް އިންތިޒާމު ކުރެވިފައި އޮންނަނީ." ރަޝީދު ވިދާޅުވި އެވެ. 

ރަޝީދުގެ އެ ޚިޔާލަށް އާއްމު ކޮމެޓީގެ ބައެއް މެންބަރުން ވަނީ ތާއީދު ކޮށްފައެވެ. އެހެންކަމުން އެކަމާއި ގުޅޭ މައުލޫމާތު މަޖިލީހުގެ އިދާރާއިން އެމްއޭސީއެލް އާއި ފުލުހުންނާ ހިއްސާކުރުމަށް އިއްޔެ ވަނީ ނިންމާފައެވެ.