މި ފަހުގެ ތާރީހުގައި ދިވެހިރާއްޖޭގެ އެއްވެސް ވެރިއަކަށް ނުލިބޭ އަނިޔާ އެމްޑީޕީގެ މި ސަރުކާރުން ވާދަވެރި ސިޔާސީ ލީޑަރު އަދި ޕީޕީއެމްގެ ރައީސް ޔާމީން އަބްދުލްގައްޔޫމަށް ދީފައިވާކަމަށް އެމަނިކުފާނުގެ އިސް ގާނޫނީ ވަކީލު ޑރ މުހައްމަދު ޖަމީލު އަހުމަދު ވިދާޅުވެއްޖެ އެވެ. 

އެމަނިކުފާނު މިފަދައިން ވިދާޅުވެފައި ވަނީ ޕީޕީއެމަށް 12 އަހަރު ފުރިގެންދާއިރު، ޕާޓީގެ ރައީސްގެ މައްޗަށް ހުކުމެއްކޮށް އެމަނިކުފާނު ސިޔާސީ މއިދާނުން އެއްފަރާތްކޮށްފައި ހުންނަ ހުރުމާއި ގުޅޭގޮތުން ކަންބޮޑުވުން ފާޅުކުރައްވާފަ ފޭސްބުކުގައި ލިޔުއްވި ޕޯސްޓެއްގަ އެވެ. 

ޑރ ޖަމީލު ވިދާޅުވީ ރައީސް ޔާމީން ޖަލުގައި ހުންނަވަނީ ރައްޔިތުންގެ ހައްގުގައި ކަމަށެވެ. އަދި އެމަނިކުފާނު ޖަލުގައި ހުންނަވާ އިބްރާހިމް މުހައްމަދު ޞާލިހުގެ ވެރިކަން ބަދަލުކުރައްވާފައިވާއިރު، އަދިވެސް އެމަނިކުފާނުގެ އިސްތިއުނާފަށް ސަރުކާރުން ހުރަސްއަޅަމުންދާކަން ޑރ ޖަމީލް ފާހަގަކުރެއްވި އެވެ. 

އެއާއެކު ޑރ ޖަމީލު ވިދާޅުވީ ރައީސް ޔާމިނުގެ އިސްތިއުނާފަށް ހުރަސްއެޅުމަކީ ރާއްޖޭގައި މިހާރު އޮތް އަދުލު އިންސާފުގެ ނިޒާމައި ދޭތެރޭގައި ގިނަ ސުވާލުތަކެއް އުފެދޭ ކަމެއް ކަމަށެވެ. އަދި ލަސް ނިޔާއަކީ ނިޔާ ނުލިބުމާއި އެއްފަދަ ކަމެއްކަމަށް ޑރ ޖަމީލު ވިދާޅުވި އެވެ. 

ވ އާރަށުގެ މުއާމަލާތާއި ގުޅުވާ ރައީސް ޔާމިނުގެ މައްޗަށް ދައުލަތުން އުފުލާފައިވާ ދައުވާތައް ސާބިތުވާކަމަށް ކަނޑައަޅާ އެމަނިކުފާނުގެ މައްޗަށް ކުރި ހުކުމް ހައިކޯޓުގައި އިސްތިއުނާފުކޮށްފައިވާއިރު، އެ މައްސަލަ ނުނިންމާ ދިގުދަންމަމުންދާކަން ގާނޫނީ ވަކީލުން ދަނީ ފާހަގަކުރައްވަމުން ނެވެ. 

އެގޮތުން އެ މައްސަލަ ހައިކޯޓުގައި އިސްތިއުނާފުކުރިތާ 8 މަސް ވެގެންދާއިރު، އަދިވެސް މައްސަލަ ނިންމާފައެއް ނުވެއެވެ. އެ މައްސަލައިގެ އަޑުއެހުންތައް ނިމުމަކާއި ހަމަޔަށް ގޮސްފައިވަނިކޮށް މިފަހުން މަޑުޖެހިގެން ދިޔައީ މައްސަލަ ބައްލަވާ ފަނޑިޔާރުންގެ ބެންޗުގެ ދެބޭފުޅުން ޗުއްޓީއަށް ވަޑައިގަތުމާއި ގުޅިގެން ނެވެ. 

އެފަހުން ދެން އެ މައްސަލައިގެ އަޑުއެހުމެއް އޮންނާނެ ދުވަހެއް އަދި ހައި ކޯޓުން ހާމަކޮށްފައެއް ނުވެއެވެ.