ވެރިކަމަށް ހުވާކުރާތާ ފުރަތަމަ ދެތިން މަސްތެރޭ ފުށިދިއްގަރުފަޅު މަޝްރޫއުގެ އަމަލީ މަސައްކަތް ފައްޓަވާނެކަމަށް އިންތިޚާބީ ރައީސް ޑރ މުހައްމަދު މުއިއްޒު ވިދާޅުވެއްޖެ އެވެ. 

ޑރ މުއިއްޒު މިފަދައިން ވިދާޅުވެފައި ވަނީ ހުޅުމާލޭގެ ދެވަނަ ފިޔަވަހީގައި ދިރިއުޅޭ ރައްޔިތުންނާއި މުޚާތަބުކުރައްވާ ވާހަކަދައްކަވަމުން ނެވެ.

އެމަނިކުފާނުގެ ވާހަކަފުޅުގައި ވަނީ އެމަނިކުފާނުގެ ސަރުކާރުން މާލެ ސަރަހައްދުގައި ދިރިއުޅޭ ރައްޔިތުންނަށް ދިމާވެފައިވާ ބޯހިޔާވަހިކަމުގެ މައްސަލަ ޙައްލުކުރުމަށް އެކުލަވާލާފައިވާ ފުށިދިއްގަރުފަޅު ޕްލޭނަށް އަލިއަޅުވާލައްވާފަ އެވެ. 

Advertisement

އެގޮތުން އެމަނިކުފާނު ވިދާޅުވީ ފުށިދިއްގަރުފަޅު ހިއްކައިގެން މާލެ ސަރަހައްދުގައި ދިރިއުޅޭ 65000 މީހުން ބޯހިޔާވަހިކަން ފޯރުކޮށްދެވޭނެ ކަމަށެވެ.

އެ މަސައްކަތަކީ އެމަނިކުފާނުގެ ވެރިކަމުގައި ޚާއްސަ އިސްކަމެއް ދީގެން ކުރައްވާނެ މަސައްކަތެއް ކަމަށާއި، ވެރިކަމަށް ހުވާކުރައްވާތާ ދެތިން މަސް ސުވަހުގެ ތެރޭގައި ފުށިދިއްގަރުފަޅު މަޝްރޫއުގެ އަމަލީ މަސައްކަތް ފަށައި ފުރަތަމަ އަހަރު ދުވަހުގެ ތެރޭގައި ބިން ހިއްކާ ނިންމާނެކަމަށް ޑރ މުއިއްޒު ވިދާޅުވި އެވެ. 

ފުށިދިއްގަރުފަޅުގެ މަޝްރޫއަކީ އެ ފަޅުން 1282 ހެކްޓަރުގެ ބިން ހިއްކައިގެން ކުރިއަށް ގެންދާ މަޝްރޫއެކެވެ. އެއީ ހުޅުމާލެ ދެ ފިޔަވަހި އެއްކޮށްލީމަ ވާ ވަރަށްވުރެ ތިން ގުނަ ބޮޑު ސަރަހައްދަކެވެ. 

އެ ބިން ހިއްކުމަށްފަހު ރިވެޓްމަންޓުޖަހާ ސޭފް އައިލެންޑެއްގެ ގޮތުގައި ރައްކާތެރިކުރެވި ބޯހިޔާވަހިކަމުގެ މަޝްރޫއުތައް އެތަނުގައި ފައްޓަވާދެއްވާނެ ކަމަށް އިންތިޚާބީ ރައީސް ޑރ މުއިއްޒު ވަނީ ވިދާޅުވެފަ އެވެ. 

އޭގެ އިތުރުން ރާއްޖޭގެ އެކި ހިސާބުތަކަށް ދިމާވެފައިވާ ބޯހިޔާވަހިކަމުގެ މައްސަލަ ޙައްލުކުރުމަށް ވެސް ސަރުކާރުގެ ސިޔާސަތުގެ ތެރެއިން މަޝްރޫއުތައް ކުރިއަށް ގެންދަވާނެކަމަށް ޑރ މުއިއްޒު ވަނީ ވިދާޅުވެފަ އެވެ.