ރައްޔިތުންގެ މަޖިލީހުގެ ރިޔާސަތުން މުހައްމަދު ނަޝީދު ވަކިކުރެވޭނެ ގޮތެއް ހޯދުމަށް އެމްޑީޕީގެ ޕާލަމެންޓްރީ ގުރޫޕުން ސުޕްރިމް ކޯޓުގެ ލަފާ ހޯދަން ނިންމައިފި އެވެ.
ރައްޔިތުންގެ މަޖިލީހުގެ ރައީސްގެ އިތުބާރު ނެތްކަމުގެ މައްސަލަ މިއަދަށް ތާވަލުކުރި ޖަލްސާގައި ކުރިއަށް ގެންދިއުމަށް ނިންމާފައިވީ ނަމަވެސް، މަޖިލީހުގެ ނައިބު ރައީސާ އީވާ އަބްދުالله އާލާސްކަންފުޅާ އުޅުއްވާތީ މަޖިލީހަށް ހާޒިރުވެވަޑައި ނުގަނެވުމުގެ ސަބަބުން ވަނީ މާދަމާއަށް ތާވަލުކޮށްފަ އެވެ.
އާލާސްކަންފުޅާއި އުޅުއްވާތީ މަޖިލީހުގެ ނައިބު ރައީސް ސަލާން ވިދާޅުވެފައިވާއިރު، މިއަދުގެ ޖަލްސާ ކުރިއަށް ނުގެންދެވިއްޖެ ނަމަ ނަޝީދުގެ އިތުބާރު ނެތްކަމުގެ މައްސަލަ ކުރިއަށް ގެންދިއުމަށް ކޯޓު އަމުރެއް ހޯދަން ސުޕްރިމް ކޯޓަށް މައްސަލަ ހުށައެޅުމަށް އެމްޑީޕީގެ ޕާލަމެންޓްރީ ގުރޫޕުން ނިންމާފައިވާކަމަށް މަޖިލީހުގެ އަލިފުށީ ދާއިރާގެ މެމްބަރު މުހައްމަދު ރަޝީދު ހުސެއިން ވަނީ ވިދާޅުވެފަ އެވެ.
މިހާރު ސުޕްރިމްކޯޓަށް ދިއުމަށް ވާންޖެހޭ ތައްޔާރީތައް ވަމުންދާ ކަމަށާއި، މެންދުރުކުރިން އެ މައްސަލަ ސުޕްރިމް ކޯޓަށް ހުށައެޅޭތީ މަސައްކަތްކުރައްވާކަމަށް އެމްޑީޕީ ޕާލަމެންޓްރީ ގުރޫޕުން ވަނީ ބުނެފައެވެ.
އެމްޑީޕީގެ ޕާލަމެންޓްރީ ގުރޫޕުން ތުހުމަތު ކުރާގޮތުގައި ނަޝީދުގެ އިތުބާރު ނެތްކަމުގެ މައްސަލަ ކުރިއަށް ނުގެންދިއުމަށް މަސައްކަތް ކުރަމުންދަނީ މަޖިލީހުގެ ރައީސްއާއި ނައިބުރައީސްގެ ރޭވުމެއްގެ ތެރެއިންނެވެ.
މަޖިލީހުގެ ނައިބު ރައީސާ އާލާސްކަންފުޅެއްގައި އުޅުއްވާތީ މަޖިލީހަށް ހާޒިރުވެވަޑައި ނުގެންނެވޭނެކަމަށް އަންގާ ސަލާން ފނުވާފައިވާއިރު އެ ކަމަނާއަށް ވަނީ ޑެންގޫ ހުން ޖެހިފައިކަމަށް ދަ ޑިމޮކްރެޓސްގެ ބައެއް މުއައްސިސުން ވަނީ ހާމަކުރައްވާފަ އެވެ.
މަޖިލީހުގެ ރައީސްގެ އިތުބާރު ނެތްކަމުގެ މައްސަލައިގެ ގަރާރަކީ އެ މައްސަލައިގެ ނޯޓިސް މުއްދަތު ހަމަވުމަށްފަހު އެންމެ އަވަހަށް އޮންނަ ބަންދު ނޫން ދުވަހެއްގައި ކުރިއަށް ގެންދަން ޖެހޭ މައްސަލައަކަށް ވާތީ މާދަމާގައި އޮންނަ ރައްޔިތުންގެ މަޖިލީހުގެ ޖަލްސާއަށް ވެސް އެ މައްސަލަ އެޖެންޑާކޮށް، އެ ޖަލްސާގެ ރިޔާސަތު ބަލެހެއްޓުމަށް މަޖިލީހުގެ ނައިބު ރައީސަށް އަންގަވާނެކަމަށް އަމީންއާންމު ވިދާޅުވި އެވެ.
Advertisement
This content is created and paid for by advertisers and does not involve Voice Journalists
