މިއަދުގެ ރައްޔިތުންގެ މަޖިލީހުގެ ޖަލްސާ ކުރިއަށް ނުގެންދެވޭނެކަން އެންގެވުމާއެކު، މަޖިލީހުގެ މެޖޯރިޓީ ޕާޓީ, މޯލްޑިވިއަން ޑިމޮކްރަޓިކް ޕާޓީގެ މެންބަރުންގެ ފަރާތުން ފެނިގެން ދިޔައީ ވަރަށް ނާތަހުޒީބު ޢަމަލުތަކެއް ކަމަށްބުނެ، އެ ޢަމަލުތައް މަޖިލީހުގެ މައިނޯރިޓީ ޕާޓީ، ޑިމޮކްރެޓްސް އިން ކުށްވެރިކޮށްފި އެވެ. 

ރައްޔިތުންގެ މަޖުލީހުގެ މިއަދުގެ ޖަލްސާގައި މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތް ކަމުގެ މައްސަލަ އެޖެންޑާ ކޮށްފައި ވީ ނަމަވެސް، މަޖިލީހުގެ ނާއިބު ރައީސާ، އީވާ އަބްދުالله ސަލާމުގައި ހުންނެވުމުން މައްސަލަ ކުރިއަށް ގެންދެވެން ނެތް ކަމަށް އަމީން އާއްމު ފާތިމަތު ނިޔުޝާ ވަނީ އިއުލާން ކުރައްވާފައެވެ. 

އެއާއެކު އެމްޑީޕީ މެންބަރުން މަޖިލީހުގެ ތަޅުމުގައި އިހްތިޖާޖު ކުރައްވަން ވަނީ ފަށްޓަވާފައެވެ. އަދި އެ އިހްތިޖާޖުގެ ތެރެއިން މަޖިލީހުގެ އިދާރީ މޭޒުކޮޅުގެ ކުރިމައްޗަށް އައިސް، އަޑު ގަދަ ކުރައްވައި، މަޖިލީހުގެ ކައުންސެލް ޖެނެރަލް ފާޠިމަތު ފިލްޒާ ބޭނުންކުރައްވާ ކޮމްޕިއުޓާ ސިސްޓަމް ވައްޓާލައި ފިލްޒާގެ މޯބައިލް ފޯނަށްވެސް ވަނީ ގެއްލުންދީފައެވެ.

މީގެ އިތުރުން، މަރަދޫ ދާއިރާގެ މެންބަރު އިބްރާހިމް ޝަރީފް ވަނީ ނިއުޝާ އާއި ފިލްޒާއާ ދިމާލަށް އަޑުގަދަކޮށް ބޭއަދަބީ ބަސްތައް ބޭނުންކޮށްފަ އެވެ. އަދި އިދާރީ މޭޒުގެ ކައިރީގައި ނުރުހުން ފާޅުކުރެއްވުމަށް ފަހު ޝަރީފް ވަނީ މަޖިލީހުގެ ރިޔާސަތަށް އަރާވަޑައިގެން ވެސް އަޑުގަދަކުރައްވާފަ އެވެ.

އެމްޑީޕީ މެންބަރުންގެ އެ ޢަމަލުތައް ކުށްވެރިކޮށް، ޑިމޮކްރެޓްސް އިން ނެރުނު ބަޔާނެއްގައި ވަނީ އެ އަމަލު ތަކަކީ ވަރަށް ނާތަހުޒީބު ޢަމަލުތަކެއްގެ ގޮތުގައި ސިފަކޮށް އެފަދައިން ކަން ނުކުރުމަށް ގޮވާލާފައެވެ. އަދި އެ އަމަލުތަކުގައި ޖިނާއީ ކުށެއް އެކުލެވޭ ނަމަ، އެކަންކަން ކަމާބެހޭ އެިދާރާ ތަކުން ބެލުމަށްވެސް ޑިމޮކްރެޓްސް އިން ވަނީ ގޮވާލާފައެވެ. 

އެމްޑީޕީ މެންބަރުންގެ ފަރާތުން މިއަދު ފެށިގެން ދިޔަ ދަށުދަރަޖައިގެ ޢަމަލު ތަކާއި ގުޅިގެން ގިނަ ބައެއްގެ ފާޑުކިޔުންތައް އެ ޕާޓީއަށް އަންނަނީ އަމާޒުވަމުންނެވެ.