ދިވެހިރާއްޖޭގެ އިޤްތިޞާދު މިހާރު އޮތް ހާލަތުން ނަގާ ކޮޅަށް ޖެހުމަށް ދިވެހިރާއްޖޭގެ މައި އެއާޕޯޓު "ވެލާނާ އިންޓަނޭޝަނަލް އެއާޕޯޓު" ގެ ކެޕޭސިޓީ އިތުކޮށް ޒަމާނީ ފެންވަރަށް ތަރައްގީކުރުމަށް ފަޝާފައިވާ ބިޔަ މަޝްރޫއު ވީ އެންމެ އަވަހަކަށް ނިންމަން ޖެހޭކަމަށް އިންތިޚާބީ ރައީސް ޑރ މުހައްމަދު މުއިއްޒު ވިދާޅުވެއްޖެ އެވެ. 

އެމަނިކުފާނު މިފަދައިން ވިދާޅުވެފައި ވަނީ މޯލްޑިވްސް ނޭޝަނަލް އެސޯސިއޭޝަން އޮފް ކޮންސްޓްރަކްޝަން އިންޑަސްޓްރީ (މަސީ)ގެ ފަރާތުން ބޭއްވި ޖަލްސާއެއްގައި ވާހަކަދައްކަވަމުން ނެވެ. 

އެމަނިކުފާނު ވިދާޅުވީ އިންތިގާލީ މަރުހަލާގެ ތެރޭގައި ލިބުނު މައުލޫމާތުތަކަށް ބަލާއިރު އެއާޕޯޓު ތަރައްގީ ކުރުމުގެ މަޝްރޫއު ކުރިއަށް އޮތް އަހަރުގައި ވެސް ނިންމުމަށް ޕްލޭން ކުރެވިފައި ނުވާކަމަށެވެ.

އެހެން ނަމަވެސް، އެ މަޝްރޫއު އަހަރެއް ދެ އަހަރަކަށް ދިގުދަންމާލުމަކީ ރާއްޖޭގެ އިޤްތިޞާދީ ހާލަތު މިހާރު އޮތް ނާޒުކު ފައްތަރަށް ބަލައި ކުރެވޭނެ ކަމެއް ނޫން ކަމަށާއި އެ މަޝްރޫއު ވީ އެންމެ އަހަކަށް ނިންމުން މުހިންމުކަމުގައި ދެކިވަޑައިގަންނަވާކަމަށް ޑރ މުއިއްޒު ވިދާޅުވި އެވެ. 

ޑރ މުއިއްޒު ވިދާޅުވީ އެއާޕޯޓުގެ މަސައްކަތް އަވަސްކުރުމަށް އިންތިގާލީ މަރުހަލާގެ ތެރޭގައި ވެސް މަސައްކަތްތައް ފައްޓަވާފައިވާ ކަމަށެވެ. 

ރައީސް ޔާމިނުގެ ޒައާމަތުގައި ފެއްޓެވި އެއާޕޯޓު އެކްސްޕެންޝަން ޕްރޮޖެކްޓަކީ އެއާޕޯޓުގެ ގާބިލުކަން އެތައް ގުނައަކަށް އިތުރުކޮށް، ތަފާތު ޚިދުމަތްތަކެއް ދެވޭނެގޮތަށް އެއާޕޯޓުގެ ގާބިލްކަން އިތުރުކުރުމަށް ފެށި މަޝްރޫއެކެވެ. 

އެގޮތުން އެއާޕޯޓު ތަރައްގީކުރުމުގެ މަޝްރޫއު ނިމޭއިރު އަހަރަކު 7.5 މިލިއަން ފަތުރުވެރިންނަށް ޚިދުމަތް ދެވޭވަރަށް ކެޕޭސިޓީ އިތުރުކުރެވިގެންދާނެ އެވެ. އަދި ހަމަ އެއާއެކު ވައިގެ މަގުން ރާއްޖެއަށް އެތެރެކުރާ މުދަލާއި ރާއްޖެއިން ބޭރަށް ފޮނުވާނެ މުދާ ބަހައްޓާނެ ބޮޑު ގިމަތައެއް ޒަމާނީ ވަސީލަތްތަކާއެކު ތަރައްގީކޮށްފައި ހުންނާނެ އެވެ. 

އެހެންކަމުން، އެ އެއާޕޯޓު މަޝްރޫއު އަވަހަށް ނިންމާލުމަކީ އިޤްތިޞާދީ މަސައްކަތްތަކަށް ބޮޑު ފަސޭހައެއް ލިބިގެންދާނެ ކަމެއްކަން ފާހަގަކުރައްވާ ޑރ މުއިއްޒު ވިދާޅުވީ އަންނަ ސެޕްޓެމްބަރުމަހުގެ ނިޔަލަށް އެއާޕޯޓު މަޝްރޫއު މުޅިން ނިންމާލެވިދާނެ ކަމުގެ ފުރިހަމަ ޔަގީންކަން އޮތް ކަމަށެވެ.