އާންމުންނާއި ބައްދަލުކުރުމުގެ ފުރުސަތު ލިބިވަޑައިގަންނަވާ ގޮތަށް، ވާދަވެރި ސިޔާސީ ލީޑަރު އަދި ޕީޕީއެމްގެ ރައީސް އަބްދުالله ޔާމީން އަބްދުލްގައްޔޫމަށް ދިން ލިޔާއެކު ފުރަތަމަ ފަހަރަށް އެމަނިކުފާނު ޕީޕީއެމް އޮފީހަށް ވަޑައިގެން އާންމު މެމްބަރުންނާއި ބައްދަލުކުރައްވައިފި އެވެ. 

އާދިއްތަ ދުވަހުގެރޭ ޕީޕީއެމް އޮފީހަށް ވަޑައިގެން އާންމު ރައްޔިތުންނާއި ބައްދަލުކުރައްވާ އެމަނިކުފާނު ވަނީ ވަރަށް ގިނަ ވަގުތު މެމްބަރުންނާއި އެކު ހޭދަކުރައްވާފަ އެވެ. އަދި ޕާޓީގެ މުސްތަގުބަލާއި ގުޅޭ މުހިންމު ވާހަކަތަކެއް ވެސް އެމަނިކުފާނު ވަނީ އެ މެމްބަރުންނާއި ހިއްސާކުރައްވާފަ އެވެ. 

އެގޮތުން އެމަނިކުފާނު ދެއްކެވި ބައެއް ވާހަކަފުޅުތައް އެމަނިކުފާނުގެ އަރިހުގައި އެ ބައްދަލުވުމުގައި ބައިވެރިވެވަޑައިގަތް ކުރީގެ ނައިބު ރައީސް އަދި ރައީސް ޔާމީންގެ އިސް ޤާނޫނީ ވަކީލު ޑރ މުހައްމަދު ޖަމީލު އަހުމަދު ވަނީ ހިއްސާކުރައްވާފަ އެވެ. 

Advertisement

ރައީސް ޔާމީން ޕީޕީއެމްގެ އާންމު މެމްބަރުންނާއި އެކު ބޭއްވި ބައްދަލުވުމުގެ ތެރެއިން

އެ ބައްދަލުވުމަށްފަހު ޑރ ޖަމީލު ފޭސްބުކުގައި ލިޔުއްވި ޕޯސްޓެއްގައި ވިދާޅުވީ ޕީޕީއެމްގެ އަމާޒަކަށް ވާނީ ޒުވާން ޖީލަށް ޕާޓީގެ ސިޔާސަތު ކިޔައިދީ އެ ފިކުރު ވިއްކުންކަމަށް ރައީސް ޔާމީން ވިދާޅުވެފައިވާ ކަމަށެވެ. އަދި ޕީޕީއެމް ޕީއެންސީއަކީ އެއް ފިކުރެއްގެ ދެ ޕާޓީ ކަމަށާއި، ޕާޓީގެ އެއްވެސް މެމްބަރަކު އެހެން ޕާޓީއަކަށް ނުވަތަ ޕީއެންސީއަށް ފޯމު ފުރަން ނުޖެހޭނެކަމަށް ރައީސް ޔާމިން ވިދާޅުވެފައިވާކަމަށް ޑރ ޖަމީލުގެ ޕޯސްޓުގައި ވަނީ ފާހަގަކުރައްވާފަ އެވެ. 

ޑރ ޖަމީލު ވިދާޅުވީ ކުރިއަށް އޮތް ރައްޔިތުންގެ މަޖިލީސް ކާމިޔާބުކުރުމަށް ޕީޕީއެމުން ވަރަށް ވަރުގަދަ މަސައްކަތްތަކެއް ކުރަން ޖެހޭކަމަށް ރައީސް ޔާމިނު އެ ޖަލްސާގައި ވިދާޅުވެފައިވާ ކަމަށެވެ. 

އޭގެ އިތުރުން ވެސް ޕާޓީގެ މުސްތަގުބަލާއި ދޭތެރޭގައި އުންމީދީ ވާހަކަފުޅުތަކެއް ރައީސް ޔާމީން ހިއްސާކުރައްވާފައިވާ ކަމަށް ޑރ ޖަމީލު ވިދާޅުވި އެވެ. 

ރައީސް ޔާމީން އާންމު މެމްބަރުންނާއި ބައްދަލުކުރެއްވުން

އާންމުންނާއި ބައްދަލުކުރެވޭ ގޮތަށް ރައީސް ޔާމިނުގެ މައްޗަށް އިއްވާފައިވާ ހުކުމަށް ލުއި ދީފައިވާއިރު، އެ ލުޔާއެކު އެމަނިކުފާނަށް ޖަލްސާތަކުގައި ބައިވެރިވުމުގެ ފުރުސަތު ވެސް ވަނީ ލިބިގެން ގޮސްފައެވެ. އަދި މާލެ ސަރަހައްދުގައި ހިމެނޭ ހުޅުމާލެ، ވިލިމާލެ އަދި މާލައި ރައްޔިތުންނާއި ބައްދަލުކުރުމުގެ ފުރުސަތުވެސް ލިބިގެންދާނެ އެވެ. 

ރައީސް ޔާމިނުގެ ފަރާތްޕުޅުން ހައިކޯޓުގައި އިސްތިއުނާފުކޮށްފައިވާ މައްސަލަ ނުނިމި ދިގުލައިގެންދާތީ ސަޕޯޓަރުންގެ ބޮޑެތި ކަންބޮޑުވުންތަކެއް އޮތް ނަމަވެސް، އެމަނިކުފާނަށް މިހާރު ލިބިފައިވާ ލުޔާއެކު އާންމުންނާއި ބައްދަލުކުރުމުގެ ފުރުސަތު ފަހިވެގެން ދިއުމަކީ ލިބޭ ވަރަށް ބޮޑު ހިތްހަމަޖެހުމެއްކަން ފާހަގަކޮށް ސޯޝަލް މީޑިއާގައި ސަޕޯޓަރުން ގެންދަނީ ޝުއޫރު ފާޅުކުރަމުން ނެވެ.