ޕީއެންސީގެ މެންބަރުން އިތުރު ކުރުމަށް ފަށާފައިވާ މަސައްކަތްތަކުގެ ތެރެއިން، ޕީޕީއެމްގެ މެންބަރުން އެޕާޓީން ވަކިނުކުރަން ސަމާލުވާން ޕީއެންސީގެ އާ ރައީސް އަދި އިންތިޚާބީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު އެދިވަޑައިގެންފި އެވެ.

މުޢިއްޒު މިފަދައިން އެދި ލައްވާފައި ވަނީ، ކުރީގެ ރައީސް، އަދި ޕީޕީއެމްގެ ލީޑަރ ޔާމީން އަބްދުލްގައްޔޫމް ރަށު ބަންދަށް ބަދަލު ކުރުމަށްފަހު އެންމެ ފުރަތަމަ ޕީޕީއެމް މެންބަރުންނާ އެކު ބޭއްވުނު ބައްދަލުވުމުގައި ވާހަކަ ދައްކަވަމުން، ޕީޕީއެމް މެންބަރުން ޕީއެންސީއާ ގުޅެން ނުޖެހޭ ކަމަށް ޔާމީން ވިދާޅުވުމާއި ގުޅިގެންނެވެ. 

އެގޮތުން، ޔާމީންގެ އެ ވާހަކަ ރިޕޯޓް ކޮށްފައިވާ ޚަބަރު ޕީޕީއެމް/ޕީއެންސީގެ ސެނެޓަރުން ތިއްބަވާ ވަޓްސްއެޕް ގުރޫޕަށް މެންބަރަކު ހިއްސާ ކުރެއްވުމުން، އެ އަށް ރައްދު ދެއްވައި މުއިއްޒު އެ ގުރޫޕްގައި ވިދާޅުވީ، އެމަނިކުފާނުގެ އެދިލެއްވުމަކީ ޕީއެންސީ އަށް 10،000 މެމްބަރުން އިތުރު ކުރުން ކަމަށެވެ. އެހެންނަމަވެސް، އެކަމުގެ ތެރެއިން ޕީޕީއެމް މެންބަރުން އެޕާޓީން ވަކި ނުވުމަށް އެމަނިކުފާނު ވަނީ އެދިލައްވާފައެވެ. 

"އަދި ކުރިން ވެސް ދެންނެވި ފަދައިން މި ކަމުގައި އެއްވެސް މެމްބަރަކު ޕީޕީއެމުން ވަކިނުކުރެއްވުމަށް ވަރަށް ސަމާލުކަން ދެއްވުން އެދެން،" މުއިއްޒު ވިދާޅުވި އެވެ.

ޕީޕީއެމް/ޕީއެންސީގެ އެ ގުރޫޕުގައި ރައީސް ޔާމީން ވެސް އިންނަވާއިރު އެމަނިކުފާނު އެ މައްސަލާގައި ވަކި އެއްޗެއް ވިދާޅުވެފައެއް ނުވެއެވެ. 

އިލެކްޝަންސް ކޮމިޝަންގެ ދަފްތަރުގައިވާ ގޮތުން މިދިޔަ ފެބްރުއަރީ މަހުގެ ނިޔަލަށް ޕީޕީއެމްގައި ތިބީ 38،704 މެމްބަރުންނެވެ. އެ މުއްދަތާ ހަމައަށް ޕީއެންސީގައި ތިބީ 3،159 މެމްބަރުންނެވެ.