އިންތިޤާލީ މަރުހަލާ ކުރިއަށްދާއިރު މި ސަރުކާރުގެ އަދި ސަރުކާރު ހިއްސާވާ ކުންފުނިތަކުން ހިންގާ ބައެއް މަޝްރޫއުތައް ހުއްޓާލަން އަންގަނީ އެ މަޝްރޫއުތައް ކުރިއަށް ގެންދާނަމަ ދައުލަތާއި ރައްޔިތުންނަށް އިޔާދަނުކުރެވޭވަރުގެ ގެއްލުންތަކެއް ލިބިދާނެކަމުގެ އިހުތިމާލު އޮތުމުންކަމަށް އެންޓި ކޮރަޕްޝަން ކޮމިޝަން (އޭސީސީ) އިން ހާމަކޮށްފަ އެވެ. 

އިންތިގާލީ މަރުހަލާ ކުރިއަށްދާއިރު ބައެއް މަޝްރޫއުތައް ހުއްޓާލަން އޭސީސީން އަންގަމުންދާތީ ފާޑުކިޔުންތައް އަމާޒުވެފައިވާއިރު، އެފަދައިން އަންގާ ސަބަބު ހާމަކޮށް އޭސީސީން ވަނީ ބަޔާނެއް ނެރެފައެވެ. 

އެ ބަޔާނުގައި އޭސީސީން ބުނީ މި ދުވަސްވަރު ދައުލަތުގެ ބައެއް އިދާރާތަކުންނާއި، ސަރުކާރާއި ސަރުކާރު ހިއްސާވާ ކުންފުނިތަކުން ކުރިއަށްގެންދާ ބައެއް މަސައްކަތްތައް އެ ކޮމިޝަނުން ހުއްޓުވަނީ އެ ކަންކަމާއި ގުޅިގެން ކޮމިޝަނަށް ހުށައެޅޭ މައްސަލަތަކާއި ގުޅޭ ތަހުގީގުތައް ކުރިއަށް ގެންދާތީ ކަމަށެވެ. 

Advertisement

އެފަދަ ކަންކަން ހުއްޓުވަނީ އޭސީސީއަށް ހުށައެޅޭ މައްސަލަތަކުގެ ތުހުމަތުތަކަށް ބަލާއިރު އެކަންކަން ނުހުއްޓުވައިފިނަމަ އެކަންކަމުގެ ސަބަބުން ދައުލަތާއި ރައްޔިތުންނަށް އިޔާދަނުކުރެވޭފަދަ ގެއްލުންތަކެއް ލިބިގެން ހިނގައިދާނެކަމުގެ އިހުތިމާލު އޮތުމުންކަމަށް އޭސީސީން ވަނީ ބުނެފައެވެ. 

އޭސީސީން ބުނީ އެ ކޮމިޝަނުން އަންގާ އެންގުންތަކަކީ ވަގުތީގޮތުން އަންގާ އެންގުންތަކެއް ކަމަށެވެ. އަދި އެ ކޮމިޝަނުން ބަލަން ޖެހޭ ކަންކަން ބެލުމަށްފަހު އެފަދަ އެންގުމަކަށް ބަދަލުގެންނަން ޖެހޭނަމަ އެ ބަދަލެއް ކޮމިޝަނުން ގެނެސް، އެ އެންގުމެއް ރައްދުވާ ފަރާތަށް އަންގަމުންގެންދާނެ ކަމަށެވެ. 

ވަކި ކަމެއް މަޑުޖައްސާލުމަށް އިދާރާތަކަށް އެންގި ނަމަވެސް އެފަދަ އިދާރާތަކުން އާންމު ރައްޔަތުންނަށް ދެމުންގެންދާ އަސާސީ ޚިދުމަތްތަކެއް ނުވަތަ އެތަނެއްގެ އިދާރީ ހިންގުންފަދަ އެއްވެސް ކަމެއް ހުއްޓުވާލުމަށް އޭސީސީން އަންގާފައި ނުވާނެކަމަށް އޭސީސީން ނެރުނު ބަޔާނުގައި ވަނީ ބުނެފައެވެ. 

އޭގެ އިތުރުން އެ ކޮމިޝަނުން ބުނީ ވަކި ކަމެއް މަޑުޖައްސާލުމަށް އަންގާ މައްސަލަތަކުގެ ތަހުޤީގުތައް ވީހާވެސް އަވަހަކަށް ނިންމުމަށް އެ ކޮމިޝަނުން ޚާއްސަ ސަމާލުކަމެއް ދީގެން މަސައްކަތް ކުރަމުންދާ ކަމަށެވެ.