ކުރީގެ ރައީސް އަދި އިދިކޮޅު ޕީޕީއެމް/ޕީއެންސީގެ ލީޑަރ ޔާމިން އަބްދުލްގައްޔޫމް ބައިވެރިވެވަޑައިގެން މި ފަހުން ބޭއްވުނު ޕާޓީގެ ބައްދަލުވުންތަކުގައި ޕީޕީއެމް/ޕީއެންސީގެ އިސް ލީޑަރުންނަށް ބައިވެރިވެވަޑައިނުގެންނެވުނު ސަބަބުތައް ހާމަކޮށްދެއްވައިފިއެވެ. 

އާރަށް މައްސަލަ އާއި ގުޅިގެން ކްރިމިނަލް ކޯޓުން ރައީސް ޔާމީންގެ މައްޗަށް ކުރި 11 އަހަރުގެ ޖަލު ހުކުމް ތަންފީޒް ކުރައްވަން ޖަލުގައި އެތަކެއް މަސް ދުވަހު ހުންނެވުމަށްފަހު، އިންތިޚާބީ ރައީސް ޑރ މުހައްމަދު މުއިއްޒުގެ އެދިލެއްވުމަށް ގޭބަންދަށް ބަދަލު ކުރެއްވުމަށްފަހު، ގޭ ބަންދު ރަށު ބަންދަށް ބަދަލު ކުރެއްވުމާއިއެކު އެމަނިކުފާނު ބައިވެރިވެ ވަޑައިގެން ބައްދަލުވުމަކާއި، ޖަގަހަ ޖަލްސާއެއް ވެސް ވަނީ ބާއްވާފައެވެ. 

ނަމަވެސް އެއިން އެއްވެސް ބައްދަލުވުމެއްގެ ތެރެއިން ޕާޓީގެ ލީޑަރޝިޕުގެ ބޭފުޅުން ފެނިފައެއް ނުވެއެވެ. އެކަމާއި ގުޅިގެން ގިނަ ބައެއްގެ މެދުގައި ވަނީ ލީޑަރޝިޕް ބޭފުޅުންގެ މެދުގައި އޮތް ގުޅުމާއި މެދު ސުވާލު އުފެދިފައެވެ. 

Advertisement

ރައީސް ޔާމީން ރަށު ބަންދަށް ބަދަލު ކުރުމަށްފަހު ބޭއްވި ފުރަތަަމަ ބައްދަލުވުމުގެ ތެރެއިން--ފޮޓޯ/ޕީޕީއެމް

އަދި އެކަން ފާހަގަކޮށް، މިއަދު ޕީޕީއެމް/ޕީއެންސީގެ ލީޑަރޝިޕް އައްޑޫއަށް ފުރާވަޑައިގެންނެވުމުގެ ކުރިން ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަށް ޖަވާބު ދެއްވަމުން ޕީއެންސީގެ ޗެއާޕާސަން އަބްދުއްރަހީމް އަބްދުالله ވިދާޅުވީ، ރައީސް ޔާމީން ފުރަތަމަ ބޭއްވި ބައްދަލުވުމަކީ ވަރަށް ކުއްލި ގޮތަކަށް ބޭއްވި ބައްދަލުވުމެއް ކަމަށެވެ. 

އަދި އެ ބައްދަލުވުން ކުރިއަށް ދިޔައިރު، ޕާޓީގެ ލީޑަރޝިޕްގެ ބޭފުޅުން ތިބީ ހޮޓެލް ޖެންގައި އޮތް އިންތިޚާބީ ރައީސުލްޖުމްހޫރިއްޔާ ބައިވެރިވެވަޑައިގަންނަވާ، މޯލްޑިވްސް ނޭޝަނަލް އެސޯސިއޭޝަން އޮފް ކޮންސްޓްރަކްޝަން އިންޑަސްޓްރީ (މަސީ)ގެ ފަރާތުން ބޭއްވި ޖަލްސާގައި ކަމަށާ، އެ ހަފްލާ ނިމުނު އިރު، ރައީސް ޔާމީންގެ ބައްދަލުވުންވެސް ނިމިފައިވާ ކަމަށް އަދުރޭ ވިދާޅުވިއެެވެ. 

މޯލްޑިވްސް ނޭޝަނަލް އެސޯސިއޭޝަން އޮފް ކޮންސްޓްރަކްޝަން އިންޑަސްޓްރީ (މަސީ)ގެ ފަރާތުން ބޭއްވި ޖަލްސާގައި ޑރ މުޢިއްޒު ވާހަކަދައްކަވަނީ؛ ރައީސް ޔާމީންގެ ފުރަތަމަ ބައްދަލުވުން ކުރިއަށް ދިޔައިރު ޕާޓީގެ ލީޑަރޝިޕްގެ ބޭފުޅުން ތިއްބެވީ މަަސީގެ ޖަލްސާގައި

"ޖެހިގެން އައި ރެއަކީ އިންތިޚާބީ ރައީސް ސިންގަޕޫރަށް ވަޑައިގަންނަންވެފައި އޮތް ރޭ. އެރޭ އަޅުގަނޑުމެން ތިބީ އިންތިޚާބީ ރައީސް ފުރުއްވަން އެއާޕޯޓް ގައި. އޭގެ ކުރިން ޝިޔާމް ވަޑައިގެންނެވި އެތަނަށް. (ރައީސް ޔާމީންގެ ޖަގަހަ ޖަލްސާ އަށް) އެތަނަށް ވަޑައިގެންފައި، ޖަލްސާގައިވެސް ވަޑައިގެންފައި، ރައީސް (ޔާމީން) އަށް ދަންނަވާފައި، އެއާޕޯޓް އަށް ވަޑައިގެންނެވީ." އަދުރޭ ވިދާޅުވިއެެވެ . 

އަދުރޭ ވިދާޅުވީ، ދެ ޖަލްސާގައިވެސް ބައިވެރި ނުވެވުނީ އެއްގޮތަކަށްވެސް ރައީސް ޔާމީން ބައިވެރިވެވަޑައިގަންނަވާ އިވެންޓެއްގައި ބައިވެރި ނުވުމުގެ މަގުސަދެއްގައި ނޫން ކަމަށެވެ. އަދި ރިޔާސީ އިންތިހާބު ޕީޕީއެމް/ޕީއެންސީގެ ކެންޑިޑޭޓް މުޢިއްޒަށް ކާމިޔާބު ކޮށްދެއްވުމަށް ވެސް އެންމެގިނައިން ދެކެވުނު ވާހަކައަކީ މުޢިއްޒު އަކީ ޔާމީން އެންޑޯޒް ކުރެއްވި ކެންޑިޑޭޓް ކަމަށާ، މުޢިއްޒު ނުކުންނަވައި ހުންނެވީ ޔާމީން ގެނެސްދެއްވި ތަރައްގީ ރާއްޖެއަށް ގެނެސްދިނުމުގެ ވާހަކަ ކަމަށެވެ. 

"އަޅުގަނޑުމެންގެ ދެ ޕާޓީގެވެސް ސިޔާސަތަކީ އެއް ސިޔާސަތެއް. އެއް ފިކުރެއް އަޅުގަނޑުމެން ދެ ޕާޓީގެވެސް މި އޮންނަނީ." އަދުރޭ ވިދާޅުވިއެެވެ.