ޕީޕީއެމް-ޕީއެންސީއަކީ އެކަތިގަނޑެއްގެ ގޮތުގައި އޮތް ދެ ޕާޓީ ކަމަށާއި، ޕާޓީ ބައިބައިކުރުމުގެ ފުރުސަތު އެއްވެސް ފަރާތަކަށް ނުދެއްވާނެކަމަށް ޕީއެންސީގެ ޗެއާޕާސަން އަބްދުއްރަހީމް އަބްދުالله ވިދާޅުވެއްޖެ އެވެ.
އަބްދުއްރަހީމް މިފަދައިން ވިދާޅުވެފައިވަނީ ޕީޕީއެމް-ޕީއެންސީގެ ލީޑަޝިޕުން ބައިވެރިވެވަޑައިގެން ރޭ ހުޅުމީދޫގައި ބޭއްވި ޖަލްސާގައި ވާހަކަދައްކަވަމުން ނެވެ.
އަބްދުއްރަހީމް ވިދާޅުވީ ޕީޕީއެމް-ޕީއެންސީގެ ތެރޭގައި ފިތުނަ ފަސާދައާއި ބައިބައިވުން އުފެއްދުމަށްޓަކައި ސަރުކާރާއި ސަރުކާރަށް ވާގިވެރިވާ ފަރާތްތަކުން ވަރަށް ގިނަގުނަ މަސައްކަތްތައް ކުރަމުން ގެންދާ ކަމަށެވެ.
އެހެން ނަމަވެސް އެފަދައިން ކުރެވޭ މަސައްކަތްތައް ކާމިޔާބު ކުރުމުގެ ފުރުސަތު ނުދެއްވާނެ ކަމަށާއި، ޕީޕީއެމް ޕީއެންސީ އޮންނާނީ ބަދަހިކޮށް ކަމަށް އަބްދުއްރަހީމް ވިދާޅުވި އެވެ.
"އަޅުގަނޑުމެންގެ ދެ ޕަޓީ ބައިބައި ކުރުމުގެ މަސައްކަތަކީ އެއްވެސް ބަޔަކަށް އިރާދަކުރެއްވިޔާ ކާމިޔާބު ކުރެވޭނެ މަސައްކަތެއް ނޫން. އެ ފުރުސަތެއް އެއްވެސް ފަރާތަކަށް އަޅުގަނޑުމެންނެއް ނުދޭނަން"
އަބްދުއްރަހީމް އަބްދުالله
އަބްދުއްރަހީމް ވަނީ މި ސަރުކާރުން ކެނޑިނޭޅި ޕީޕީއެމްގެ ރައީސް، ރައީސް އަބްދުالله ޔާމީން އަބްދުލްގައްޔޫމަށް ދެމުން ގެންދާ އަނިޔާތަކަށް ވެސް އަލިއަޅުވާލައްވާފަ އެވެ. އެގޮތުން އަބްދުއްރަހީމް ވިދާޅުވީ ރައްޔިތުންގެ ވޯޓުން މި ސަރުކާރު ބަލިކުރުމާއި ހަމަޔަށް ސަރުކާރުން ކެނޑިނޭޅި ރައީސް ޔާމިނަށް އަނިޔާކުރަމުން ގޮސްފައިވާ ކަމަށެވެ.
މި ސަރުކާރުގައި ބޭއްވުނު ކޮންމެ އިންތިޚާބަކާއި ދިމާކޮށް ރައީސް ޔާމީން ޖަލުގައި ބަންދުކުރަމުން އައިސްފައިވާ ކަމަށާއި، އެމަނިކުފާނަށް ސިޔާސީ މަސައްކަތް ނުކުރެވޭގޮތަށް ބަންދުކުރަމުން ގެންގޮސްފައިވާކަމަށް އަބްދުއްރަހީމް ވިދާޅުވި އެވެ. އަދި އޭނާ ވަނީ ރައީސް ޔާމިނުގެ އިސްތިއުނާފު އަވަސްކޮށް، އެމަނިކުފާނަށް ކުރަމުންދާ އަނިޔާތައް ހުއްޓާލުމަށް ގޮވާލައްވާފަ އެވެ.
Advertisement
This content is created and paid for by advertisers and does not involve Voice Journalists
