ފެލިދޫ ކައުންސިލްގެ ފަރާތުން ނިންމާފައިވަ ނިންމުމަކީ ގާނޫނު އަސާސީގެ ދަށުން އެ ކައުންސިލަށް ލިބިދޭ ބާރެއް ނޫންކަމުގައި ހިއުމަން ރައިޓްސް ކޮމިޝަން އޮފް މޯލްޑިވްސް (އެޗްއާރސީއެމް) އިން ބުނެފިއެވެ. 

ވ. ފެލިދޫ ކައުންސިލަށް ދައްކަންޖެހޭ ފައިސާ ނުދައްކާ މީހުންނާއި އެމީހުންގެ އަނބިން ފިރިން އަދި ދަރިންނަށް ކައުންސިލްގެ ފަރާތުން ފޯރުކޮށްދޭ އެއްވެސް ޚިދުމަތެއް ނުދިމުމަށް ކައުންސިލުން ނިންމުމާ ގުޅިގެން އެޗްއާރސީއެމް އިން ނެރުނު ބަޔާނެއްގައި ބުނެފައިވަނީ، ދިވެހިޖުމްހޫރިއްޔާގެ ޤާނޫނު އަސާސީގައި ބަޔާންކުރާ އެއްވެސް އަސާސީ ހައްގެއް ނުވަތަ މިނިވަންކަމެއް އެެއްވެސް މިންވަރަކަށް ހިފެހެއްޓޭނީ ޤާނޫނު އަސާސީއާއި ތަޢާރަޟްނުވާ ގޮތުގެ މަތިން ރައްޔިތުންގެ މަޖިލިހުން ފާސްކުރާ ދީމިޤރާތީ މުޖްތަމައެއްގައި މިފަދަ ހައްޤެއް ނުވަތަ މިނިވަންކަމެއް ހިފެހެެއްޓިދާނެކަމަސް ޤަބޫލުކުރެވޭ މިންވަރަށްކަމަށް ޤާނޫނު އަސާސީގައި ބަޔާންކޮށްފައިވާކަމަށެވެ. 

ވުމާއެކުކައުންސިލުން ފޯރުކޮށްދެންޖެހޭ ޚިދުމަތްތައް ފޯރުކޮށްދިނުމުގައި، ކައުންސިލުން ފޯރުކޮށްދޭ ޚިދުމަތެއް އެއްވެސް ފަރާތަަކަށް ފޯރުކޮށްނުދީ ހިފެހެއްޓިދާނެ އެއްވެސް ހާލަތެއް ޤާނޫނު ނަމްބަރު 7/2010 (ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނު) ގެ ދަށުން ނެތްކަމުގައި އެ ކޮމިޝަނުގެ ބަޔާނުގައި ބުނެފައިވެއެވެ. 

Advertisement

އެހެންކަމުން ފެލިދޫ ކައުންސިލުން ނިންމާފައިވާ ފަދަ ނިންމުމެއް ނިންމުމުގެ ބާރު ޤާނޫނު އަސާސީން އެ ކައުންސިލަށް ލިބިފައިނުވާ ކަމުގައި އެ ކޮމިޝަނުގެ ބަޔާނުގައި ވަނީ ބުނެފައެވެ. 

މީގެ އިތުރުން ފެލިދޫ ކައުންސިލަށް ފައިސާ ނުދައްކާ ފަރާތްތަކަށާއި އެ ފަރާތްތަކުގެ އަނބިން، ފިރިން އަދި ދަރިންނަށް ކައުންސިލްގެ އެއްވެސް ޚިދުމަތެއް ފޯރުކޮށް ނުދިނުމަށް ނިންމާފައިވާ ނިންމުމަކީ އެޗްއާރސީއެމް އިން ނުހަނު ކަންބޮޑުވާ ކަމެއްކަމުގައިވާތީ، ފެލިދެ އަތޮޅު ފެލިދޫ ކައުންސިލްގެ އެ ނިންމުން ބާޠިލްކުރުމަށް އެ ކައުންސިލަށް އަންގައިފައިވާނެ ކަމަށްވެސް އެ ބަޔާނުގައި ވަނީ ބުނެފައެވެ. 

މީގެ އިތުރުން އެޗްއާރސީއެމް ގެ ބަޔާނުގައި ބުނެފައިވަނީ ފެލިދޫގެ ރައްޔިތުންގެ އާމްދަނީއަށް ލިބެންޖެހޭ ފައިސާ ނުދައްކާ ފަރާތްތަކުގެ އަތުން ފައިސާ ހޯދުމުގެ މައްސަލައަށް ހައްލު ހޯދަންވާނީ ގާނޫނީ އިމުގެ ތެރެއިން ކަމުގައި އެ ކައުންސިލަށް އަންގައިފައިވާނެކަމަށެވެ. 

މީގެ އިތުރުން އެޗްއާރސީއެމް ގެ ބަޔާނުގައި ވަނީ ހުރިހަ ކައުންސިލަކުންވެސް އިންސާނީ ހައްޤުތަކަށް އިޚްތިރާމްކޮށް އިންސާނީ ހައްޤުތައް ރައްކާތެރިކޮށް ކުރިއަރުވާ އަދި ކައުންސިލްތަކުން ނިންމަވާ ކަންކަމަކީ ދިވެހިރާއްޖޭގެ ޤާނޫނުތަކުގެ ދަށުން ރައްޔިތުންނަށް ލިބިދެވޭ ހައްޤުތަކަށް އުނިކަން ނާންނާނެގޮތަށް ނިންމަވާ ނިންމެވުންތަކެއްކަން ކަށަވަރުކުރުމަށް އިލްތިމާސްކޮށްފައެވެ. 

ފެލިދޫ ކައުންސިލްގެ މި ނިންމުމާއިގުޅިގެން ލޯކަލް ގަވަރމެންޓް އޮތޯރިޓީ އެލްޖީއޭއިންވެސް ވަނީ ކަންބޮޑުވުން ފާޅުކޮށް ބަޔާނެއް ނެރެފައެވެ.