ރައްޔިތުންގެ މަޖިލީހުގެ ނައިބު ރައީސް، ގަލޮޅު އުތުރު ދާއިރާގެ މެންބަރު އީވާ އަބްދުالله މަޖިލިސް ތަޅުމުގައި ހުންނަވަނިކޮށް، ރައްޔިތުންގެ މަޖިލީހުގެ ރައީސް މުހައްމަދު އަސްލަމް، މަރަދޫ ދާއިރާގެ މެންބަރު އިބްރާހިމް ޝަރީފް އާ ރިޔާސަތު ހަވާލު ކުރެއްވި ގޮތާމެދު ސުވާލު އުފައްދަވައި އެކަން އޮޅުން ފިލުއްވައިދެއްވުމަށް އީވާ އެދިވަޑައިގެންފިއެވެ.

މަޖިލީހުގެ މެންދުރު ދަންފަޅީގެ ޖަލްސާ ފެއްޓެވިއިރު މަޖިލިސް ރިޔާސަތުގައި އިންނެވީ މަރަދޫ ދާއިރާގެ މެންބަރު ޝަރީފެވެ. ޖަލްސާ ފެއްޓެވިއިރު އީވާ އިންނަވާ ގޮނޑިކޮޅުގައި އޭނާ ފެންނާކަށް ނެތެވެ. ނަމަވެސް ޖަލްސާ ފެށިތާ މާގިނައިރުތަކެއް ނުވަނީސް އަޑުއިވިގެން ދިޔައީ އީވާ ނިޒާމީ ނުކުތާއަކަށް އެދިވަޑައިގެންނެވި މަންޒަރެވެ. ނަމަވެސް މަޖިލީހުގެ ރިޔާސަތުން އެ ފުރުސަތު ނުދެއްވާ އެވަގުތު ވާހަކަދައްކަވަމުން ގެންދެވި ހެންވޭރު ދެކުނު ދާއިރާގެ މެންބަރު ހުސައިން ޝަމީމް ގެ ވާހަކަދެއްކުން ކުރިޔަށް ގެންދިއުމަށް ވަނީ ފުރުސަތު ދެއްވާފައެވެ.

ނިޒާމީ ނުކުތާ ނެންގެވުމަށް އީވާއަށް ފުރުސަތު ނުދެއްވުމުން ހުސައިން ޝަމީމް ވާހަކަދައްކަވަމުން ގެންދަވަނިކޮށް އޭނާ ކައިރިއަށް ވަޑައިގެން އީވާ ތަޅުމުގައި ހުންނަވަނިކޮށް އެހެން ބޭފުޅަކަށް ރިޔާސަތު ހަވާލު ނުކުރެއްވޭނެ ކަމަށް ވިދާޅުވެ ވަނީ އަޑުގަދަ ކުރައްވަން ފެއްޓަވާފައެވެ. އަދި ޝަރީފް ވަނީ ތިން ފަހަރެއްގެ މަތިން މަޖިލީހުގެ ގަވާއިދަށް ހުރުމަތްތެރިކޮށް ހިތްތެވުމަށް އީވާއަށް ނަސޭހަތްތެރިވެވަޑައިގެންފައެވެ. އަދި ފަހުން އީވާގެ ނަންވެސް އިއްވެވިއެވެ.

Advertisement

މި މައްސަލަގައި މަޖިލިސް ހޫނުވެ، މަޖިލީހުގެ ޖަލްސާވެސް ވަނީ މެދުކަނޑާލައިފައެވެ.