މާލެ ސަރަޙައްދުން ފްލެޓް ދޫކުރުމަށްޓަކައި ސަރުކާރުން ހިންގާ 'ގެދޮރުވެރިޔާ ސްކީމް"ގެ ދަށުން މާލެ ސަރައްޙައްދުން ފްލެޓަށް އެދި ހުށަހަޅާފައިވާ ފަރާތްތަކުގެ ތެރެއިން ދާއިމީ ލިސްޓުގައި ހިމެނޭ ފަރާތްތަކަށް ފްލެޓްތައް ޙަވާލުކުރުމުގެ މަސައްކަތްތައް ހުއްޓާލައިފި އެވެ. 

ޕްލޭނިންގ މިނިސްޓްރީން ބުނީ، ސަރުކާރުން ދޫކުރާ 4000 ފުލެޓް ލިބޭ މީހުންނަށް ފްލެޓް ހަވާލު ކުރުމުގެ މަސައްކަތް މިވަގުތު ކުރިއަށް ނުގެންދިޔުމަށް އެންޓި-ކޮރަޕްޝަން ކޮމިޝަނުން އެ މިނިސްޓްރީއަށް އަންގާފައިވާކަމަށެވެ.

އެހެންކަމުން މި ސްކީމްގެ ދަށުން ފްލެޓްތައް ޙަވާލުކުރުމުގެ މަސައްކަތަކާއި ގުޅިގެން އެންޓ-ިކޮރަޕްޝަން ކޮމިޝަނުން ވަކި ގޮތެއް އަންގަންދެން ފްލެޓްތައް ޙަވާލުކުރުމުގެ މަސައްކަތް ހުއްޓާލައިފާވާކަމަށް އެ މިނިސްޓްރީން ބުނެފައިވެއެވެ. 

Advertisement

ގެދޮރުވެރިޔާ ސްކީމްގެ ދަށުން އެންމެ ކުރިން ހަވާލުކުރާ 4،000 ފްލެޓު ލިބޭ މީހުންގެ ދާއިމީ ލިސްޓަށް ހުށަހެޅި ޝަކުވާތައް ބެލުމަށް ފަހު، އަލުން ދާއިމީ ލިސްޓު ހައުސިން މިނިސްޓްރީން ރޭ އާއްމުކޮށްފައިވާއިރު، ރޭގެ ވަގުތެއްގައި ފްލެޓު ލިބޭ މީހުންގެ މެދުގައި ގުރުއަތުނެގުންވެސް ވަނީ ކުރިއަށް ގެންގޮސްފައެވެ. 

އެކަމާއި ގުޅިގެން އޭސީސީއިން ހައުސިން މިނިސްޓްރީއަށް ރޭ ފޮނުވި ސިޓީ އެއްގައި، ގެދޮރުވެރިޔާ ސްކީމްގެ ދަށުން ދޫކުރުމަށް ހަމަޖެހިފައިވާ ފްލެޓްތަކުގެ އެއްބަސްވުމުގައި ސޮއިކުރުމާއި އެ ފުލެޓްތައް ހަވާލުކުރުމާ ގުޅުންހުރި އެންމެހާ މަސައްކަތްތައް ހުއްޓާލުމަށް ވަނީ އަންގާފައެވެ. 

އަދި އެ ގޮތަށް އެންގީ އޭސީސީން ކަންކަން ބެލުމަށް ފަހު ވަކި ގޮތެއް ކަނޑައަޅަންދެން ކަމަށްވެސް އެސިޓީގައި ބުނެފައިވެއެވެ.