ފަލަސްތީނަށް އިޒްރާއިލުން ދެމުންދާ ހަމަލާތައް ހުއްޓާލުމަށް ދިވެހިރާއްޖޭގެ ރައްޔިތުންގެ މަޖިލީހުން ގޮވާލާ އަޑު މުޅި ދުނިޔެއަށް އިއްވަން ޖެހޭކަމަށް މަޖިލީހުގެ ގަލޮޅު އުތުރު ދާއިރާގެ މެމްބަރު އީވާ އަބްދުالله ވިދާޅުވެއްޖެ އެވެ.
އިޒްރާއިލްގެ ޔަހޫދީން ފަލަސްތީނުގައި ހިންގަމުންދާ ގަތުލުއާންމު ހުއްޓާ ނުލާހާ ހިނދަކު އިޒްރާއިލުގެ އުފެއްދުންތައް ރާއްޖެ އެތެރެ ނުކުރުމަށާއި، އިޒްރާއިލްގެ ޕާސްޕޯޓުގައި ރާއްޖެ އެތެރެވުން މަނާކުރުމަށް ގޮވާލާ ރައްޔިތުންގެ މަޖިލީހަށް ހުށައަޅާފައިވާ ގަރާރަށް ވާހަކަދައްކަވަން ފައްޓަވަމުން އީވާ ވިދާޅުވީ ފަލަސްތީނުގެ ރައްޔިތުންނަށް އިޒްރާއިލްގެ ޔަހޫދީން ދެމުންދާ ހަމަލާތަކާއި އަނިޔާތައް ސިފަކޮށްދޭނެ ބަހެއް އޭނާއަށް އެނގިވަޑައި ނުގަންނަވާ ކަމަށެވެ.
ފަލަސްތީނުގެ ރައްޔިތުންނަށް އިޒްރާއިލުން ދެމުންދާ ލާ އިންސާނީ އަނިޔާތަކަކީ، ދުލުން ސިފަކުރަން ދަތި އަދި އަމުދުން ވެސް އެ މަންޒަރުތަށް ބަލަން ކުޅަދާނަ ނުވާ ވަރުގެ އަނިޔާތަކެއް ކަމަށާއި، އެ ރައްޔިތުންގެ ހައްގުގައި އަޑު އުފުލުމަކީ ފަރުދީ ގޮތުން މިއަދު ދިވެހި ކޮންމެ ރައްޔިތަކުމެ ކުރަން ޖެހޭ ކަމެއް ކަމަށެވެ.
އީވާ ވިދާޅުވީ ދިވެހިރާއްޖެ އަކީ މީސްކޮޅު މަދު ކުޑަ އިޤްތިޞާދެއްކަމަށް ބަލައި، ފަލަސްތީނުގެ ހައްގުގައި ބަސް ނުބުނާ ބަޔަކަށް ވެގެން ތިބެގެން ނުވާނެ ކަމަށެވެ. އޭގެ ބަދަލުގައި ދިވެހީންގެ ފެންވަރުން، އަދި ގައުމެއްގެ ގޮތުގައި ފަލަސްތީނުގައި ހިންގަމުން އެ ދާ ގަތުލުއާންމާއި ދެކޮޅަށް މަސައްކަތް ކުރެވޭނެ ގޮތްތައް ހޯދާ ބަލާ ރާވާ ތަންފީޒު ކުރަން ޖެހޭނެކަމަށް އީވާ ވިދާޅުވި އެވެ.
އެގޮތުން އީވާ ވަނީ އިޒްރާއިލުން ފަލަސްތީނަށް ދެމުންދާ ހަމަލާތައް ހުއްޓާލުމަށް ރައްޔިތުންގެ މަޖިލީހުން ހަރު އަޑުން ގޮވާލާ، އެ އަޑު ދުނިޔެއަށް އިއްވުމަށް އެދިވަޑައިގެންފަ އެވެ.
"މިހާރު އެ ހިނގަނީ ޖީލުތަކަށް.. ދަރިފަސްކޮޅެއް ނައްތާލުމަށްޓަކައި އިޒްރާއިލުން ކުރަމުންދާ ކަމެއް. ސީޒް ފަޔާ މިހާރުން މިހާރަށް ގޮވާލުމަށް މި ޕާލަމެންޓުގެ އަޑު އެބަ ދާން ޖެހޭ"
މެމްބަރު އީވާ އަބްދުالله
އީވާ ވިދާޅުވީ ފަލަސްތީނުގައި ހިންގަމުން އެދާ ގަތުލު އާންމަކީ ނަސްތެއް ނައްތާލުމުގެ ޖަރީމާ ކަމަށެވެ. ހަނގުރާމައިގެ ނަމުގައި ކުޑަ ކުދިން މަރާ ހުސްކުރުމަކީ އޮޅިގެން ކުރެވޭ ކަމެއް ނޫންކަން އޭނާ ފާހަގަކުރެއްވި އެވެ. އަދި ފަލަސްތީނުގެ އާންމު ރައްޔިތުން ޝަހީދުވެގެން ދަނީ ހަނގުރާމައިގެ ޔަހޫދީންނާއި ހަމާސްއާއި ދެމެދު ކުރެވޭ ހަނގުރާމައިގައި ފިތިގެން ކަމަށް ބެލުމުގެ ފުރުސަތެއް ވެސް ނޯންނާނެކަމަށް އޭނާ ވިދާޅުވި އެވެ.
އޭގެ އިތުރުން އީވާގެ ވާހަކައިގައި ވަނީ ރަޝިޔާއިން ޔޫކުރެއިންއަށް ދިން ހަމަލާ ކުށްވެރިކޮށް ދުނިޔޭގެ ގައުމުތަކުން އަޑުއުފުލަމުން ދިޔައިރު، އިޒްރާއިލުން ފަލަސްތީނަށް ދެމުންދާ ލާ އިންސާނީ ހަމަލާތަކާއި ދެކޮޅަށް ބަސް ބުނަން އެ ގައުމުތަކަށް ނުކެރުނުކަން ފާހަގަކުރައްވާފަ އެވެ.
އެއާއެކު އީވާ ވިދާޅުވީ މި ކަންކަމާއި ދެކޮޅަށް ސޯޝަލް މީޑިއާގައި ވެސް ޚިޔާލު ފާޅުކުރުން މުހިންމު ކަމަށެވެ. އަދި ކުރިމަތިވާ ތަފާތު ފިއްތުންތަކާއި އެކުވެސް ފަލަސްތީނުގެ އަޑު ކެނޑުނަ ނުދިނުމަށް، ތަކުރާރުކޮށް އެ ރައްޔިތުންގެ ހައްގުގައި ވަކާލާތުކޮށް އަޑުއުފުލުމަކީ ފަރުދީގޮތުން ކޮންމެ މީހަކު ކުރަން ޖެހޭ ކަމެއްކަމަށް ދެކިވަޑައިގަންނަވާ ކަމަށް އީވާ ވިދާޅުވި އެވެ.
Advertisement
This content is created and paid for by advertisers and does not involve Voice Journalists
