ރާއްޖޭގައި ހުންނަ ޢަރަބި އިސްލާމީ މަދަރުސާ އަލްމަދްރަސަތުލް ޢަރަބިއްޔަތުލް އިސްލާމިއްޔާގެ އައި ޢިމާރާތް ބިން ކަނޑައަޅައި އެޢިމާރާތުގެ ޢަމަލީ މަސައްކަތް ފެށުމަށް ސަރުކާރުން ނިންމައިފިއެވެ.

ޢަރަބިއްޔާގެ އައު ޢިމާރާތް އެޅުމަށް ސަރުކާރުން ކަނޑައަޅައިފައިވަނީ ކުރިން މާލޭ ކުނިކޮށި ހުރި ބިންކަމުގައިވާ 381 ނަންބަރު ކޮށްޓެވެ. މި ސަރުކާރުގެ ‘ހަފުތާ 14’ގައި ޢަރަބިއްޔާ ސްކޫލުގެ ޢިމާރާތުގެ ޢަމަލީ މަސައްކަތް ފެށުމަށް ވަނީ ހަމަޖެހިފައެވެ.

ޢަރަބިއްޔާ ސްކޫލް ހިންގުމަށް ބޭނުންވާނެ ޒަމާނީ ފެންވަރުގެ ޢިމާރާތެއް އަޅައި ދެއްވާނެ ކަމަށް ރިޔާސީ އިންތިޚާބުގެ ކެމްޕޭނު ތެރޭގައި ރައީސް ޑރ މުޙައްމަދު މުޢިއްޒު ވަނީ ވިދާޅުވެފައެވެ.

އެގޮތުން ޢަރަބިއްޔާ ސްކޫލް ޒަމާނީކޮށް، ފުޅާ ދާއިރާއެއްގައި ޢަރަބި ބަހުން ތަޢުލީމު ދެވޭ މަރުކަޒަކަށް އެ ސްކޫލް ހެދުމާއެކު، މާލެއިން އެކަށޭނަ ބޮޑު ބިމެއްގައި، ޖާގައިގެ ގޮތުން ތަނަވަސް، ޒަމާނީ އާ އިމާރާތެއް ބިނާކޮށް، އެތަނަށް ޢަރަބިއްޔާ ސްކޫލް ބަދަލުކުރުމަކީ ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒުގެ ‘ދިވެހީންގެރާއްޖެ’ މެނިފެސްޓޯގައި ހިމެނޭ ރިޔާސީ ވައުދެކެވެ.

އަދި އެމަނިކުފާނުގެ ވެރިކަން ފެށުމާއި އެކު ޢަރަބިއްޔާ ސްކޫލު އެޅުމުގެ މަސައްކަތް ފެއްޓެވުމަކީވެސް އެމަނިކުފާނު ވަޢުދުވެޑައިގެންފައިވާ ކަމެކެވެ.

ޢަރަބިއްޔާ ސްކޫލް ހިންގުމަށް އެކަށީގެންވާ ޢިމާރާތެއް ނެތުމުގެ ސަބަބުން އެ ސްކޫލް އެކަށީގެންވާ ޢިމާރާތެއް ނެތުމުގެ ސަބަބުން އެސްކޫލްގައި ކިޔަވާ ދަރިވަރުންގެ ތަޢުލީމާއި ތަރުބިއްޔަތާއި ޖިސްމާނީ ތަރުބިއްޔަތަށް ހިންގަން ޖެހޭ ހަރަކާތްތައް ނުހިންގި އެތައް ދަތިތަކެއް ކުރިމަތިވަމުން ދެއެވެ.

ޢަރަބިއްޔާ ސްކޫލްގެ ޢިމާރާތް ޗާންދަނީ މަގުގައި އަޅައި އެތަން ބޭނުންކުރަން ފެށިތާ 7 އަހަރު ނުވަނިސް އެޢިމާރާތުގައި ރެނދުލައި ޢިމާރާތް ބޭނުންނުކުރެވޭ ޙާލަތައް ދިޔުމުން ޢަރަބިއްޔާގެ ދަރިވަރުންނާއި މުވައްޒަފުން ވަގުތީ ގޮތުން ބަދަލު ކުރީ ކުރިން ފޮރިން މިނިސްޓްރީ ހިންގި ޢިމާރާތަށެވެ.

އެޢިމާރާތުގައި ޢަރަބިއްޔާގެ ދަރިވަރުންނާއި މުދައްރިސުންނާއި މުވައްޒަފުން ވަނީ ވަރަށް ދަތި ދުވަސްތަކެއް ދެކެފައެވެ.

އެޢިމާރާތުގެ ދަތިކަމާއި އެކު ޢަރަބިއްޔާގެ ބެލެނިވެރިންގެ ޝަކުވާތައް ގިނަވެ މި ހިނގަމުންދާ ދިރާސީ އަހަރު ފެށެންވާއިރަށް ޢަރަބިއްޔާ ސްކޫލް ވަނީ ދަރުމަވަންތަ ސްކޫލް ކުރިން ހިންގި ވަގުތީ ޢިމާރާތައް ބަދަލުކޮށްފައެވެ.