ވެރިކަންކުރާ ޕީޕަލްސް ނެޝަނަލް ކޮންގްރެސް (ޕީއެންސީ)ގެ ޕާލަމެންޓްރީ ގްރޫޕުގެ ލީޑަރ އަކަށް ފެލިދޫ ދާއިރާގެ މެންބަރުން އިބްރާހިމް ފަޒުލް ރަޝީދު ހަމަޖައްސަވައިފިއެވެ.
ރައްޔިތުންގެ މަޖިލީހުގެ މިއަދުގެ ޖަލްސާ ފަށްޓަވަމުން މަޖިލީހުގެ ރައީސް މުހައްމަދު އަސްލަމް ވިދާޅުވީ، ދިވެހިރާއްޖޭގެ ރައީސުލްޖުމްހޫރިއްޔާ ޑރ މުހައްމަދު މުއިއްޒު ނިސްބަތްވެވަޑައިގަންނަވާ ޕާޓީ، ޕީއެންސީއަކީ މިހާރު ރައްޔިތުންގެ މަޖިލީހުގައި ސަރުކާރު ތަމްސީލު ކުރާ ޕާޓީ ކަމަށެވެ. އަދި އެ ޕާޓީގެ ޕާލިމަންޓްރީ ގުރޫޕްގެ ލީޑަރަކީ ފަޒުލް ކަމަށް ޕާޓީން މަޖިލީހަށް އަންގާފައިވާ ކަމަށްވެސް އަސްލަމް ވިދާޅުވިއެވެ.
މަޖިލީހުގައި މިހާރު ތިބި މެންބަރުން ހިމަނައިގެން މީގެ ކުރިން ޕީއެންސީގެ 5 މެންބަރުން ތިއްބެވި އެވެ. އެއީ،
• މިހާރުގެ އިކޮނަމިކް މިނިސްޓަރު އަދި ކުރީގެ މާވަށު ދާއިރާގެ މެންބަރު މުހައްމަދު ސަޢީދު،
• މިހާރުގެ ލޯކަލް ގަވަމަންޓް މިނިސްޓަރު އަދި ކުރީގެ މަޑުއްވަރީ ދާއިރާގެ މެންބަރު އާދަމް ޝަރީފް ޢުމަރު،
• މިހާރުގެ ނާއިބު ރައީސް އަދި ކުރީގެ ފަރެސްމާތޮޑާ ދާއިރާގެ މެންބަރު ހުސައިން މުހައްމަދު ލަތީފް
• ފެލިދޫ ދާއިރާގެ މެންބަރު އިބްރާހީމް ފަޒުލް ރަޝީދު
• ތުލުސްދޫ ދާއިރާގެ މެންބަރު އިބްރާހީމް ނަސީމް
ނަމަވެސް ސަރުކާރުގެ މަގާމުތަކަށް ތިން މެންބަރުން އައްޔަނުކުރުމާއެކު މިހާރު މަޖިލީހުގައި ވެރިކަންކުރާ ޕީއެންސީ ތަމްސީލުކުރާ މެންބަރުންގެ އަދަދު ވަނީ 2 އަށް ވެއްޓިފައެވެ.
Advertisement
This content is created and paid for by advertisers and does not involve Voice Journalists
