ޕާޓީގެ މަސްލަޙަތު ނަގާލައި "ވަޒީފާގެ ބިރަށް ސިޓީގައި ސޮއިކުރާ ފިނޑިން" ކުރިމަތީ ބޯތިރި ނުކުރާނެކަމުގައި، ޕީޕީއެމްގެ މަސްލަހަތު ނަގާލައި ޕާޓީ ބަދުނާމުވާ ފަދަ އަމަލުތަކެއް ކުރި ކަމުގެ ތުހުމަތުގައި މިއަދު ސަސްޕެންޑް ކުރި މުހައްމަދު މަލީހު ޖަމާލް ވިދާޅުވެއްޖެއެވެ. 

 ޕީޕީއެމްގެ ސެނެޓަރެއްގެ މަޤާމުގައި ހުންނަވައިގެން އެ ޕާޓީ ބަދުނާމުކުރައްވައި ޕާޓީ ބައިބައިކުރުމުގެ މަސައްކަތްތަކެއް ކުރައްވާފައިވާކަމަށް ތުޙުމަތުކޮށް މަލީޙް އެޕާޓީގެ ހަރަކާތްތަކުން ސަސްޕެންޑްކޮށްފައިވާކަން އަންގައި މިއަދު އެ ބޭފުޅާއަށް ވަނީ ސިޓީއެއް ފޮނުވައިފައެވެ. 

ޕީޕީއެމްގެ ދެ ނައިބު ރައީސުން ކަމުގައިވާ އަހްމަދު ޝިޔާމް އަދި މުހައްމަދު ޣައްސާން މައުމޫން ސޮއި ކުރައްވައި ފޮނުވި މި ސިޓީގައިވަނީ، ޕީޕީއެމް ބައިބައިކުރެއްވުމުގެ މަސައްކަތްތަކެއް މަލީޙު އިސްކޮށް ހުންނަވައިގެން ކުރައްވާކަމަށާއި، އެގޮތުން ޕާޓީގެ ލީޑަރޝިޕަށް ނުވަތަ ޕާޓީގެ ސެނެޓަށް އެނގުމެއްނެތި، މަލީޙް އަމިއްލަފުޅަށް ކޮމިޓީތައް އުފައްދަވާފައިވާކަމަށެވެ.

Advertisement

އަދި ޕާޓީގެ އަސާސީ ޤަވާއިދާ ޚިލާފަށް ޕާޓީގެ ލީޑަރޝިޕް އަދި ސެނެޓުގެ އެއްވެސް މަޝްވަރާއެއްނެތި ޕާޓީގެ ނަމުގައި ޕްރެސް ކޮންފަރެންސްއެއް ބާއްވަވައި އެ ޕްރެސް ކޮންފަރެންސްގައި ޕާޓީގެ އަސާސްތަކާއި ޚިލާފަށް ޕާޓީ ބަދުނާމުކޮށްފައިވާކަމަށްވެސް އެ ސިޓީގައި ފާހަގަކުރައްވާފައިވެއެވެ.

އެކަމާއި ގުޅިގެން މިއަދު މަލީހު ކުރެއްވި ޓުވީޓެއްގައި ބުނެފައިވަނީ، ރައީސް ޔާމީންއާއި ޕީޕީއެމްގެ ދިފާޢުގައި މިކުރާ މަސައްކަތުގައި އެންމެ އިންޗިއެއްވެސް ފަހަތަށް ޖެހުމެއް ނޯންނާނެކަމަށެވެ. 

ޕީޕީއެމްއިން މަލީޙް އަށް ފޮނުވި ސިޓީގައި ބަޔާންކުރާ ނޫސްވެރިންގެ ބައްދަލުވުމުގައި ޕީޕީއެމްގެ ރައީސްގެ އެދުމުގެ މަތިން ޚާއްސަ ކޮމެޓީއެއް އުފެއްދި ކަމަށް މަލީޙްވަނީ ހާމަ ކުރައްވާފައެވެ. އަދި ޕީޕީއެމްގެ ތަރުޖަމާނު ކަމުން ހީނާ ވަލީދު އިސްތިއުފާ ދެއްވި ކަމަށް ވެސް ވަނީ ވިދާޅުވެފައެވެ. ނަމަވެސް ހީނާ ވަނީ އެވާހަކަ ދޮގުކޮށްފައެވެ.