ކުރީގެ ރައީސް، އަދި ޕީޕީއެމްގެ ލީޑަރ ރައީސް އަބްދުالله ޔާމީން އަބްދުލްގައްޔޫމް ޕީޕީއެމުން ވަކިވެވަޑައިގަންނަވަން ނިންމަވައިފިއެވެ.

ރައީސް ޔާމީން ޕީޕީއެމުން އިސްތިއުފާ ދެއްވަން ނިންމެވިކަން އެމަނިކުފާނުގެ އިސް ގާނޫނީ ވަކީލު ޑރ. މުހައްމަދު ޖަމީލް އަހުމަދު ވަނީ ކަށަވަރު ކޮށްދެއްވާފައެވެ. އަދި އެމަނިކުފާނު ޕާޓީން ވަކިވެވަޑައިގެންނެވީ ޕާޓީގެ ލީޑަރޝިޕްގެ ބައެއް ބޭފުޅުން އެމަނިކުފާނާ ދުރަށް ޖެހިވަޑައިގެންފައިވާ ކަމަށް އެމަނިކުފާނަށް ދެކެވޭތީ ކަމަށް ޖަމީލް ޗެނަލް 13 އަށް މައުލޫމާތު ދެއްވަމުން ވަނީ ވިދާޅުވެފަ އެވެ. 

އަދި މީގެ އިތުރުން ކުރިއަށް އޮތް މަޖިލިސް އިންތިޚާބު ކާމިޔާބު ކުރުމަކީ ސަރުކާރަށް މުހިންމު ކަމަކަށްވާއިރު، އެކަމާއި ގުޅިގެންވެސް، ޕާޓީގެ ލީޑަރޝިޕާއި، އަދި ސަރުކާރުގެ އިސް ބޭފުޅުން އެމަނިކުފާނުގެ ޚިޔާލާއި މަޝްވަރާ ނުހޯއްދަވާ ކަމަށް ޖަމީލް ވިދާޅުވި އެވެ. 

ރައީސް ޔާމީން ޕާޓީން އިސްތިއުފާ ދެއްވާފައިމިވަނީ، ޕީޕީއެމާއި ޕީއެންސީގެ ބައެއް މެންބަރުންގެ މެދުގައި ނުތަނަވަސްކަން އުފެދި، އެމަނިކުފާނުގެ އެންގެވުމަށް ކަމަށްބުނެ، ޕީޕީއެމްގެ ބައެއް މެންބަރުން ވަކި ކޮމިޓީއެއް އުފައްދަވައި ނޫސްވެރިންގެ ބައްދަލު ވުމެއް ބޭއްވި ފަހުން މައްސަލަ ވަރަށް ހޫނުވެފައިވާ ދަނޑިވަޅެއްގައެވެ.

ރައީސް ޔާމީން އުފެއްދެވި ކަމަށްބުނާ ކޮމިޓީން ދެއްވި އެ ނޫސްވެރިންގެ ބައްދަލުވުމައި އަދުގެ ރައީސުލްޖުމްހޫރިއްޔާ ޑރ މުހައްމަދު މުއިއްޒު އާއި ސަރުކާރަށް ފާޑުކިޔާފައިވާއިރު، އެ މައްސަލާގައި ކުރީގެ ޓެކްނޮލޮޖީ މިނިސްޓަރ މަލީހު ޖަމާލް ވަނީ މިއަދުގެ ވަގުތެއްގައި ޕީޕީއެމުން ވަކިވެސް ކޮށްފައެވެ.

ޔާމިންގެ ވަކިވުމާއި އެކު ޕީޕީއެމަށް ވެގެންދާނެ ގޮތަކާއިމެދު ސުވާލު އުފެދިފައިވާއިރު، އެމަނިކުފާނު އަމިއްލަ އައު ޕާޓީއެއް އުފައްދަވަން ނިންމަވާފައިވާ ކަންވެސް ޑރ. ޖަމީލް ވަނީ މިރޭ އިއުލާން ކުރައްވާފައެވެ.