ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) ގެ ސެނެޓަރ މުހައްމަދު މަލީހް ޖަމާލް ޕާޓީއިން ވަކިކޮށްފިއެވެ.

ޕާޓީގެ މެމްބަރު ކަމުން ވަކިކުރިކަން އަންގައި ޕީޕީއެމުން މަލީހަށް ފޮނުވި ސިޓީގައި ވަނީ ޕާޓީގެ ސެނެޓަރެއްގެ މަގާމުގައި ހުރެ މަލީހް ޕާޓީ ބަދުނާމުކުރައްވައި ޕާޓީ ބައިބައި ކުރުމަށް މަސައްކަތްތަކެއް ކުރައްވަމުންދާކަން ޕާޓީގެ ލީޑާޝިޕަށް ފާހަގަ ކުރެވި، ޕާޓީގެ ލީޑާޝިޕުން އެމަނިކުފާނު ސަސްޕެންޑް ކުރި މައްސަލަ ސުލޫކީ ކޮމެޓިއަށް ހުށައެޅުމުން މަލީހް ޕާޓީއިން ވަކިކުރުމަށް އެ ކޮމިޓީން ނިންމާފައިވާކަމަށެވެ.

މި ސިޓީގައި ޕީޕީއެމްގެ ދެ ނައިބު ރައީސުންކަމަށްވާ މިނިސްޓަރު އަހްމަދު ޝިޔާމާއި، މިނިސްޓަރު ޣައްސާން މައުމޫނު ވަނީ ސޮއިކުރައްވާފައެވެ.

Advertisement

ޕާޓީން މަލީހް ވަކިކުރުމަށް ނިންމި ސަބަބުތަކުގެ ތެރޭގައި، 2023 ގެ ނޮވެންބަރު މަހުގެ 21 ވަނަ ދުވަހު ޕާޓީގެ ލީޑާޝިޕަށާއި އޮފީހަށް ނާންގައި، މަޝްވަރާކުރުމަކާއި ނުލައި މަލީހް އިސްވެވަޑައިގެން ހުންނަވައިގެން އަމިއްލަފުޅަށް ކޮމިޓީއެއް ނަންގަވައިގެން ޕާޓީގެ ނަމުގައި ނޫސްވެރިންގެ ބައްދަލުވުމެއް ބޭއްވުން ހިމެނެއެވެ. އަދި ޕާޓީގެ މެމްބަރުންގެ މެދުގައި ފިތުނަ އުފެދޭ ފަދަ ވާހަކަތަކެއް ދައްކަވައި ޕާޓީގެ ތެރޭގައި ބައިބައިވުން އުފެދޭ ވާހަކަތައް ދައްކަވާތީ ޕާޓީގެ މަސްލަހަތު އިސްކޮށް ސުލޫކީ ކޮމެޓީން މަލީހް ވަކިކުރުމަށް ނިންމީ ކަމުގައިވެސް ޕީޕީއެމުން މަލީހަށް ފޮނުވި ސިޓީގައި ވެއެވެ.

މި މައްސަލައާއި ގުޅިގެން ސުލޫކީ ކޮމެޓީއަށް ދެ ފަހަރެއްގެ މަތީން ހާޒިރުވުމަށް މަލީހަށް އެންގި ނަމަވެސް އެ ބޭފުޅާ ހާޒިރުވެފައެއް ނުވެއެވެ.

މި ކަމާއި ގުޅޭގޮތުން މަލީހް ކުރެއްވި ޓްވީޓެއްގައި ވިދާޅުވީ އޭނާ ވަޑައިގަންނަވަނީ ގަދަ ހިފުމަކަށް ކަމަށެވެ.

"މިދަނީ ގަދަ ހިފުމަކަށް. ފުރާޅުން ޓިނު ނަގައި ކޮންކްރީޓް ސްލެބް އަކަށް ބަދަލުކޮށްފައި މިކަން ނިންމާނީ. ކަނެއްގެ އަތް ދަށު ވިޔަސް ބާ ޓިނު ގަނޑެއްގެ އަތްދަށު ނުވާތި" މަލީހް ގެ ޓްވީޓްގައި ވެއެވެ.

މީގެ ކުރިން ޕީޕީއެމުން މަލީހް ސަސްޕެންޑް ކުރުމުން މަލީހް ވަނީ ރައީސް ޔާމީންއާއި ޕީޕީއެމްގެ ދިފާއުގައިކުރާ މަސައްކަތުގައި އެންމެ އިންޗިއެއްވެސް ފަހަތަށް ޖެހުމެއް ނޯންނާނެ ކަމަށާއި، ވަޒީފާގެ އަޅުންނަށްވެ ޕާޓީގެ މަސްލަހަތު ނަގާލާ ވަޒީފާގެ ބިރަށް ސިޓީގައި ސޮއެކުރާ ފިނޑިންކުރިމަތީ ބޯތިރި ނުކުރާނެ ކަމަށް ވިދާޅުވެފައެވެ.