ކުރީގެ ރައީސް އަދި ޕީޕީއެމްގެ ލީޑަރ ރައީސް އަބްދުالله ޔާމީން އަބްދުލްގައްޔޫމްގެ އައު ޕާޓީގެ ރެޖިސްޓަރ ކުރުމަށް އަންނަ އާދިއްތަ ދުވަހު އިލެކްޝަންސް ކޮމިޝަނަށް ހުށަހަޅަން ނިންމާފައިވާ ކަމަށް ކުރީގެ ޓެކްނޮލޮޖީ މިނިސްޓަރ، އަދި މިހާރު ޔާމީނާއި އަރިސްކޮށް އުޅުއްވާ ބޭފުޅެއް ކަމަށްވާ މުހައްމަދު މަލީހު ޖަމާލު ވިދާޅުވެއްޖެއެވެ. 

ރައީސް ޔާމީންގެ އައު ޕާޓީއާއި ގުޅޭގޮތުން މައުލޫމާތު ދިނުމަށް ހަދާފައިވާ ވަޓްސްއަޕް ގުރޫޕަކަށް މަލީހު ކުރެއްވި މެސެޖެއްގައި އެމަނިކުފާނުގެ ޕާޓީ ރެޖިސްޓާ ކުރަން އާދިއްތަ ދުވަހު ހުށަހަޅާނެ ކަމަށް މިއަދު ވަނީ ވިދާޅުވެފަ އެވެ. އަދި، ޕާޓީގެ ނަމާއި ޕާޓީގެ ލޯގޯ އެދުވަހު އިއުލާން ކުރައްވާނެ ކަމަށް މަލީހު ވިދާޅުވި އެވެ. 

މިކަމާއި ގުޅިގެން މަލީހު މިއަދު ކުރެއްވި ޓްވީޓެއްގައި، ޕާޓީގެ ލޯގޯ ރައީސް ޔާމީން ފައިނަލް ކުރައްވާފައިވާ ކަމަށް ވަނީ ވިދާޅުވެފަ އެވެ. 

ރޭގެ ވަގުތެއްގައި ޗެނަލް 13 އަށް ދެއްވި ބަސްދީގަތުމެއްގައި ކުރީގެ ރައީސް އަދި ޕީޕީއެމްގެ ލީޑަރ ރައީސް ޔާމީން އަބްދުލްގައްޔޫމް ޕީޕީއެމުން ވަކިވެވަޑައިގެން އައު ޕާޓީއެއް އުފައްދަވަން ނިންމަވާފައިވާކަން އިއުލާން ކުރެއްވީ އެމަނިކުފާނުގެ އިސް ގާނޫނީ ވަކީލު ޑރ މުހައްމަދު ޖަމީލެވެ. 

ޑރ. ޖަމީލް ވިދާޅުވި ގޮތުގައި، ރައީސް ޔާމީން ޕީޕީއެމުން ވަކިވެވަޑައިގަންނަވަން ނިންމެވީ، ރައީސުލްޖުމްހޫރިއްޔާ ޑރ މުހައްމަދު މުއިއްޒު ވެރިކަމަށް އިންތިޚާބުވެ ވަޑައިގެންނެވުމާއިއެކު، ޕީޕޯއެމްގެ ލީޑަރޝިޕްގެ ބޭފުޅުން، ސަރުކާރުގެ މަގާމްތަކަށް ވަޑައިގެން، އެމަނިކުފާނާ ދުރަށް ޖެހިވަޑައިގެން، ކަންކަމުގައި އެމަނިކުފާނުގެ މަޝްވަރާ ނުހޯއްދަވައި ނިންމެވުންތައް ނިންމަވަމުން ދާތީއެވެ. އަދި ޕީޕީއެމުން ވަކިވެވަޑައިގަންނަވަން ނިންމެވި ނިންމެވުމަކީ އެމަނިކުފާނަށް ފަސޭހަ ނިންމެވުމެއް ނޫން ކަމަށް ޖަމީލް ވިދާޅުވި އެވެ. 

މީގެ އިތުރުން ޖަމީލް ވިދާޅުވީ، ރައީސް ޔާމީންގެ ތަރައްގީގެ ފިކުރު ކުރިއެރުވުމަށްޓަކައި، ކުރިއަށް އޮތް ތަނުގައި އެމަނިކުފާނުގެ ވިސްނުން ހުންނެވީ އައު ޕާޓީއެއް އުފެއްދެވުމަށް ކަމަށެވެ. 

"ޕީޕީއެމްގެ ލީޑަރޝިޕްގެ އަމަލުތަކާއި، އެބޭފުޅުން ޢަމަލު ކުރައްވަމުން ގެންދަވާ ގޮތާއި، އަދި އެބޭފުޅުން އެމަނިކުފާނުގެ މަޝްވަރާ ހޯއްދަވަން ބޭނުން ނުވާތީއާ، އެމަނިކުފާނުގެ ޚިޔާލުވެސް އެބޭފުޅުން ބޭނުން ނުވާތީއާ، މިކަންތައްތައް މިހެން އޮތުމުން، މިރޭ ރައީސް ޔާމީން ނިންމަވާފައި މިވަނީ ޕީޕީއެމް ދޫކުރައްވަން. އަދި ހަމައެހެންމެ، އެމަނިކުފާނު މިހާރު ވަނީ ނިންމަފާައި އެމަނިކުފާނުގެ ސިޔާސީ މަސައްކަތްޕުޅު، އަދި އެމަނިކުފާނުގެ ސިޔާސީ ފިކުރު، ސިޔާސީ ވިސްނުން، ކުރިއަށް ގެންދިޔުމަށްޓަކައި އެމަނިކުފާނު ވަނީ ނިންމަވާފައި ސިޔާސީ ޕާޓީއެއްވެސް އުފައްދަވަން" ޖަމީލް ވިދާޅުވި އެވެ.