ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) ގެ ސެނެޓްގެ ބައްދަލްވުމެއް މާދާމާ ރޭ ބޭއްވުމަށް ނިންމައިފި އެވެ.
ޕީޕީއެމްގެ ސެނެޓްގެ ބައްދަލްވުމެއް މާދަމާ ރޭ ބާއްވަން ނިންމާފައިވާކަން އަންގައި އެޕާޓީންވަނީ ސެނެޓަރުންނަށް ބައްދަލްވުމުގެ ދައުވަތު ފޮނުވާފައެވެ.
އޭގައި ވާގޮތުން ބައްދަލްވުމުގެ މައިގަނޑު މަސައްކަތަކަށް ވާނީ އަންނަ އަހަރު ބޭއްވުމަށް ހަމަޖެހިފައިވާ ރައްޔިތުންގެ މަޖިލީހުގެ އިންތިހާބާއި މެދު އެ ޕާޓީން ގޮތް ނިންމުމެވެ.
ޕީޕީއެމް/ޕީއެންސީން މީގެ ކުރިން ބުނެފައިވާ ގޮތުން ރައްޔިތުންގެ މަޖިލީހުގެ އިންތިޚާބުގައި ޕީޕީއެމް ޕީއެންސީއިން ވާދަ ކުރުމަށް ކެންޑިޑޭޓުން ނެރޭނީ ދެޕާޓީ އެކުގައި އެއް ކޯލިޝަނަކުންނެވެ. އެގޮތުން ވާދަކުރާ ކެންޑިޑޭޓުން ކަނޑައެޅުމަށް ބާއްވާ ޕްރައިމަރީ އަންނަ ޖެނުއަރީ 20 ވާ ހޮނިހިރު ދުވަހު ބާއްވާ ގޮތަށް ހަމަޖައްސައި ޕްރައިމަރީއަށް ކުރިމަތިލުމުގެ ފުރުސަތު ވެސް މިހާރު ވަނީ ހުޅުވާލައިފައެވެ.
ދުވަސްތަކަކަށްފަހު ޕީޕީއެމް ސެނެޓްގެ ބައްދަލުވުމެއް ބާއްވަން ނިންމާފައި މިވަނީ، އެޕާޓީގެ ރައީސްގެ މަގާމުގައި ހުންނެވި ކުރީގެ ރައީސް، ޔާމީން އަބްދުލްގައްޔޫމް ޕާޓީން އިސްތިއުފާ ދެއްވައި އައުޕާޓީއެއް އުފައްދަވަން ނިންމެވިކަން އިއުލާން ކުރައްވާފައިވާ ދަނޑިވަޅެއްގައެވެ.
ޔާމީން އެފަދައިން ނިންމަވާފައިވާކަން އިއުލާން ކުރެއްވީ އެމަނިކުފާނުގެ އިސް ގާނޫނީ ވަކީލު، ޑރ. މުހައްމަދު ޖަމީލް އަހުމަދެވެ. އަދި ޔާމީންގެ ޕާޓީ އުފެއްދުމުގައި އިސްކޮށް ހަރަކާތްތެރިވެވަޑައިގަންނަވަނީ ކުރީގެ ޓެކްނޮލޮޖީ މިނިސްޓަރ މުހައްމަދު މަލީހު ޖަމާލެވެ. އޭނާ މައުލޫމާތު ދެއްވާ ގޮތުގައި، ޔާމީންގެ ޕާޓީގެ ނަމާއި، ލޯގޯގެ އިތުރުން އަސާސީ ގަވާއިދުވެސް އެކުލަވާލެވުފައިވާއިރު، ޕާޓީ ރެޖިސްޓަރ ކުރަން އަންނަ އާދީއްތަ ދުވަހު ހުށަހަޅާނެއެވެ.
Advertisement
This content is created and paid for by advertisers and does not involve Voice Journalists
