ޕްރޮގްރެސިވް ޕާޓީ އޮފް މޯލްޑިވްސްގެ އޮފީސް ހިންގަމުން އަންނަ އިމާރާތް. ހ ހުރަފާ ހުސްކުރަން އެ ގޭގެ ވެރިފަރާތުން އެ ޕާޓީއަށް އަންގައިފިއެވެ.

ޕީޕީއެމް އޮފީސް ހުސްކުރަން އަންގާފައި މި ވަނީ، އެ ޕާޓީން ކުރީގެ ރައީސް އަބްދުﷲ ޔާމީން ދުރަށްޖެހިވަޑައިގެން އާ ޕާޓީއެއް ހެދުމުގެ މަސައްކަތް ފަށާފައިިފައިވާ މިދަނޑިވަޅުގައެވެ.

ގޭގެ ވެރިފަރާތުން ފޮނުވި ސިޓީގައި އެދިފައި ވަނީ އެއް ދުވަހުގެ ތެރޭގައި އޮފީސް ހިންގަމުން އަންނަ ތަން ހުސްކުރުމަށެވެ.

ޕީޕީއެމްއާއި ދުރަށް ޖެހިވަޑައިގެން ކުރީގެ ރައީސް ޔާމީން އުފެއްދެވުމަށް މަސައްކަތް ކުރައްވަމުން ގެންދަވާ އައު ޕާޓީ އުފެއްދެވުމުގެ މަސައްކަތުގައި ހަރަކާތްތެރިވާ މުހައްމަދު މަލީހު ޖަމާލްވަނީ މިކަން ވޮއިސްއަށް ކަށަވަރު ކޮށްދެއްވާފައެވެ. 

މިގޮތުން ހުރަފާ ހުސްކުރުމަށް ޕީޕީއެމަށް ފޮނިވި ސިޓީގައި ވަނީ ސިޓީގައި އެގޭ ގްރައުންޑް ފްލޯ އަދި އެއް ވަނަ ފަންގިފިލާ ކުއްޔަށް ދޫކުރީ ރައީސް ޔާމީންގެ އެދިވަޑައިގަތުމުގެ މަތިން، ރައީސް ޔާމީންގެ އޮފީހެއް ހިންގެވުމަށްކަމުގައި ވަނީ ބުނެފައެވެ. 

މީގެ އިތުރުން ކުއްޔަށް ދޫކުރެެވިފައިވާ ތަނުގައި މިހާރު ޕީޕީއެމްގެ އޮފީހެއް ހިންގަމުން އަންނަކަން ވަނީ ފާހަގަ ކުރެވިފަ.އި ވާކަމަށާއި ވުމާއެކު ދެ ފަރާތުގެ ދެމެދުގައި ވެފައިވާ އެއްބަސްވުން ނިމުމަކަށް ގެނައުމަށް ނިންމައި ނޮވެމްބަރު 24 ވަނަ ދުވަހުގެ މެންދުރުގެ ކުރިން ތަން ހުސްކޮށް ވެރިފަރާތާއި ހަވާލުކުރުމަށް އެ ސިޓީގައި ވަނީ އެދިފައެވެ. 

ޕާޓީގެ ލީޑާޝިޕުން އެމަނިކުފާނު އެއްފަރާތްކޮށްފައިވާ ކަމަށް ބުނެޕީޕީއެމުން ވަކިވެ ވަޑައިގެން ރައީސް ޔާމީން އާ ޕާޓީއެއް ހެދުމަށް ވަނީ ނިންމާފައެވެ. 

ރައީސް ޔާމީން އަލަށް ހަދާ ޕާޓީގެ މަސައްކަތް މިހާރު ފަށާފައިވާއިރު އެ ޕާޓީ އުފެއްދުމުގެ ހުއްދައަށް މާދަމާ އެދޭނެ ކަމަށް އެ މަސައްކަތުގައި އިސްކޮށް އުޅޭ ފަރާތްތަކުން ބުނެއެވެ.