ޝަރުޠު ހަމަވާ ކޮންމެ ރައްޔިތަކަށްވެސް ސިޔާސީ ޕާޓީއެއް އުފެއްދޭނެކަމަށް އިލެކްޝަންސް ކޮމިޝަންގެ ނައިބު ރައީސް އިސްމާއިލް ހަބީބު ވިދާޅުވެއްޖެއެވެ.
ހަބީބް މިފަދައިން ވިދާޅުވީ މިއަދު ކުރެއްވި ޓްވީޓެއްގައެވެ.
މި ޓްވީޓް ކުރައްވާފައި މިވަނީ ކުރީގެ ރައީސް ޔާމީން އަބްދުލް ގައްޔޫމް ޕީޕީއެމް ގެ ރައީސްކަމުން އިސްތިއުފާ ދެއްވައި، އައު ޕާޓީއެއް އުފެއްދެވުމަށް އިއުލާން ކޮށްފައިވާ ދަނޑިވަޅެއްގައި ކަން ފާހަގަ ކޮށްލަން ޖެހެއެވެ.
"ޤާނޫނުއަސާސީގެ 30 ވަނަ މާއްދާ އިން، ސިޔާސީ ޕާޓީ އުފައްދައި، ހިންގައި، ޕާޓީތަކުގެ ޙަރަކާތްތަކުގައި ބައިވެރިވުމުގެ ޙައްޤު ކޮންމެ ދިވެހި ރައްޔިތަކަށް ލިބިދީފައިވޭ.ސިޔާސީ ޕާޓީއެއް އުފެއްދުމަށް ޝައުޤުވެރިވާކަން ބަޔާންކޮށް އަންނަނިވި ޝަރުޠު ހަމަވާ ދިވެހި ކޮންމެ ރައްޔިތަކަށްވެސް އިލެކްޝަންސް ކޮމިޝަނަށް ހުށަހެޅިދާނެ."
އިސްމާޢީލް ހަބީބް
މި ޓްވީޓްގައި އާ ޕާޓީއެއް އުފައްދާ ފަރާތްތަކުގެ ކިބައިގައި ހުންނަން ޖެހޭ ޝަރުތުތައްވެސް ހަބީބް ވަނީ ބަޔާން ކުރައްވާފައެވެ. އެއީ؛
• ދިވެހި ރައްޔިތަކަށްވުން
• ބުއްދި ސަލާމަތުން ހުރި މީހެއްކަމުގައިވުން
• އެހެން ސިޔާސީ ޕާޓީއެއްގެ މެންބަރަކަށް ނުވުން
• އެމީހެއްގެ މައްޗަށް ޝަރުޢީ ޙުކުމެއް ތަންފީޛުކުރެވެމުންދާ މީހެއްކަމުގައި ނުވުން
• އެހެން ޤައުމެއްގެ ރައްޔިތަކަށް ނުވުން
• ސާބިތު ދަރަންޏެއް ދައްކަމުން ނުދާ މީހެއްކަމުގައި ނުވުމާއި،
• ޖިނާއީ ކުށެއް ކުރިކަން ސާބިތުވެގެން 12 މަސްދުވަހަށްވުރެ ދިގު މުއްދަތެއްގެ ޙުކުމެއް އޭނާގެ މައްޗަށް ކޮށްފައިވާ މީހަކުނަމަ، އެ ޙުކުމެއް ތަންފީޛުކޮށް ނިމުނުތާ ނުވަތަ އެ ޙުކުމުން ކަނޑައެޅުނު އަދަބު މަޢާފުކުރެވުނުތާ 3 އަހަރުދުވަސް ވެފައިވުން.
• މަސްތުވާތަކެތީގެ ވިޔަފާރި ކުރުމާއި، ކުޑަކުދިންނާ ބަދުއަޚުލާޤީ ޢަމަލު ހިންގިކަން އެއްވެސް އިރެއްގައި ޝަރީޢަތަށް ސާބިތުވެފައިވާ މީހެއްކަމުގައި ނުވުން
• ސިޔާސީ ޕާޓީއެއްގައި އުޅުން މަނާ މީހަކު ކަމުގައި ނުވުން
މީގެ އިތުރުންވެސް ހަބީބް ވިދާޅުވީ ސިޔާސީ ޕާޓީއެއްގެ ގޮތުގައި ސިޔާސީ ޕާޓީގެ ދަފްތަރުގައި ރަޖިސްޓަރީކުރާ ޕާޓީއެއްގެ ނަމާއި، ނިޝާނާއި ސިއްކައާއި އެނޫންވެސް ޕާޓީ ރަމްޒުކޮށްދޭ އެއްޗެހި، އެ ދަފުތަރުގައި ކުރިން ރަޖިސްޓަރީކޮށްފައިވާ އެހެން ޕާޓީއެއް ރަމްޒުކޮށްދޭ އެއްޗެއްސާ އެއްގޮތްވެގެން ނުވާނެކަމަށެވެ.
އަދި ސިޔާސީ ޕާޓީއެއްގެ ނަމުގައި، މީހެއްގެ އަމިއްލަ ނަން ނުވަތަ ވަނަން ނުވަތަ ދިވެހިރާއްޖޭގެ ވަކި ސަރަޙައްދަކަށް ނުވަތަ ވަކި އަތޮޅަކަށް ނުވަތަ ވަކި ރަށަކަށް ނުވަތަ ވަކި އަވަށަކަށް ކިޔާނަން ހިމަނައިގެން ނުވާނެކަމަށްވެސް ވިދާޅުވިއެވެ.
ސިޔާސީ ޕާޓީއެއް އުފައްދާ ފަރާތުގެ ޝަރުތު ތަކުގެތެރޭގައި އެމީހެއްގެ މައްޗަށް ޝަރުޢީ ޙުކުމެއް ތަންފީޛުކުރެވެމުންދާ މީހެއްކަމުގައި ނުވުމާއި 12 މަސްދުވަހަށްވުރެ ދިގު މުއްދަތެއްގެ ޙުކުމެއް އޭނާގެ މައްޗަށް ކޮށްފައިވާ މީހަކުނަމަ، އެ ޙުކުމެއް ތަންފީޛުކޮށް ނިމުނުތާ، ނުވަތަ އެ ޙުކުމުން ކަނޑައެޅުނު އަދަބު މަޢާފުކުރެވުނުތާ 3 އަހަރުދުވަސް ވެފައިވުން ހިމެނޭތީ ރައީސް ޔާމީނަށް ސިޔާސީ ޕާޓީއެއް އުފެއްދިދާނެތޯ އަންނަނީ ގިނަ ބަޔަކު ސުވާލު އުފައްދަމުންނެވެ. ސަބަބަކީ ރައީސް ޔާމީން ރަށު ބަންދަށް ދޫކޮށްލައްވާފައި ހުންނެވި ކަމުގައި ވިޔަސް، އެ މަނިކުފާނު ދަނީ އާރަށު މައްސަލައިގައި 11 އަހަރުގެ ހުކުމެއް ތަންފީޒު ކުރަމުންނެވެ.
ޕީޕީއެމް ގެ ތެރޭގައި އުފެދުނު ހަމަނުޖެހުމުގައި ރައީސް ޔާމީން ޕާޓީގެ ރައީސް ކަމުގެ މަގާމުން އިސްތިއުފާ ދެއްވާފައިވާއިރު، ޕީޕީއެމްގެ ލީޑަރޝިޕްގެ ގިނަ ބޭފުޅުން ވަނީ ރައީސް ޔާމީން އާ ޕާޓީއެއް އުފެއްދެވުމާއި ދެކޮޅު ހައްދަވާ، ރައީސް ޑރ. މުއިއްޒު އާއި އެކު ތިއްބެވިކަން ހާމަކުރައްވާފައެވެ.
އަދި މިހާރު ޕީޕީއެމް އަކީ ރައީސް ޔާމީންގެ ޕާޓީއަކަށް ނުވާތީ ޕީޕީއެމް ހިންގަމުން އަންނަ އޮފީހުގެ އިމާރާތުގެ ވެރިފަރާތުން ވަނީ އެ އޮފީސް ހުސްކޮށް އެއްދުވަހުގެ ތެރޭގައި އެ ބައި ވެރިފަރާތާއި ހަވާލުކުރުމަށް ޕީޕީއެމް އަށް އަންގާފައެވެ.
Advertisement
This content is created and paid for by advertisers and does not involve Voice Journalists
