ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރާއެކުު ސާބިތުކަމާއެކު ދެމި ހުންނާނަނެކަމަށް މޯލްޑިވްސް ނޭޝަނަލް ޕާޓީ (އެމްއެންޕީ)ގެ ރައީސް އަދި ކުރީގެ ޑިފެންސް މިނިސްޓަރ މުހައްމަދު ނާޒިމް ވިދާޅުވެއްޖެއެވެ.
މިއަދު އެކްސް ގައި ކުރެއްވި ޓްވީޓެއްގައި ނާޒިމް ވިދާޅުވީ އުޖާލާ ޒަމާނަކަށް ދިވެހި ރައްޔިތުންގެ ފުރިހަމަ ތާއީދާއެކު ޤައުމުގެ ވެެރިކަމަށް އިންތިޚާބު ކުރެއްވި ޑރ.މުޙައްމަދު މުޢިއްޒުގެ ސަރުކާރާއެކުު އެމްއެންޕީގެ އެންމެހާ މެންބަރުންނާއި އެކު އެބޭފުޅާ ސާބިތުކަމާއެކު ދެމިހުންނާނެކަމުގެ ފުރިހަމަ ޔަޤީންކަން ދިވެހި ރައްޔިތުންނަށް އަރުވަން ކަމަށެވެ.
މީގެ އިތުރުން ނާޒިމް ވަނީ ޤައުމުގެ ތަރައްޤީއާއި ރައްޔިތުންގެ ހެވާލާބައަށްޓަކައި ރައީސް ޑރ.މުޙައްމަދު މުޢިއްޒު ކުރިއަށްގެންދަވާ ތަރައްޤީގެ މަސައްކަތުގައި ރައްޔިތުން އެއްބާރުލުންދެއްވުމުގައި ދެމިތިއްބެވުމަށް ވެސް އިލްތިމާސް ކުރައްވާފައެވެ.
ނާޒިމް މިފަދައިން ވިދާޅުވެފައި މިވަނީ ކުރީގެ ރައީސް ޔާމީން އަބްދުލް ގައްޔޫމް ޕީޕީއެމް އިން ވަކިވެވަޑައިގެން އަމިއްލަ ޕާޓީއެއް އުފެއްދެވުމުގެ މަސައްކަތް ކުރިއަށް ގެންދާ ދަނޑިވަޅެއްގައެވެ.
ރައީސް ޔާމީން އާ ޕާޓީއެއް އުފެއްދުމާއި މެދު ޕީޕީއެމްގެ ލީޑާޝިޕްގެ ގިނަ ބޭފުޅުންވެސް ދަނީ ދެކޮޅު ހައްދަވަމުންނެވެ. އަދި ގިނަ ބޭފުޅުން ދަނީ ޑރ.މުއިއްޒު އާއި އެކު ތިއްބެވިކަން ހާމަކުރައްވަމުންނެވެ.
Advertisement
This content is created and paid for by advertisers and does not involve Voice Journalists
