ކުރީގެ ރައީސް ޢަބްދުالله ޔާމީން އަބްދުލްގައްޔޫމް އުފައްދަވާ އައު ޕާޓީގެ އިދާރީ ކަންކަން ހިންގާ ތަނަކަށް ޕީޕީއެމްގެ އޮފީސް ކުރިން ހިންގަމުން ދިޔަ ތަން ހަމަޖައްސައިފި އެވެ. 

ރައީސް ޔާމީންގެ އައު ޕާޓީ ހިންގުމުގެ ކަންކަމުގައި އިސްކޮށް ހަރަކާތްތެރިވެވަޑައިގަންނަވާ ކުރީގެ ޓެކްނޮލޮޖީ މިނިސްޓަރ މުހައްމަދު މަލީހު ޖަމާލު، ޕާޓީ އުފެއްދުމުގެ ކަންކަން ކުރިއަށްދާ ގޮތުގެ ތަފްސީލް ދެއްވަމުން ވިދާޅުވީ، އެ ޕާޓީ ރެޖިސްޓަރ ކުރުމުގެ ކަންކަމަށް މިއަދު ހެނދުނު 10އެއް ޖަހާއިރު ޕާޓީ އީސީއަށް ދާނެ ކަމަށެވެ. އަދި ޕާޓީ އުފެއްދުމުގެ ހުއްދަޔަށް އެދޭނީ ރައީސް ޔާމީންގެ ފަރާތްޕުޅުން ހަމަޖައްސަވާފައިވާ 4 ބޭފުޅަކު ކަމަށްވެސް މަލީހު ވިދާޅުވި އެވެ. ނަމަވެސް އެ ބޭފުޅުންގެ ނަންތައް ހާމައެއް ނުކުރެއެވެ. 

މީގެ އިތުރުން މަލީހު ވަނީ ރޭ ރައީސް ޔާމީންގެ ޕާޓީގެ ނަމާއި ލޯގޯ އަންވެއިލްކުރުމާއި އެކު ޔާމީނަށް މަރުޙަބާ ދެންނެވި ފަރާތް ތަކަށް ޝުކުރު އަދާކުރައްވާފައެވެ. އަދި މިހާރު ސޯޝަލް މީޑިއާ ހެންޑްލްތައް ވެރިފައި ކުރުމުގެ މަސައްކަތް ފެށިފައިވާ ކަމަށްވެސް ވިދާޅުވި އެވެ. 

Advertisement

"(ޕާޓީގެ) އިދާރީ ހިންގުން ކުރިޔަށް ދާނީ ހ.ހުރަފަ ގޭގައި. މިއީ ޔާން ސްޕީޑް" މަލީހު ވިދާޅުވި އެވެ. 

ޔާމީންގެ ޕާޓީ އުފައްދަވާކަން ބުރާސްފަތިދުވަހު އިއުލާނު ކުރެއްވުމާއެކު، އިއްޔެގެ ވަގުތެއްގައި، ޕީޕީއެމް އޮފީސް ހިންގަމުން އައި އިމާރާތް ހުސްކުރުމަށް އެޕާޓީއަށް ވަނީ އަންގާފައެވެ. އަދި ޖަމީލްވެސް ވަނީ އިއްޔެ ޕީޕީއެމުން ވަކިވެވަޑައިގެންފައެވެ. 

ރައީސް ޔާމީންގެ އަޢު ޕާޓީއަށް ކިޔާ ނަން ރޭގެ ވަގުތެއްގައި ހާމަ ކޮށްފައިވާއިރު، ޕާޓީއަށް ކިޔަން ފާސްކޮށްފައި ވަނީ "ޕީޕަލްސް ނޭޝަނަލް ފްރޮންޓް(ޕީއެން ފްރޮންޓް)" އެވެ. ޕާޓީގެ ކުލައެއްގެ ގޮތުގައި ހަމަޖައްސާފައި ވަނީ ދަނބު ކުލައެވެ. ރޭ ވަނީ އެޕާޓީގެ ލޯގޯ ވެސް ފައިނަލްކޮށް މީސްމީޑިއާ ޕްލެޓްފޯމް ތައްވެސް ހަދާފައެވެ. 

ޕީޕަލްސް ނޭޝަނަލް ފްރޮންޓް(ޕީއެންއެފް) ލޯގޯ

އެމަނިކުފާނު ޕީޕީއެމުން ވަކިވެ ވަޑައިގެންނެވީ  ޕާޓީގެ ލީޑަރޝިޕްގެ ބައެއް ބޭފުޅުން އެމަނިކުފާނާ ދުރަށް ޖެހިވަޑައިގެން،ކަންކަމުގައި އެމަނިކުފާނުގެ މަޝްވަރާ ނުހޯއްދަވައި ނިންމެވުންތައް ނިންމަވަމުންދާ ކަމަށް އެމަނިކުފާނަށް ދެކެވޭތީ ކަމަށް އެމަނިކުފާނުގެ ގާނޫނީ ވަކީލު ޑރ. މުހައްމަދު ޖަމީލް އަހުމަދު ވަނީ ވިދާޅުވެފައެވެ.