ޕީޕީއެމް/ޕީއެންސީގެ ލީޑަރޝިޕްގެ ބޭފުޅުން ކުރީގެ ރައީސް ޔާމީން އަބްދުލްގައްޔޫމް ބާކީ ކޮށްލެއްވި ކަމަށް ބުނެ، ކުރެވެމުންދާ ސުވާލުތަކަށް، ޕީއެންސީގެ ޗެއާޕާސަން އަބްދުއްރަހީމް އަބްދުالله ޖަވާބުދެއްވައިފިއެވެ. 

ޕީޕީއެމް/ ޕީއެންސީގެ ލީޑަރޝިޕްގެ ބައެއް ބޭފުޅުން ރައީސް ޔާމީން އާއި ދުރަށް ޖެހިވަޑައިގެން، ކަންކަމުގައި އެމަނިކުފާނުގެ މަޝްވަރާ ނުހޯއްދަވައި ނިންމެވުންތައް ނިންމަވަމުންދާ ކަމަށް އެމަނިކުފާނަށް ދެކެވޭތީ ކަމަށް ވިދާޅުވެ، ރައީސް ޔާމީން އެ ޕާޓީން ވަކިވެވަޑައިގެން، ޕީޕަލްސް ނެޝަނަލް ފްރޮންޓްގެ ނަމުގައި އައު ޕާޓީއެއް އުފައްދަވަން މިއަދު ވަނީ އީސީއަށް ހުށަހަޅާފައެވެ. 

ޔާމީން ޕީޕީއެމުން ވަކިވެވަޑައިގެން އައު ޕާޓީއެއް އުފައްދަވަން ނިންމެވި ސަބަބު ތަކުގެ ތަފްސީލް މީޑިއާތަކަށް ދެއްވަމުން ޖަމީލް އާއި ރައީސް ޔާމީނަށް ތާއީދު ކުރައްވާ ފަރާތްތަކުން އަންނަނީ ގިނަ ސުވާލު ތަކެއް ކުރައްވަމުންނެވެ. އެގޮތުން، ޔާމީން ބޭއްވެވި ދެ ޖަލްސާއާއި އެމަނިކުފާނުގެ ޝަރީއަތް ތަކަށް ލީޑަރޝިޕް ބޭފުޅުން ބޭފުޅުން މިފަހުން ވަޑައިނުގަންނަވާކަން އެފަރާތްތަކުން އަންނަނީ ފާހަގަކުރައްވާފައެވެ. އެނޫންވެސް ޔާމީން މިނިވަން ނުކުރެއްވި ސަބަބާއި، އެމަނިކުފާނުގެ ފޯން ކޯލަށް ރައީސުލްޖުމްހޫރިއްޔާ ޑރ މުހައްމަދު މުއިއްޒު ޖަވާބު ނުދެއްވާ ކަމަށް ބުނެ ވެސް ސުވާލުތަކެއް އަންނަނީ ކުރެވެމުންނެވެ. 

އެހުރިހާ ސުވާލުތަކެއްގެ ޖަވާބު، އަބްދުއްރަހީމް ވަނީ ސަންގު ޓީވީގެ ޕްރޮގްރާމުގައި ދެއްވާފައެވެ. 

އެގޮތުން ވެރިކަމުގެ ފުރަތަމަ ދުވަހު ރައީސް ޔާމީން މިނިވަންނުވި ސަބަބަކީ ކޮބައިތޯ ކުރެވެމުންދާ ސުވާލަށް ޖަވާބު ދެއްވަމުން އަދުރޭ ވިދާޅުވީ، "ރައީސް މުޢިއްޒު ވިދާޅުވެފައި އޮންނާނެ ޝަރުޢީ ނިޒާމަކަށް އެމަނިކުފާނު އަތް ނުބާނުއްވާނަމޭ، ހުވާ ކުރެއްވި ޖަލްސާގައި ވަރަށް ސާފުކޮށް ވިދާޅުވި މިއަދުން ފެށިގެން ސަރުކާރުން ޝަރުއީ ނިޒާމަށްބއަތް ބޭނުން ނިމުނީއޭ. (ރައީސް ޔާމީން) މިނިވަންކުރުން އެއީ ރައީސް ޑރ. މުޢިއްޒު އަތުގައި އޮތް ކަމެއް ނޫން" ކަމަށެވެ. އަދި "ޝަރީޢަތުގައި އޮންނަ މައްސަލައެއް ނިންމައިފީމޭ، ތިހުރީ މިނިވަންވެފައޭ ބުނުމުގެ އިޚްތިޔާރެއް." ރައީސުލްޖުމްހޫރިއްޔާ އަށް ނޯންނަ ކަމަށްވެސް އަދުރޭ ވިދާޅުވިއެެވެ. 

ރައީސް ޔާމީންގެ ފޯނަށް، ރައީސް ޑރ. މުއިއްޒު ޖަވާބު ނުދެއްވަނީ ކީއްވެތޯ ކުރަމުންދާ ސުވާލަށް ޖަވާބު ދެއްވަމުން އަދުރޭ ވިދާޅުވީ ގުޅުއްވާ ވަގުތެއްގެ ގޮތުން ޖަވާބު ނުދެއްވުނަސް ރައީސް މުޢިއްޒަކީ ޔާމީންގެ ކޯލަށް ޖަވާބު ނުދެއްވައި ހުންނަވާނެ ބޭފުޅެއް ނޫން ކަމަށާ، ރައީސް ޔާމީން ރައީސް މުޢިއްޒަށް ގުޅުއްވަން ބޭނުންފުޅު ނަމަ ގުޅުއްވޭނެ ކަމަށެވެ. 

މީގެ އިތުރުން ކުރެއްވި އެހެން ސުވާލު ތަކާއި އެ ސުވާލަށް އަދުރޭ ދެއްވި ޖަވާބު ތަކަކީ؛ 

"މާ ކުރިން ޓޭބަލް ކުރެވިފައި އޮތް އިވެންޓެއް އޮތް ހޮޓެލް ޖެންގައި. ރައީސް ޔާމީންެ އޮފީހަށް ޖަލްސާއަށް ވަޑައިގަންނަވާ ވާހަކަ ކުރިން ވިދާޅެއް ނުވޭ. ކުއްލިއަކަށް ނިންމެވި ނިންމެވުމަށް ވަޑައިގެންނެވީ. އަޅުގަނޑުމެން އެންމެން ތިބީ ޖެންގައި. އެތަނަށް ވަޑައި ނުގަންނަވާ ޓޮމްއާ ޝުޖާއު ރައީސް ޔާމީން ޖަލްސާ އޮތް ތަނަށް ވަޑައިގެން. ޖެހިގެން އައިރޭ އަޅުގަނޑުމެން އެންމެން ދިޔައީ ރައީސް ޑރ. މުޢިއްޒު ފުރުއްވަން އެއާޕޯޓަށް. ޝިޔާމް ވަޑައިގެންނެވި ޔާމިން ޖަލްސާއަށް. އެތާ އިންނަވާފައި ޔާމީން އަށް ދަންނަވާފައި އެއާޕޯޓް އަށް ވަޑައިގެންނެވީ." އަދުރޭ ވިދާޅުވިއެެވެ. 

އެ ސުވާލަށް ޖަވާބު ދެއްވަމުން އަދުރޭ ވިދާޅުވީ އޭނާ އަކީ ޕީއެންސީގެ ޗެއާޕާސަން ކަމަށް ވުމުން އޭނާގެ ރަށުގެ އިސް ބޭފުޅުން ޕީއެންސީގައި ބައިތިއްބަން ބޭނުންވާތީ އެ ނިންމުން ނިންމެވީ ކަމަށެވެ. 

ޝަރީއަތަށް ނުދަނީ ކީއްވެތޯ ކުރި ސުވާލަށް ޖަވާބު ދެއްވަމުން އަދުރޭ ވިދާޅުވީ، ކުރިން ޔާމީންގެ ޝަރީއަތަށް ލީޑާޝިޕްގެ ބޭފުޅުން ވަޑައިގެންނެވި ކަމަށާށ އެހެން ނަމަވެސް އިންތިގާލީ މަރުހަލާގައި އެންމެންވެސް އުޅުއްވީ ވަރަށް ބުރަކޮށް ކަމަށެވެ. 

"އެންމެ ފަހުން ކުރިއަށް ދިޔައިރު، މަޖިލީހުގެ ޖަލްސާއެއް ކުރިއަށް ދިޔަ. އެވަރުންވެސް ޝިޔާމް، ޝުޖާއު އަދި ޠާރިގު ވަޑައިގެންނެވި." އަދުރޭ ވިދާޅުވިއެެވެ. 

އަދުރޭ ވިދާޅުވީ ވަކި އޮފީހެއް ހެދުމަކީ މައްސަލައަކަށް ހަދަންވީ ސަބަބެއް ވެސް ނޫން ކަމަށާ، ޕާޓީއެއް ނަމަ އޮފީހެއްވެސް ހުންނަން ޖެހޭއިރު ޕީއެންސީ އަކީ ވެރިކަން ކުރާ ޕާޓީކަމަށެވެ. 

އަދި ޕީއެންސީއަށް ގިނަ އަދަދެއްގެ މެންބަރުން ވަންނަމުން އަންނަ ކަމަށާ، އެ ފޯމު ތަކުގެ މަސައްކަތް އެތަނުގައި ކުރުމަށް އައު އޮފީހެއް ހުޅުވީ ކަމަށް އަދުރޭ ވިދާޅުވިއެެވެ. 

އެ ސުވާލުގެ ޖަވާބު ދެއްވަމުން އަދުރޭ ވިދާޅުވީ ރައީސް މުޢިއްޒު މާލޭގެ ރައްޔިތުންނާއި ބައްދަލު ކުރައްވަން އެންމެ ފުރަތަމަ ބޭއްވި ޖަލްސާގައި ވެސް ފުރަތަމަ ޝުކުރު އަދާކުރެއްވީ ރައީސް ޔާމީން އަށް ކަމަށެވެ. 

"ހުވާ ކުރެއްވުމުގެ ޖަލްސާ އަކީ މަޖިލީހުގެ ޖަލްސާ އެއް. އެ ޖަލްސާގައި ހުވާ ކުރައްވާ ބޭފުޅެއް މުޚާތަބުކުރަން ވާނީ މަޖިލީހުގެ ރައީސް އާއި މެންބަރުންނަށާއި ދިވެހި ރައްޔިތުންނަށް. އެއީ އެކަން ހިނގައިދިޔަ ގޮތަކީ." އަދުރޭ ވިދާޅުވިއެެވެ. 

އަދުރޭ ވިދާޅުވީ ޕީޕީއެމް ހައިޖެކް ނުކުރައްވާ ކަމަށާ އަދި ރައީސް ޔާމީން އަށް އިންޒާރުވެސް ނުދެއްވާ ކަމަށެވެ. 

"އެއްވެސް އިންޒާރެއް ނުދެން. ދެއްވި އިންޒާރެއް ވިދާޅުވެދެއްވާ. އިންޒާރުވެސް ދެއްވީ ޖަމީލާއި މަލީހު. އެނޫން ކަންކަންވެސް ކުރެއްވީ. ރައީސް ޔާމީންއަށް މިހާތަނަށް އެ ލިބޭ އަނިޔާގެ އެންމެ ބޮޑު ހިއްސާ އޮތީ ޖަމީލާ މަލީހާ ދެމީހުން." އަދުރޭ ވިދާޅުވިއެެވެ. 

އަދުރޭ ވިދާޅުވީ ސަރުކާރު އެކުލަވައިލުމަކީ ގާނޫނު އަސާސީން ރައީސުލްޖުމްހޫރިއްޔާ އަށް ލިބިދީފައިވާ ބާރެއް ކަމަށެވެ. 

"ރައީސުލްޖުމްހޫރިއްޔާ އަށް ގާނޫނު އަސާސީގެ 115 ވަނަ މާއްދާއިން ލިބިދޭ އިޚްތިޔާރެއް އެއީ އެމަނިކުފާނުގެ މަސްއޫލިއްޔަތު ތަކާއި ވާޖިބުތައް އަދާކުރުމަށް އައްޔަންކުރަންޖެހޭ މެންބަރުން އައްޔަންކުރުމާއި ވަކިކުރުން." އަދުރޭ ވިދާޅުވިއެެވެ.