ކުރީގެ ރައީސް ޢަބްދުالله ޔާމީން އަބްދުލްގައްޔޫމް އުފައްދަވާ އައު ޕާޓީ، ޕީޕަލްސް ނެޝަނަލް ފްރޮންޓް (ޕީއެންއެފް) އުފެއްދުމަށް އިލެކްޝަންސް ކޮމިޝަންގައި ހުއްދައަށް އެދިފައިވަނީ އެމަނިކުފާނުގެ ދަރިކަލުން، ޒޭން ޔާމީންގެ ނަންފުޅުގައި ކަމަށް، ޕާޓީ އުފެއްދުމުގައި އިސްކޮށް ހަރަކާތްތެރިވާ ކުރީގެ ޓެކްނޮލޮޖީ މިނިސްޓަރ މުހައްމަދު މަލީހު ޖަމާލް ވިދާޅުވެއްޖެއެވެ.
ރައީސް ޔާމީންގެ އައު ޕާޓީ އުފެއްދުމުގެ ހުއްދައަށް އެދުމަށް، އެކަމުގައި އިސްވެ ހަރަކާތްތެރިވާ ފަރާތްތައް ވަނީ މިއަދު އީސީއަށް ވަޑައިގެންފައެވެ. އޭގޮތުން ވަޑައިގެންނެވި ބޭފުޅުންގެ ތެރޭގައި އިސްކޮށް ތިއްބެވީ ޔާމީންގެ އިސް ގާނޫނީ ވަކީލު ޑރ މުހައްމަދު ޖަމީލް އާއި މަލީހެވެ.
ޕާޓީ އުފެއްދުމުގެ ހުއްދައަށް އެދި އީސީއަށް ހުށަހެޅުމަށްފަހު، ނޫސްވެރިންނަށް މައުލޫމާތު ދެއްވަމުން މަލީހު ވިދާޅުވީ، ޔާމީން އަށް އައު ޕާޓީއެއް އުފައްދަވަން ޖެހިވަޑައިގެންނެވީ އެމަނިކުފާނުގެ ޕާޓީ، ޕީޕީއެމް، އެމާނިކުފާނުގެ އަތްޕުޅުން "ބަޔަކު ފޭރިގެންފައިވާތީ" ކަމަށާ، އެކަމުގައި އިސްކޮށް ހުންނެވީ ޕީއެންސީގެ ޗެއާޕާސަން އަބްދުއްރަހީމް އަބްދުالله ކަމަށެވެ.
އެހެންކަމުން، އެމަނިކުފާނުގެ އައު ޕާޓީއެއް އުފެއްދެވުމުގެ މަސައްކަތް މިހާރު ފެށިފައިވާއިރު، އެކަމަށް އީސީގެ ފުރިހަމަށް އެއްބާރުލުން ދެއްވާނެ ކަމުގެ ޔަގީންކަން މިއަދު އީސީން ދީފައިވާ ކަމަށް މަލީހު ވިދާޅުވި އެވެ.
މަލީހު އިތުރަށް ވިދާޅުވީ، ޔާމީންގެ ޕާޓީގެ މުއައްސިސުންގެ ގޮތުގައި، އެމަނިކުފާނު ހިމެނިވަޑައިގަންނަވާހެން 8 ބޭފުޅުން ތިބުމަށް އެމަނިކުފާނު އެދިލައްވާކަމަށެވެ. އެހެން ނަމަވެސް އީސީގެ ގަވާއިދުގައިވާ ގޮތުން ޕާޓީގެ މުއައްސިސުންގެ ގޮތުގައި ހުންނެވެނީ އެކަކަށް ކަމަށް ވާތީ، ޔާމީންގެ ޕާޓީގެ މުއައްސިސެއްގެ ގޮތުގައި ހަމަޖެއްސެވީ އެމަނިކުފާނުގެ ދަރިކަލުން ޒޭން ޔާމިން ކަމަށް މަލީހު ވިދާޅުވި އެވެ.
"މިވަގުތު ރާއްޖޭގެ އިލެކްޝަންސް ކޮމިޝަންގެ ގަވާއިދު ބުނާގޮތުން އެންމެ މީހަކަށް މި ހުއްދަ (ޕާޓީ އުފެއްދުމުގެ ހުއްދަ) ދޫކުރެވެނީ. އެހެންވީމާ އޭގެ ތެރެއިން އަޅުގަނޑުމެންނަށް މިހާރު ވާހަކަ ދެކެވިފައި މިވަނީ، ޒޭން އަބްދުالله ޔާމީންގެ ނަންފުޅުގައި ހުއްދަ ދޭން އެދެން."
މުހައްމަދު މަލީހު ޖަމާލް
ޒޭން އާއި ޔާމީންގެ އިތުރުން ޕާޓީގެ މުއައްސިސުންގެ ގޮތުގައި ތިއްބެވުމަށް ޔާމީން ހަމަޖެއްސެވި ބޭފުޅުންނަކީ؛
• ޔާމީންގެ އިސް ގާނޫނީ ވަކީލު ޑރ. މުހައްމަދު ޖަމީލް އަހުމަދު
• ކުރީގެ ސީޕީ، ހުސައިން ވަހީދު
• ޔާމީންގެ ސަރުކާރުގެ ޗީފް އޮފް ސްޓާފް އަހުމަދު މުސްތަފާ (މުސްތޮ)
• މިފްކޯގެ ކުރީގެ ސީއީއޯ އަދި މެނޭޖިން ޑިރެކްޓަރު، އަދްލީ އިސްމާއިލް
• ޕީޕީއެމް ސެނެޓް މެންބަރެއްގެ ގޮތުގައި ހުންނެވި ދަތުގެ ޑރ. ޖިހާދު
• ޔާމީން ސަރުކާރުގައި ޓްރިވެންޑްރަމްގައި ކޮންސިއުލްގެ މަޤާމު އަދާކުރެއްވި އަލީ އާދަމް، ކަކާގޭ އަލިބެ.
Advertisement
This content is created and paid for by advertisers and does not involve Voice Journalists
