ކުރީގެ ރައީސް އަބްދުالله ޔާމީން އަބްދުލްގައްޔޫމްގެ އައު ސިޔާސީ ޕާޓީ، ޕީޕަލްސް ނެޝަނަލް ފްރޮންޓް (ޕީއެންއެފް) އިން ކުރިއަށް އޮތް ހުރިހާ އިންތިޚާބެއްގައިވެސް ވާދަކުރާނެ ކަމަށް އެ ޕާޓީ އުފެއްދުމުގައި އިސްކޮށް ހަރަކާތްތެރިވާ ކުރީގެ ޓެކްނޮލޮޖީ މިނިސްޓަރ މުހައްމަދު މަލީހު ޖަމާލް ވިދާޅުވެއްޖެއެވެ. 

އައު ޕާޓީ އުފެއްދުމުގެ ކަންކަމުގައި އިލެކްޝަންސް ކޮމިޝަނަށް ވަޑައިގެންނެވުމަށްފަހު ނޫސްވެރިންނާއި ބައްދަލުކުރައްވައި ވާހަކަދައްކަވަމުން މަލީހު ވިދާޅުވީ، ޕާޓީގެ މުއައްސިސެއްގެ ގޮތުގައި ހަމަޖައްސާފައިވަނީ ރައީސް ޔާމީންގެ ދަރިކަލުން ޒޭން އަބްދުالله ޔާމީން ކަމަށެވެ. އަދި ޑީޖޭއޭ އިން ކުށުގެ ލިބުމާއެކު މިއަދު އީސީއަށް ފޯމު ހުށަހަޅުއްވާނެ ކަމަށް އޭނާ ވިދާޅުވި އެވެ. 

މަލީހް ވިދާޅުވީ ފޯމް ހުށަހެޅުމާއެކު ވަރަށް އަވަހަށް ޕީއެންއެފް އުފެއްދުމުގެ ހުއްދަ ލިބޭނެ ކަމަށް އުއްމީދުކުރައްވާ ކަމަށެވެ. އެއާއެކު އެ ޕާޓީ ވެގެންދާނީ ރާއްޖޭގައި ސިޔާސީ ޕާޓީއެއް އުފެއްދުމުގެ ރިކޯޑް މުގުރާލާ ޕާޓީއެއް ކަމަށްވެސް އޭނާ ވިދާޅުވި އެވެ. 

ޕީޕީއެމް/ ޕީއެންސީގެ ލީޑަރޝިޕްގެ ބައެއް ބޭފުޅުން ރައީސް ޔާމީން އާއި ދުރަށް ޖެހިވަޑައިގެން، ކަންކަމުގައި އެމަނިކުފާނުގެ މަޝްވަރާ ނުހޯއްދަވައި ނިންމެވުންތައް ނިންމަވަމުންދާ ކަމަށް އެމަނިކުފާނަށް ދެކެވޭތީ ކަމަށް ވިދާޅުވެ، ރައީސް ޔާމީން އެ ޕާޓީން ވަކިވެވަޑައިގެން އައު ޕާޓީއެއް އުފެއްދެވުމުގެ މަސައްކަތް ފަށްޓަވާފައި ވާއިރު، ޕީޕީއެމް ޕީއެންސީގައި ތިއްބެވި އެމާނިކުފާނުގެ ސަޕޯޓަރުން އެޕާޓީއާ ގުޅުމަށް ޔާމީން ވަނީ އެދިވަޑައިގެންފަ އެވެ.