ޕީއެންސީގެ ޗެއާޕާސަން އަބްދުއްރަހީމް އަބްދުالله، ކުރީގެ ރައީސް އަބްދުالله ޔާމީން އަބްދުލްގައްޔޫމް އަށް ހެޔޮ އެދޭ ބޭފުޅަކަށްވީ ކޮން އިރަކުތޯ ޔާމީންގެ އިސް ގާނޫނީ ވަކީލު ޑރ މުހައްމަދު ޖަމީލް އަހުމަދު ސުވާލު ކުރައްވައިފި އެވެ.
ރައީސް ޔާމީންގެ މައްޗަށް ކްރިމިނަލް ކޯޓުން ހުރި ޙުކުމް, އިސްތިއުނާފް ކުރަން ހައި ކޯޓަށް ހުށަހަޅަން ޑރ. ޖަމީލު އަޙްމަދު ލަސްކުރެއްވީ ޕީޕީއެމް/ޕީއެންސީގެ ރިޔާސީ ދަހިވެތިކަމުގައި ކަމަށް އަބްދުއްރަހީމް ރޭ ވަނީ ވިދާޅުވެފަ އެވެ.
ރައީސް ޔާމީންގެ އައު ޕާޓީ އުފެއްދުމުގެ ކަންކަމުގައި އިލެކްޝަންސް ކޮމިޝަނަށް ވަޑައިގެންނެވުމަށްފަހު ނޫސްވެރިންނާއިއެކު ބޭއްވި ބައްދަލުވުމުގައި ނޫސްވެރިއަކު ވަނީ، އެކަން ފާހަގަ ކުރައްވާ އޭގެ ހަގީގަތް ސާފުކޮށްދެއްވުމަށް އެދިލައްވާފައެވެ.
އެ ވާހަކައަށް ރައްދު ދެއްވައި ޖަމީލް ވަނީ އަބްދުއްރަހީމް، ރައީސް އަށް ހެޔޮ އެދުނު ދުވަހަކީ ކޮބައިތޯ ސުވާލު ކުރައްވާފައެވެ. އަދި ރައީސް ޔާމީންގެ "ގޮނޑި" ބޭނުންކުރައްވައިގެން އިންތިޚާބު ކާމިޔާބު ވުމުން އަބްދުއްރަހީމް ވެސް އެމަނިކުފާނަށް ޝުކުރު އަދާނުކުރައްވާ ކަމަށް ޖަމީލް ވިދާޅުވި އެވެ.
ކޮން ދުވަހަކުތޯ އަބްދުއްރަހީމް ރައީސް ޔާމީނަށް ހެޔޮ އެދޭ ބޭފުޅަކަށް ވެގެން ތިއުޅެނީ؟ ރައީސް ޔާމީން ހަތަރު އަހަރު ޖަލުގައި ހުންނެވީ. މަންމާފުޅު ނިޔާވީ. ރައީސް ޔާމީން ހުރިހާ ގުރުބާނީއެއް ވެވަޑައިގެންނެވީ. ރައީސް ޔާމީން ނޫންތޯ މި އިންތިޚާބަށްޓަކައި ހުރިހާ ސެކްރިފައިޒެއް ވެވަޑައިގެންނެވީ. ރައީސް ޔާމީންގެ ގޮނޑި ދެއްކެވީ. އާއިލާގެ ބޭފުޅުން ގުރުބާން ވެވަޑައިގެންނެވީ. އިންތިޚާބު ކާމިޔާބުވުމަށްފަހު ކޮން ދުވަހަކުތޯ ޝުކުރުގެ ލަފްޒެއް އަބްދުއްރަހީމް ނުވަތަ އެހެން ބޭފުޅެއް އަދާކުރެއްވީ.
ޑރ. މުހައްމަދު ޖަމީލް އަހުމަދު
ޖަމީލް އިތުރަށް ވިދާޅުވީ، އޭނާގެ "ސިޔާސީ ބައްޕަ" އަކީ ރައީސް ޔާމީން ކަމަށާ، އެމަނިކުފާނު ދެއްވާ އިރުޝާދަކީ ޒާތީ ގޮތުން ދެކެވޭ ވާހަކާތަކަށް ނުފީނަން ގައުމު އިސްލާހުކުރަން މަސައް ކުރުން ކަމަށެވެ.
ޖަމީލް މި މޭރުމުން ވާހަކަ ދައްކަވާފައިވާއިރު، ނިމިދިޔަ ރިޔާސީ އިންތިހާބުގެ ކެންޕެއިން ތެރެއިން ބޭއްވުނު ޕީޕީއެމް/ޕީއެންސީގެ ހުރިހާ ކެންޕެއިން ޖަލްސާއެއްގައި ވެސް، ރައީސް ޔާމީނަށް ޚާއްސަ ގޮނޑިކޮޅެއް ކުރީ ސަފުގެ މެދުގައި އަބަދުވެސް ބަހައްޓާފައި ހުރެއެވެ. އަދި ރައީސުލްޖުމްހޫރިއްޔާ ޑރ މުހައްމަދު މުޢިއްޒު އާއި ޕީޕީއެމް/ޕީއެންސީގެ ލީޑަޝިޕްގެ ބޭފުޅުން ވާހަކަތައް ފަށްޓަވަނީވެސް ރައީސްގެ ނަންފުޅު ހިމަނައިގެންނެވެ.
ހަމައެހެންމެ, ރައީސް މުޢިއްޒުގެ ކެންޕެއިންގައި ރައީސް ޔާމީންގެ އަނބިކަބަލުން މެޑަމް ފާތިމަތު އިބްރާހީމް ވަނީ އަމަލީ ގޮތުންވެސް ބައިވެރިވެފައެވެ.
އެހެންނަމަވެސް، އިންތިޚާބު ކާމިޔާބުވެ، ރައީސުލްޖުމްހޫރިއްޔާ ކަމުގެ މަގާމާއި ހަވާލުވެވަޑައިގެންނެވުމަށްފަހު ރައީސް މުޢިއްޒާއި ސަރުކާރުގެ ބޭބޭފުޅުން ޔާމީންގެ ނަންފުޅު ނުގަންނަކަން ފާހަގަވެފައިވާއިރު، ޖަމީލް ވިދާޅުވާ ގޮތުގައި ޔާމީންގެ ފޯން ކޯލަށް ވެސް މުޢިއްޒު ޖަވާބު ނުދެއްވައެވެ.
އަދި އައު ޕާޓީއެއް ހައްދަވަން ޔާމީން ނިންމެވީވެސް ޕީޕީއެމް/ޕީއެންސީގެ ލީޑަރޝިޕްގެ ބޭފުޅުން ޔާމީންއާއި ދުރުވެ، އެމަނިކުފާނުގެ މަޝްވަރާ ނުހޯއްދަވާތީ ކަމަށް ޖަމީލް ވިދާޅުވެއެވެ.
Advertisement
This content is created and paid for by advertisers and does not involve Voice Journalists
