ގެދޮރުވެރިޔާ ޕޯޓަލް މެދުވެރިކޮށް ފުލެޓަށް އެދުނު ފަރާތްތަކަށް ލިބޭ މާކްސް، އެ ޕޯޓަލް އިން "އޮޓޯ އިން ޖެނެރޭޓްކުރާ" ނަމަވެސް، އެއަށްފަހު، އެ މާކްސް ބަދަލުކޮށް ޝަރުތު ހަމަ ނުވާ މީހުން ޝަރުތު ހަމަވެފައިވާ ކަމަށް ކަނޑައަޅާފައިވާ މައްސަލަތަކެއް ފާހަގަވެފައިވާ ކަމަށް އެންޓި ކޮރަޕްޝަން ކޮމިޝަން (އޭސީސީ) އިން ބުނެފި އެވެ. 

ގެދޮރުވެރިޔާ ސްކީމްގެ ދަށުން ދޫކުރާ 4000 ފުލެޓް ދޫކުރުމުގެ މަސައްކަތް އޭސީސީން ހުއްޓުވާފައި ވުމުން، އެކަމާއި ގުޅިގެން އެ މުވައްސަސާގެ އިސްވެރިން މަޖިލީހުގެ މިނިވަން މުވައްސަސާތަކާއި ބެހޭ ކޮމިޓީއަށް މިއަދު ވަނީ ހާޒިރުކޮށްފައެވެ. 

އެ ކޮމިޓީގެ ބައްދަލުވުމުގައި އޭސީސީން ބުނެފައިވާ ގޮތުން، ފުލެޓް ދީފައި ހުރި ގޮތާއިމެދު ޖުމުލަ 325 ޝަކުވާ ހުށަހެޅިފައިވާ ކަމަށާ، އެ ކޮމިޝަނުން އެ މައްސަލަތައް ތަހުގީގު ކުރަމުންދާ ކަމަށެވެ. 

އެކަމާއި ގުޅިގެން ރައްޔިތުންގެ މަޖިލީހުގެ ވެލިދޫ ދާއިރާގެ މެންބަރު މުހައްމަދު އަބުދުالله ޝަފީގު (މޯޑު) ވަނީ ފުލެޓާއި ގުޅިގެން އޭސީސީއަށް މައިގަނޑު ކޮން ހުށަހެޅިފައިވަނީ ކޮން ކަހަލަ ޝަކުވާތަކެއްތޯ ސުވާލުކުރައްވާފައެވެ. 

މޯޑުގެ އެ ސުވާލަށް ޖަވާބު ދެއްވަމުން އޭސީސީގެ ނާއިބު ރައީސް އަބްދުއްސަލާމް ވިދާޅުވީ، 4000 ފުލެޓް ލިބޭ މީހުންގެ ދާއިމީ ލިސްޓް އެންމެ ފުރަތަމަ އިއުލާން ކުރުމާއި އެކު ގިނަ ބަޔަކު ޝަކުވާ ހުށަހަޅައި ކަންބޮޑުވުން ފާޅުކުރަން ފެށުމުން، އެކަންކަމަށް ބެލުމަށްފަހު، ފުލެޓް ދޫކުރުމުގެ ކަންކަން ކުރިއަށް ގެންދާން ހައުސިންގ މިނިސްޓްރީއަށް އަންގަވާފައިވާނެ ކަމަށެވެ.

އެހެން ނަމަވެސް، ދެވަނަ ފަހަރަށް ލިސްޓު ނެރުނުއިރުވެސް ފުރަތަމަ ފަހަރު ފާހަގަ ކުރެވުނު ޝަކުވާތަކަށް ބަލާފައި ނުވާކަން ފާހަގަކުރެވިފައިވާ ކަމަށް އަބްދުއްސަލާމް ވިދާޅުވި އެވެ. އެހެންކަމުން ނޮވެންބަރު 15 ވަނަ ދުވަހު ފުލެޓް ދޫކުރުން ހުއްޓާލަން ހައުސިންގް މިނިސްޓްރީއަށް އަންގާފައިވާނެ ކަމަަށް އޭނާ ވިދާޅުވި އެވެ.

ފުލެޓް ދޫކުރުން ހުއްޓާލުމަށް އޭސީސީން އަންގާފައިވަނީ އެ ފްލެޓްތަކާއި ގުޅިގެން ހުށަހެޅުނު ޝަކުވާތައް ތަހުގީގު ކުރުމުގެ ކަންކަން ކުރިއަށް ގެންދިޔުމަށް ކަމަށް އަބްދުއްސަލާމް ވިދާޅުވި އެވެ. 

މީގެ އިތުރުން، ފުލެޓަށް އެދި ހުށަހަޅާ ފަރާތުން އެ ފަރާތެއްގެ ދަރިއެއް ނެތް ކަމަށް ފޯމުގައި ޖަހާފައި، އަދި ޑީއެންއާރު ސިސްޓަމުންވެސް އެ ފަރާތެއްގެ ދަރިއެއް ނެތް ކަމަށް ދައްކާފައި ހުރި ނަމަވެސް، އެ ފަރާތުގެ ދަރިއެއް ހުރި ކަމަށް ބަލައި މާކުސް ދީފައި ހުރިކަން ފާހަގަވެފައިވާ ކަމަށް އަބްދުއްސަލާމް ވިދާޅުވި އެވެ. 

މިއާއެކު އަބްދުއްސަލާމް ވިދާޅުވީ، ބައެއް ފަރާތްތަކުގެ ޝަތުރު ހަމަވާކަމަށް ކަނޑައަޅައި ފުލެޓް ދީފައި ވާއިރު، އެފަރާތްތަކުން ހުށަހަޅާފައިވާ ލިޔެކިޔުންތަކުން އެއީ މާލޭގައި ދިރިއުޅޭ ފަރާތްތަކެއް ނޫންކަން ސާފުކޮށް އެނގެން ހުރި ކަމަށެވެ. 

އަބްދުއްސަލާމް ވިދާޅުވީ، އެކަންކަމަކީ އެންމެ ފުރަތަަމަ ދާއިމީ ލިސްޓް ނެރުނު އިރުވެސް ފާހަގަވި ކަންކަން ކަމަށާ، ދެވަނަ ފަހަރު ލިސްޓް ނެރުނު އިރުވެސް އެކަމަށް ބަލާފައި ނުވާ ކަމަށެވެ. އަދި، ފުލެޓް ދޫކުރުން މަޑު ޖައްސާލަން އަންގާފައިވަނީ އެ ސަބަބުތަކަށްޓަކައި ކަމަށް އޭނާ ވިދާޅުވި އެވެ. 

އަބްދުއްސަލާމްގެ ވާހަކަތަކަށް ބާރުދެއްވަމުން އޭސީސީގެ ރައީސް އާދަމް ޝާމިލް ވިދާޅުވީ، ގެދޮރުވެރިޔާ ޕޯޓަލް އަކީ ރާއްޖޭގައި މިހާތަނަށް އެންމެ ރަނގަޅަށް ޑިޒައިން ކުރި ޕޯޓަލް ކަމަށެވެ. އެހެންނަމަވެސް، ޕޯޓަލްގެ މަސައްކަތް ނިމި، އެ 'ވެރިފައިކުރުމާއި' އެއަށްފަހު 'އެޕްރޫވް' ކުރަން ތިބޭ ތިން މީހުންގެ ފަރާތުން ފާހަގަވެފައިވާ ކަންކަމަށް ބަލާފައި އެ މައްސަލަ އިތުރަށް ބަލަންޖެހުނު ކަމަށް އޭނާ ވިދާޅުވި އެވެ. 

އެހެންކަމުން، އެމީހުންގެ މަގާމުގެ ބޭނުން ކޮށްގެން ނާޖާއިޒު ފައިދާ ހޯދައިދިނުމުގެ ތުހުމަތު، ވެރިފައި ކުރާށާއި، އެޕްރޫވް ކުރަން ތިބި މީހުންގެ މައްޗަށް ކުރެވޭ ކަމަށް ޝާމިލް ވިދާޅުވި އެވެ.