ޖާހާއި، މަންޞިބާއި، މަޤާމުގެ ޒާތީ މަޞްލަޙަތުގައި އަރާރުންވާން ތިބޭން މިއަދުގެ މި ޤައުމުގެ ޙާލަތު ތަން ނުދޭ ކަމަށް މަޝްހޫރު ދީނީ ޢިލްމުވެރިޔާ އައްޝެއިޚު އަހުމަދު ސަމީރު ވިދާޅުވެއްޖެއެވެ. 

ޝެއިޚް ސަމީރުގެ ފޭސްބުކުގައި ކުރެއްވި ޕޯސްޓެއްގައި ވިދާޅުވީ، މިއަދު ދިވެހި ޤައުމުގެ އާދޭހަކީ އަވަސް ފަރުވާގައި ޤައުމައިގެން ކުރިޔަށް ދިޔުން ކަމަށެވެ. އަދި ޖާހާއި މަންޞިބާއި މަޤާމުގެ ޒާތީ މަޞްލަޙަތުގައި އަރާރުންވާން ތިބޭން މި ޤައުމުގެ ޙާލަތު ތަން ނުދޭ ކަމަށް ޝެއިޚް ވިދާޅުވި އެވެ. 

މިއާއެކު ޝެއިޚް ސަމީރު ވަނީ, ޒާތީ މަންފާތަކުގެ އެދުމުގައި ވެވޭ އަރާރުންތަކަށް ފުރުސަތު ދިނުމުގެ ބަދަލުގައި އައު ޤިޔާދަތާ އެކު، އައު ހިތްވަރެއްލައި ޤައުމައިގެން ކުރިޔަށް ދިޔުމަށް ދިވެހި ރައްޔިތުންނަށް އިލްތިމާސް ކުރައްވާފައެވެ.

ޝެއިޚް ސަމީރު މިފަދަ ޕޯސްޓެއް ކުރައްވާފައި މިވަނީ، ޕީޕީއެމް/ޕީއެންސީ އެކުވެގެން އުފެދުނު ރައީސުލްޖުމްހޫރިއްޔާ ޑރ މުހައްމަދު މުޢިއްޒުގެ ސަރުކާރަށް ގާތްގަނޑަކަށް ހަފްތާއެއް ވެފައި ވަނިކޮށް، ޕީޕީއެމްގެ ކުރީގެ ރައީސް އަދި ކުރީގެ ރައީސް ޔާމީން އަބްދުލްގައްޔޫމް އައު ޕާޓީއެއް އުފައްދަވައި، އެމަނިކުފާނަށް ތާއީދު ކުރައްވާ ފަރާތްތަކުން އެ ޕާޓީގެ މެންބަރުން އިތުރު ކުރުމުގެ މަސައްކަތް ފަށާފައި ވަނިކޮށެވެ. 

ޔާމީންގެ ޕާޓީގެ ކަން ކަމުގައި އިސްވެ ހަރަކާތްތެރިވެވަޑައިގަންނަވަނީ ކުރީގެ ޓެކްނޮލޮޖީ މިނިސްޓަރ މުހައްމަދު މަލީހު ޖަމާލް އާއި އޭނާގެ ބޮޑުބޭބެ އަދި ރައީސް ޔާމީންގެ އިސް ގާނޫނީ ވަކީލު ޑރ މުހައްމަދު ޖަމީލް އަހުމަދެވެ. އެ ބޭފުޅުން މަޢުލޫމާތު ދެއްވާ ގޮތުގައި ޔާމީން އައު ޕާޓީއެއް އުފައްވަން ނިންމެވީ ޕީޕީއެމްގެ ލީޑަރޝިޕުން އެމަނިކުފާނާ ފެޔަށް ޖެހިވަޑައިގެން ކަން ކަމުގައި މަޝްވަރާ ނުހޯއްދަވާތީ އެވެ. އެހެން ނަމަވެސް ޕީޕީއެމް/ޕީއެންސީގެ ލީޑަރޝިޕުން އެވާހަކަ ދޮގު ކުރެއެވެ.